ސައޫދީ އަރާމްކޯއަށް ދިން ހަމަލާގެ ޒިންމާ ހޫޘީން ނަގައިފި

ޔަމަނުގެ ހަނގުރާމަވެރި ހޫޘީ ޖަމާއަތާއި ސައޫދީ އަރަބިއްޔާއާ ދެމެދު ކުރިމަތިލުންތައް ވަރުގަދަވެފައިވާ މި ދަނޑިވަޅުގައި، ސައޫދީގެ ވެރިރަށް ރިޔާޟުގައި ހުންނަ އަރާމްކޯގެ ފެސިލިޓީއަކަށް ބެލިސްޓިކް މިސައިލާއި ޑްރޯން ބޭނުންކޮށްގެން ހަމަލާދީފައިވާ ކަމަށް ހޫޘީން ބުނެފިއެވެ.

ހޫޘީންގެ އަސްކަރީ ތަރުޖަމާނު ޔަހްޔާ ސާރީ އެކްސްގައި ކުރެއްވި ޕޯސްޓެއްގައި ވިދާޅުވީ، ރިޔާޟުގައި ހުންނަ އަރާމްކޯއަށް އަމާޒުކޮށް އަސްކަރީ އޮޕަރޭޝަނެއް ހިންގާފައިވާ ކަމަށެވެ. އަދި މި ހަމަލާތަކަކީ "ސީދާ އަމާޒަށް ވާސިލުވި ހަމަލާތަކެއް" ކަމަށާއި، އޭގެ ސަބަބުން އެ ސަރަހައްދުގައި އަލިފާން ރޯވި ކަމަށްވެސް އޭނާ ދައުވާކުރެއްވިއެވެ.

 ހޮނިހިރު ދުވަހު ރިޔާޟުގައި ހުންނަ އަރާމްކޯ ފެސިލިޓީ ކައިރިން ދުމުގެ އަސަރާއި އަލިފާންގަނޑެއް ފެނިފައިވީ ނަމަވެސް، ސައޫދީ ކަމާބެހޭ ފަރާތްތަކުން އަދި އަރާމްކޯ ކުންފުނިން ވެސް މި ހަމަލާއާ ގުޅޭގޮތުން އެއްވެސް އެއްޗެއް ހާމަކޮށްފައެއް ނުވެއެވެ.

ހޫޘީންގެ މި ދައުވާއާ ގުޅިގެން، ޔަމަނުގެ ބައިނަލްއަޤްވާމީ ގޮތުން ބަލައިގެންފައިވާ ސަރުކާރަށް ތާއީދުކުރާ ސައޫދީ އިސްވެ އޮންނަ ކޯލިޝަނުން ބުނީ، ޠޫރު އަލް-ބަހާ އަދި ތާއިޒް ފްރަންޓުގައި ތިބި ހޫޘީ ފައުޖުތަކަށް އަމާޒުކޮށް 97 އޮޕަރޭޝަނެއް ހިންގާފައިވާ ކަމަށެވެ. މި ހަމަލާތަކުގައި ހަނގުރާމަމަތީ ބޯޓުފަހަރާއި، ޑްރޯން، ބަޑި އަދި މިސައިލް ބޭނުންކޮށްފައިވެއެވެ. ޔަމަން ސަރުކާރު ފައުޖުގެ ތަރުޖަމާނު ކާނަލް މަޖީދު އަބްދުﷲ އައްނަޒީލީ ވިދާޅުވީ މި ހަމަލާތަކުގައި މަދުވެގެން 260 ހޫޘީ ހަނގުރާމަވެރިން މަރުވެ، އަސްކަރީ 44 އުޅަނދެއް ހަލާކުކޮށްލާފައިވާ ކަމަށެވެ.

މި ހަފްތާގެ ކުރީކޮޅު  މަދީނާގެ ކަރަންޓު އުފައްދާ މަރުކަޒަކަށް ވެސް ހޫޘީން ހަމަލާދީފައިވާ ކަމަށް ސައޫދީ ކޯލިޝަނުން ބުނެފައިވެއެވެ. މީގެއިތުރުން، ވޭތުވެދިޔަ މަހުގެ ފަހުކޮޅު ރަތްކަނޑުގެ އައްސޭރިފަށުގެ ބަނދަރު ރަށެއް ކަމަށްވާ ޔަންބޫގައި ހުންނަ އަރާމްކޯގެ ވަސީލަތްތަކަށް ހަމަލާދިން ކަމަށް ހޫޘީން ބުނެފައިވީ ނަމަވެސް، ސައޫދީން ވަނީ އެ ހަމަލާތައް ދިފާއުކޮށްފައިވާ ކަމަށާއި އެއްވެސް ގެއްލުމެއް ލިބިފައިނުވާ ކަމަށް ބުނެފައެވެ.

ޔަމަނުގައި 2022 ވަނަ އަހަރު ގާއިމުކުރި ނާޒުކު ހަނގުރާމަ ހުއްޓާލުމުގެ އެއްބަސްވުން މިދިޔަ ޖުލައި މަހު އުވިގެން ދިޔަ ފަހުން ދެފަރާތުގެ ދެމެދުގައި ހަމަލާ ބަދަލުކުރުންތައް ވަނީ އިންތިހާއަށް އިތުރުވެފައެވެ. ސެޕްޓެމްބަރު މަހުގެ މެދުތެރޭގައި ދުނިޔޭގެ ތެޔޮ އުފުލާ މުހިންމު މަގެއް ކަމަށްވާ ބާބުލް މަންދަބު ކަނޑުއޮޅީގެ ސްޓްރެޓީޖިކް ރަށްތަކާއި މޮކާ ބަނދަރު ހޫޘީންގެ ބާރުގެ ދަށަށް ގެންގޮސްފައިވާއިރު، ހަނގުރާމަ އަލުން ފެށުނު ފަހުން އެތައް ލައްކަ ބަޔަކު ވަނީ ގެދޮރު ދޫކޮށް ދާންޖެހިފައެވެ.