ތިނަދޫ ރޭޕް ކޭސްގެ ތުހުމަތުވާ އެކަކު ހައްޔަރުކުރީ 16 އަހަރުގެ ކުއްޖަކާއެކު އޮއްވާ

ގދ. ތިނަދޫގައި ހިނގި ރޭޕްގެ މައްސަލައެއްގެ ތުހުމަތުގައި ކޯޓު އަމުރެއްގެ ދަށުން މީހަކު ހައްޔަރުކުރުމަށް ފުލުހުން ގެއަކަށް ވަންއިރު، އުމުރުން 16 އަހަރުގެ އަންހެން ކުއްޖަކާއެކު ނިދާފައި އޮއްވާ ފެނުނު މައްސަލައެއް ފުލުހުންނާއި ކަމާބެހޭ އިދާރާތައް ގުޅިގެން ތަޙުޤީޤުކުރަން ފަށައިފިއެވެ.

ފުލުހުން ކޯޓު އަމުރެއްގެ ދަށުން އެ ގެއަށް ވަދެ، ތުހުމަތުކުރެވޭ މީހާ ވަނީ އެވަގުތު ފުލުހުންގެ ބެލުމުގެ ދަށަށް ގެންގޮސްފައެވެ. އަދި އެ މީހާއާއެކު ފެނުނު 16 އަހަރުގެ އަންހެން ކުއްޖާއާ ގުޅުންހުރި އިތުރު މައްސަލައެއް ވެސް މިހާރު ދަނީ ބަލަމުންނެވެ.

މި މައްސަލައިގެ ތަޙުޤީޤަށް އެ ކުއްޖާގެ އަންނައުނާއި އެހެނިހެން ހެކިތައް ފޮރެންސިކް ތަޙުލީލުތަކަށް ނަގާފައިވާ ކަމަށް މަޢުލޫމާތު ލިބެއެވެ. މީގެ އިތުރުން، އެ ކުއްޖާގެ މައިންބަފައިން ޖެންޑާ މިނިސްޓްރީއަށް ހާޒިރުކޮށް، ފުލުހުންނާއި ޖެންޑާ ގުޅިގެން މި މައްސަލައިގެ ތަޙުޤީޤު ވަނީ ފަށާފައެވެ.

ފުލުހުން ހާމަކޮށްފައިވާ ގޮތުގައި މި މައްސަލައިގެ ތަޙުޤީޤު ކުރިއަށްދާ މިންވަރަކުން، މީޑިއާތަކަށް ހާމަކުރެވެން ހުރި މަޢުލޫމާތުތައް ހިއްސާކުރަމުން ގެންދާނެއެވެ.