ސުމޫދު ފްލޮޓިލާގެ އުޅަނދުތައް ތުރުކީގައި މަރާމާތުކުރަން ފަށައިފި

ބައިނަލްއަޤްވާމީ ކަނޑުގެ ސަރަޙައްދުގައި އިސްރާއީލުން ދިން ހަމަލާތަކެއްގައި ގެއްލުން ލިބުނު ގްލޯބަލް ސުމޫދު ފްލޮޓިލާގެ އުޅަނދުތައް، ޣައްޒާއަށް އަލުން ދަތުރުކުރުމަށްޓަކައި ތުރުކީގެ އަންތާލިޔާގައި މަރާމާތުކުރުމުގެ މަސައްކަތް ވޮލަންޓިއަރުން ފަށައިފިއެވެ.

އިސްރާއީލުގެ ހަމަލާތަކާ ގުޅިގެން ބައެއް އުޅަނދުތަކުގެ އިންޖީނުތަކާއި ކުނބުތައް ބިނދި، ރިޔާތައް ވީދިފައިވާއިރު، މި އުޅަނދުތައް ވަނީ އަންތާލިޔާގެ ޝިޕްޔާޑަކަށް ގެންގޮސްފައެވެ. އެތަނުގައި ތުރުކީގެ އިތުރުން ބައިނަލްއަޤްވާމީ ވޮލަންޓިއަރުން އަންނަނީ މަރާމާތުގެ މަސައްކަތްތައް ކުރަމުންނެވެ.

ގްލޯބަލް ސުމޫދު ފްލޮޓިލާގެ ބޯޑު މެންބަރެއް ކަމަށްވާ ސުމެއިރާ އަކްދެނިޒް އުރުދޫ، އަނަދޯލޫ އެޖެންސީ (އޭއޭ) އަށް މައުލޫމާތު ދެއްވަމުން ވިދާޅުވީ، ދެ އުޅަނދެއް މިހާރު މަރާމާތުކޮށް ނިމި، ޣައްޒާއަށް ފޮނުވުމަށް ތައްޔާރުވުމުގެ ގޮތުން އިޓަލީއަށް ފޮނުވާލާފައިވާ ކަމަށެވެ. އަދި މިވަގުތު އަންތާލިޔާގައި ފްލޮޓިލާގެ 14 އުޅަނދެއް މަރާމާތު ކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ.

"އަޅުގަނޑުމެން މި މަސައްކަތް ކުރަނީ ކަނޑުމަތީގައި ހާލުގައި ޖެހިފައިވާ އުޅަނދުތައް ސަލާމަތްކުރުމަށް. މި އުޅަނދުތައް އަލުން ޣައްޒާއަށް ދަތުރުކުރެވޭނެ ގޮތް ހެދުމަށްޓަކައި މަރާމާތު ކުރަމުން މިދަނީ،" އުރުދޫ ވިދާޅުވިއެވެ.

އުރުދޫ ހާމަކުރެއްވި ގޮތުގައި އުޅަނދުތަކަށް ވަނީ ބޮޑެތި ގެއްލުންތަކެއް ލިބިފައެވެ. އެގޮތުން ބޮޑެތި އުޅަނދުތަކުން ޖައްސައި ގެއްލުން ދީފައިވާއިރު، އިންޖީނުތަކުގެ ތެރެއަށް ސާފުކުރާ ކެމިކަލާއި ކޮފީ އަޅައި، ހޮޅިތައް ވަނީ ބުރިކޮށްލާފައެވެ. އަދި ވަޅި ފަދަ ތަކެތިން ރިޔާތައް ވަނީ ވީދާލާފައެވެ.

މިފަދަ ބޮޑެތި ގެއްލުންތަކެއް ލިބިފައިވީ ނަމަވެސް، ފަލަސްޠީނުގެ ރައްޔިތުންގެ ހައްޤުގައި ކުރަމުންދާ މަސައްކަތް ހުއްޓާނުލާނެ ކަމަށާއި، މި މަސައްކަތަށް ތުރުކީން ރައްކާތެރި ބަނދަރެއް ފޯރުކޮށްދީފައިވާތީ އުރުދޫ ވަނީ ޝުކުރު އަދާކުރައްވާފައެވެ.