ކުޅިވަރު

ގޯލްޑް ކަޕް: ހަނި ގޮތަކަށް ކޮލިފައިވި ތިމަރަފުށިން ވަރުގަދަ ފުވައްމުލަކު ސިޓީ ހިފަހައްޓައިފި

ގޯލްޑް ކަޕް: ހަނި ގޮތަކަށް ކޮލިފައިވި ތިމަރަފުށިން ވަރުގަދަ ފުވައްމުލަކު ސިޓީ ހިފަހައްޓައިފި

ފުވައްމުލަކު ސިޓީގެ އޮވޫސޫ ބޯޅަ ފޮނުވާލަނީ--- ފޮޓޯ: މިހާރު

މިފްތާޙް މުޙައްމަދު

މިފްތާޙް މުޙައްމަދު

10 ޑިސެމްބަރު 2024، 09:07

10 ޑިސެމްބަރު 2024، 09:07

ހުލާސާ

އެއް މެޗުން މޮޅުވެ ލިބުނު ތިން ޕޮއިންޓާއެކު ދެވަނަ ބުރަށް ދަތުރުކުރި ތިމަރަފުށިން، ފަސް ޓީމު ހިމެނުނު ގްރޫޕުން ސައްތައިން ސައްތަ ރެކޯޑަކާއި އެކު ދެވަނަ ބުރަށް ދަތުރުކުރި ފުވައްމުލަކު ސިޓީ ބައްދަލު ކުރި މެޗު އެއްވަރުވީ 1-1 އިން.

ނައިންޓީ ޕްލަސް ގޯލްޑް ކަޕްގެ ދެވަނަ ބުރުގެ މެޗުތައް ހޯމަ ދުވަހު ފަށާފައިވާއިރު، މި ބުރުގެ ފުރަތަމަ މެޗުގައި ތިމަރަފުށިން ވަރުގަދަ ފުވައްމުލަކު ސިޓީ ހިފަހައްޓައިފިއެވެ. އެއް މެޗުން މޮޅުވެ ލިބުނު ތިން ޕޮއިންޓާއެކު މި ބުރަށް ތިމަރަފުށި ދަތުރުކުރިއިރު، ފަސް ޓީމު ހިމެނުނު ގްރޫޕުން ފުވައްމުލަކު ސިޓީ ދެވަނަ ބުރަށް އައީ ސައްތައިން ސައްތަ ރެކޯޑަކާއި އެކު، 12 ޕޮއިންޓު ހޯދައިގެންނެވެ.

ހަމަގައިމު ވެސް ތިމަރަފުށިން ޓެކްޓިކަލީ އެ ޓީމުގެ ކުޅުން ވަރަށް ބޮޑުތަން ރަގަޅުކޮށްފިއެވެ. ފުރަތަމަ ބުރުގައި އެ ޓީމު ވަނީ މާލޭ ސިޓީ އާއި އޭދަފުއްޓާއި ދެކޮޅަށް ކުޅުނު މެޗުން 4-0 ބަލިވެފައެވެ. ދެވަނަ ބުރުގެ ޖާގަ ހޯދުމަށް 4-2 އިން ތުލުސްދޫ ބަލިކުރިއިރު، އެ ބުރުގައި އެ ޓީމުގެ ކޮޅަށް 10 ގޯލު ވަދެފައިވެއެވެ.

ނަމަވެސް، މުބާރާތުގެ ފުރަތަމަ ބުރުގައި 19 ގޯލު ކާމިޔާބުކޮށްފައިވާ ފުވައްމުލަކު ސިޓީ އާއި ދެކޮޅަށް އެ ޓީމުން ފެނުނީ މާ ވަރުގަދަ ކޮށެވެ. މުބާރާތުގައި މިހާތަނަށް ގޯލާ އެންމެ ރަށްޓެހި ފުވައްމުލަކު ސިޓީއާއި ތިމަރަފުށި ބައްދަލުކުރި މެޗު ނިމުނީ  1-1 އިން އެއްވަރުވެގެނެވެ.

މި މެޗުގައި ފުރަތަމަ ލީޑު ނެގީ ވެސް ތިމަރަފުށިންނެވެ. މެޗުގެ 10 ވަނަ މިނެޓުގައި އެ ޓީމަށް ލީޑު ނަގައިދިނީ މާޒިޔާ ސްޕޯޓްސް އެންޑް ރެކްރިއޭޝަނަށް ފުރަތަމަ ޑިވިޝަނުގައި ކުޅުނު އާދަމް ނާސިހު ގޯލު ކުރިމައްޗަށް ނެގި ހުރަހަކުން، އިލްމާން އަހުމަދު މޫސާއެވެ.

ނަމަވެސް މާ ގިނަ ވަގުތު އެ ޓީމަށް މި ލީޑު ހިފަހައްޓައެއް ނުލެވުނެވެ. އެ ގޯލު ޖެހިތާ 15 މިނެޓު ފަހުން ފުވައްމުލަކު ސިޓީއިން މެޗުގެ ނަތީޖާ ހަމަހަމަ ކުރިއެވެ. މި ގޯލު ކާމިޔާބުކޮށްދިނީ، މުބާރާތުގައި މިހާތަނަށް އެންމެ ގިނަ ގޯލު ކާމިޔާބު ކޮށްފައިވާ ފުވައްމުލަކު ސިޓީގެ ގާނާގެ ފޯވާޑް ކޯފީ އޮވޫސޫއެވެ. އެއީ މި މުބާރާތުގައި އޭނާ ކާމިޔާބުކުރި 8 ވަނަ ގޯލެވެ.

އޭގެ ފަހުން ވެސް މެޗުގެ ނަތީޖާ ބަދަލުކޮށްލުމަށް ދެ ޓީމަށް ވެސް ފުރުސަތުތައް ލިބިފައިވެއެވެ. އެގޮތުން ތިމަރަފުށީގެ އަބްދުﷲ ޒިޔާނާއި، ފުވައްމުލަކު ސިޓީގެ އަލީ ޝަމާލް އަބްދުﷲއަށް ލިބުނު ފުރުސަތު ފާހަގަކޮށްލެވެއެވެ. ނަމަވެސް މި ފުރުސަތުތައް ގޯލަށް ކާމިޔާބު ކުރެވޭ ގޮތް ވަނީ ނުވެފައެވެ. 

މި ގްރޫޕްގެ މެޗެއް ދެން އޮންނާނީ ބުދަ ދުވަހުއެވެ. އެ މެޗުގައި ބައްދަލު ކުރާނީ ގުރައިދޫ އާއި ތިމަރަފުއްޓެވެ.

މި ލިޔުން ކިޔާލުމުން

Ads by MSS