ފެނިގެންދިޔައީ މެމްބަރުންގެ ތާޢީދު ބޮޑުތަނުން އެމްޑީޕީއަށް ގެއްލިފައިވާ މަންޒަރު !

ޤާނޫނުއަސާސީ ދިފާޢުކުރުމުގެ ނަމުގައި އެމްޑީޕީން ރޭ ކާނިވާ ސަރަޙައްދުގައި ބޭއްވި ޖަލްސާއަށް ރައްޔިތުންގެ ފަރާތުން ލިބުނީ ފަނޑު ތަރުހީބެކެވެ. މީސްމީޑިއާގައި ގިނަ ބަޔަކު ވަނީ އެމްޑީޕީއަކީ މިހާރު ހަމައެކަނި ނަމުގައި އޮތް ޕާޓީއެއްކަމަށް ބުނެ ފާޑުކިޔާފައެވެ.

ޖަލްސާގައި އެންމެ ފާހަގަކުރެވުނު ކަމަކީ އެމްޑީޕީގެ ރައީސް އިބްރާހިމް މުޙައްމަދު ޞާލިޙް (އިބޫ) އަމިއްލަފުޅަށް ސަރުކާރަށް ފާޑުކިޔާ ލަވައެއް ވިދާޅުވުމެވެ. މިކަމާ ގުޅިގެން ސޯޝަލް މީޑިއާގައި ގިނަ ބަޔަކު ވަނީ ފާޑުކިޔާފައެވެ.

ކުރީގެ ސަރުކާރުން ކޮށްފައިވާ ގިނަ ކަންތައްތަކާމެދު ރައްޔިތުން ހިތްހަމަނުޖެހޭކަން ފާހަގަކުރެވެއެވެ. ގައުމު ބޮޑުތަނުން ދަރުވާލުމާއި ރައްޔިތުންގެ މުދަލާއި ފައިސާއަށް ޚިޔާނާތްތެރިވުމަކީ ކުޑަކަމެއްގެ ގޮތުގައި ރައްޔިތުން ނުދެކޭކަން މިވަނީ ހާމަވެފައެވެ.

އެއް އިރެއްގައި ސިޔާސީ މައިދާނުގައި އެންމެ ބާރުގަދަ ޕާޓީއެއްގެ ގޮތުގައި އޮތް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ލިބެމުންދިޔަ ރައްޔިތުންގެ ތާއީދު މިހާރު ވަނީ ބޮޑުތަން ދަށްވެފައެވެ. މިކަން ވަރަށް ސާފުކޮށް ރޭގެ  އެއްވުމަށް މަދު އަދަދެއްގެ މީހުން ޙާޟިރުވުމުން އެނގުނެވެ. މިކަމުން ދައްކުވައިދެނީ ކޮރަޕްޝަނާއި، ސަރުކާރާއި ރައްޔިތުންގެ ބޭނުންތަކާ ދެމެދު ގުޅުން ކެނޑިފައިވާކަމަށް ދެކޭ ދިވެހީންގެ މެދުގައި އުފެދެމުންދާ ހިތްހަމަނުޖެހުމެވެ.

އެމްޑީޕީ ސަރުކާރުގެ ދައުރުގައި ކޮރަޕްޝަނާއި  އެތައް މައްސަލައެއް ހާމަވެފައިވެއެވެ. ދައުލަތުގެ ފައިސާ ނަހަމަ ގޮތުގައި ބޭނުންކުރުމާއި، ނިންމުންތައް ނިންމުމުގައި ހާމަކަން ކުޑަވުމާއި، އަދި ހަމަނުޖެހޭ ސިޔާސަތުތަކުގެ ސަބަބުން ރައްޔިތުންގެ އިތުބާރު ގެއްލިފައިވެއެވެ. ރައްޔިތުން މިހާރު ވަނީ ޖަވާބުދާރީވުމާއި ޙަޤީޤީ ބަދަލު ގެނައުމަށް އިތުރަށް ގޮވާލަން ފަށާފައެވެ. އަދި ހަމައެކަނި ބަހުން ދައްކާ ވާހަކަތަކާއި ނުފުދޭ ވަޢުދުތައް ބަލައިނުގަންނަ ކަމުގައި ވެސް ވަނީ ހާމަކޮށްފައެވެ.

ގިނަ ރައްޔިތުން ވޯޓުދީ  ޑރ. މުޙައްމަދު މުޢިއްޒު ރައީސްކަމަސް ގެނެސްދެއްވީ ސަބަބެއް ނެތިއެއްނޫނެވެ. ގިނަ ބަޔަކު މިހާރު ދެކޭގޮތުގައި ރައީސް މުޢިއްޒުގެ ލީޑަރޝިޕަކީ އާ ފެށުމެއްގެ އުއްމީދެކެވެ. އަދި ރައްޔިތުންގެ އުއްމީދުތަކަށް އިޖާބަދޭ، ތެދުވެރިކަމުގެ މައްޗަށް ބިނާކުރެވިފައިވާ ވެރިކަމެއްގެ ގޮތުގައިއެވެ.

އެމްޑީޕީގެ އެއްވުމަށް މަދު އަދަދެއްގެ މީހުން ޙާޟިރުވުމަކީ ރައްޔިތުން ދޭ ސާފު މެސެޖެކެވެ. އެއީ، ދިވެހިން ބޭނުންވަނީ ހަމައެކަނި ދެއްކުންތެރިކަމުގެ ބަދަލުގައި ޢަމަލީ މަސައްކަތަށް އިސްކަންދޭ ލީޑަރޝިޕަކާއެކު ކުރިއަށްދާށެވެ. ރައީސް މުޢިއްޒުގެ ކާމިޔާބީއަކީ ހަމައެކަނި ސިޔާސީ ބަދަލެއް ނޫނެވެ. އެއީ ދިވެހިރާއްޖޭގައި ޙަޤީޤީ ބަދަލަކާއި، ހާމަކަން ބޮޑު ވެރިކަމަކާއި، ތަރައްޤީއަށް ރައްޔިތުން ގޮވާލާ ގޮވާލުމެކެވެ.