މަޝްވަރާތައް ނާކާމިޔާބުވެ، އިމްރާންގެ ސަޕޯޓަރުން ބޮޑު މުޒާހަރާ ފަށައިފި

ޖަލުގައި ބަންދުކޮށްފައިވާ ޕާކިސްތާނުގެ ކުރީގެ ބޮޑުވަޒީރު އިމްރާން ޚާން މިނިވަންކުރުމަށް ގޮވާލައި، ސަރުކާރާއެކު ބޭއްވި މަޝްވަރާތައް ނާކާމިޔާބުވުމާ ގުޅިގެން އޭނާގެ ސަޕޯޓަރުން ޤައުމުގެ ހުޅަނގު އުތުރުން ބޮޑު އިހުތިޖާޖީ ހިނގާލުމެއް ފަށައިފިއެވެ.

އާދީއްތަ ދުވަހު ފެށި މި ހިނގާލުމުގައި 5،000 އަށް ވުރެ ގިނަ މީހުން ވަނީ ބައިވެރިވެފައެވެ.

އިމްރާން ޚާންގެ ޕާކިސްތާން ތަޙްރީކޭ އިންސާފް (ޕީޓީއައި) ޕާޓީން އިސްނަގައިގެން ކުރިއަށްގެންދާ މި ހިނގާލުން އެންމެ ފުރަތަމަ ތާވަލުކުރީ ސެޕްޓެމްބަރު 27 އަށެވެ. ނަމަވެސް، ސަރުކާރާއި ޕީޓީއައިގެ ލީޑަރޝިޕާ ދެމެދު މަޝްވަރާ ކުރުމަށްޓަކައި އޮކްޓޯބަރު 4 އަށް ފަސްކުރި ނަމަވެސް، ހަފްތާ ބަންދުގައި ބޭއްވި ދެ ބުރުގެ މަޝްވަރާއިން ވެސް އެއްބަސްވުމަކަށް ނާދެވުމުން މުޒާހަރާ ވަނީ އަލުން ފަށާފައެވެ. މިއީ ސިޔާސީ ސަބަބުތަކަށްޓަކައި 2023 ވަނަ އަހަރުގެ އޮގަސްޓް މަހުން ފެށިގެން ޖަލުގައި ބަންދުކޮށްފައިވާ ކަމަށް ބުނާ އިމްރާން ޚާން ދޫކޮށްލުމަށް ސަރުކާރަށް ޕްރެޝަރު ކުރުމަށް ކުރިއަށްގެންދާ ހަރަކާތެކެވެ.

ޕީޓީއައިގެ ކޮންޓްރޯލް އޮންނަ ޚައިބަރު ޕަޚްތުންޚުވާ ޕްރޮވިންސްގެ އެކި ސަރަޙައްދުތަކުން ސަޕޯޓަރުން ވަނީ ގާފިލާތަކުގައި މި ހިނގާލުމާ ގުޅިފައެވެ. އެ ޕްރޮވިންސްގެ ޗީފް މިނިސްޓަރު ސުހައިލް އަފްރީދީ ވިދާޅުވީ، ބުރާސްފަތި ދުވަހާ ހަމައަށް ހިނގާލުން އިސްލާމްއާބާދާ 80 ކިލޯމީޓަރު ދުރުގައިވާ ޚައިރްއާބާދަށް ދާނެ ކަމަށާއި، ދެން އޮންނަ މަރުހަލާގެ ޕްލޭން އިޢުލާން ކުރާނީ އެތަނުން ކަމަށެވެ.

މުޒާހަރާގެ ބައިވެރިން ވެރިރަށް އިސްލާމްއާބާދަށް ވަނުން ހުއްޓުވުމަށްޓަކައި ސަރުކާރުން ވަނީ މައި މަގުތަކުގައި ޝިޕިން ކޮންޓޭނަރުތައް ބަހައްޓައި ބަންދުކޮށްފައެވެ. ދާޚިލީ ވަޒީރު މުހުސިން ނަޤްވީ ވިދާޅުވީ، ދެފަރާތުގެ ދެމެދުގައި ކުރެވުނު މަޝްވަރާތައް ނާކާމިޔާބުވެފައިވާ ކަމަށާއި، އިސްލާމްއާބާދުގައި ހަމަނުޖެހުން އުފެއްދުމުގެ ފުރުޞަތު ސަރުކާރުން ނުދޭނެ ކަމަށެވެ.

އުމުރުން 73 އަހަރުގެ އިމްރާން ޚާންގެ ޞިއްޙީ ޙާލަތާ މެދު އުފެދިފައިވާ ކަންބޮޑުވުންތަކުގެ އިތުރުން، މިދިޔަ މަހު ހައްޔަރުކުރި އޭނާގެ ތިން ކޮއްކޮ މިނިވަންކުރުމަށް ވެސް ޕީޓީއައި އިން ދަނީ ގޮވާލަމުންނެވެ.