ޓީޖީއެސްޓީ އޮނިގަނޑު ބަދަލުކުރަން ނިންމުމުން މަޓާޓޯގެ މަރުހަބާ

ޑެސްޓިނޭޝަން ޕްރިންސިޕަލް ޓީޖީއެސްޓީއަށް އަމަލުކުރުމުގެ އޮނިގަނޑަށް ބަދަލުތަކެއް ގެނައުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމެވި ނިންމެވުމަށް މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން މިއަދު މަރުހަބާ ކިޔައިފިއެވެ.

މި ބަދަލު ގެންނަން ނިންމާފައިވަނީ ޖީއެސްޓީ ގާނޫނަށް ގެނައި އިސްލާހާ ގުޅިގެން ފަތުރުވެރިކަމުގެ ސިނާއަތުގެ ފަރާތްތަކުން ކަންބޮޑުވުން ފާޅުކޮށްފައިވަނިކޮށެވެ.

މި މަހުން ފެށިގެން ބޭރުގެ ޓްރެވަލް އެޖެންޓުންގެ އަތުން ޓެކްސް ނަގާ ގޮތަށް ޖީއެސްޓީ ގާނޫނަށް އަށް ވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގުކުރެއްވީ މިދިޔަ އޮގަސްޓު މަހުގެ 31 ވަނަ ދުވަހުއެވެ.

މި އިސްލާހާމެދު ކަންބޮޑުވުން ފާޅުކޮށް، އެއަށް އަމަލުކުރުން ފަސްކުރުމަށް ޔޫރަޕްގެ ޓުއާ އޮޕަރޭޓަރުންނާއި ޓުއާ އެޖެންޓުން ތަމްސީލްކުރާ ބައެއް އެސޯސިއޭޝަންތަކުން ދިވެހި ސަރުކާރާއި މީރާގައި މީގެ ކުރިން ވަނީ އެދިފައެވެ. ފަތުރުވެރިކަމާ ބެހޭ ވަޒީރު މުހައްމަދު އަމީން ރޭ ވިދާޅުވީ، ސަރުކާރުން މި އޮނިގަނޑަށް ބަދަލު ގެންނަން ނިންމެވީ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއި ޓްރެވަލް އޭޖެންޓުން ފާޅުކޮށްފައިވާ ކަންބޮޑުވުންތައް ބަލައިގަތުމަށްފަހު ކަމަށެވެ.

މަޓާޓޯއިން ނެރުނު ބަޔާނެއްގައި ބުނެފައިވަނީ، ސިނާއަތުގެ ކަންބޮޑުވުންތައް އަޑުއަހައި އެކަންކަމަށް އިޖާބަދިނުމަށް ސަރުކާރުން ނިންމާފައިވާތީ ޝުކުރުވެރިވާ ކަމަށެވެ. އަދި ފާއިތުވި ހަފުތާތަކުގައި އެ ޖަމިއްޔާއިން ރާއްޖެއާއި ރާއްޖެއިން ބޭރުގެ ކަމާގުޅޭ ފަރާތްތަކާއެކު މަޝްވަރާތައް ބާއްވައި، މި ބަދަލުތަކުގެ ސަބަބުން ވިޔަފާރިއާއި އޮޕަރޭޝަންތަކަށް ކުރާނެ އަސަރު ދެނެގަތުމަށްޓަކައި މުޅި ސިނާއަތް ހިމެނޭ ގޮތަށް ސާވޭއެއް ވެސް ކުރިއަށް ގެންގޮސްފައިވާ ކަމަށް ބަޔާނުގައި ފާހަގަކޮށްފައިވެއެވެ.

މިކަމާ ގުޅޭގޮތުން މަޓާޓޯގެ ސެކްރެޓަރީ ޖެނެރަލް އަބްދުﷲ ސުއޫދު ވިދާޅުވީ، ސަރުކާރުގެ މި ނިންމުމަކީ ވަރަށް މުހިންމު އަދި ރަނގަޅު ފިޔަވަޅެއް ކަމަށެވެ. އަދި ފަތުރުވެރިކަމުގެ ސިނާއަތަށް އަބަދުވެސް ކާމިޔާބީ ލިބިފައިވަނީ ސަރުކާރާއި ސިނާއަތުގައި ހަރަކާތްތެރިވާ ފަރާތްތައް ގުޅިގެން މަޝްވަރާކޮށްގެން މަސައްކަތްކުރުމުން ކަމަށް އޭނާ ފާހަގަކުރެއްވިއެވެ.

"ދައުލަތަށް ލިބޭ އާމްދަނީ ރައްކާތެރިކޮށްދޭ، އަދި ހަމައެއާއެކު ބައިނަލްއަގުވާމީ ބާޒާރުގައި ރާއްޖެއަކީ ވާދަވެރި އަދި ވިއްކަން ފަސޭހަ މަންޒިލެއްގެ ގޮތުގައި ދެމިއޮންނާނެކަން ކަށަވަރުކޮށްދޭ ހަމަހަމަ އޮނިގަނޑެއް އެކުލަވާލުމުގައި ސަރުކާރަށް އެއްބާރުލުން ދިނުމަށް މަޓާޓޯ އޮތީ ތައްޔާރަށް،" ސުއޫދު ވިދާޅުވިއެވެ.

މަޓާޓޯއިން އިތުރަށް ބުނެފައިވަނީ، ޓީޖީއެސްޓީގެ އޮނިގަނޑަށް ގެންނަން ހުށަހަޅާ އިސްލާހުތައް އެކުލަވާލުމުގެ މަސައްކަތް ކުރިއަށްދާއިރު، ސަރުކާރާއި، މީރާ އާއި، ރާއްޖޭގެ ފަތުރުވެރިކަމުގެ ދާއިރާގެ ފަރާތްތަކުގެ އިތުރުން ބައިނަލްއަގުވާމީ ޓްރެވަލް ޕާޓްނަރުންނާއެކު އިތުރު މަޝްވަރާތައް ކުރިއަށް ގެންދިއުމަށް އެ ޖަމިއްޔާއިން އުންމީދުކުރާ ކަމަށެވެ.