ހަލާކުވެފައި އޮންނަތާ ގިނަ ދުވަސްވެފައިވަނިކޮށް އެފްއޭއެމް ޓާފް-1 މަރާމާތުކުރުމުގެ މަސައްކަތް ފަށައިފި

މާލޭގައި ފުޓުބޯޅަ ކުޅުމަށް އެންމެ ގިނައިން ބޭނުންކުރާ އެއް ދަނޑުކަމަށްވާ ފުޓުބޯޅަ އެސޯސިއޭޝަން (އެފްއޭއެމް) ޓާފް ގްރައުންޑް 1 ގެ ޓާފް ބަދަލުކުރުމުގެ މަސައްކަތް ރަސްމީކޮށް ފަށައިފިއެވެ. 

މި މަސައްކަތަކީ ދަނޑު ބޭނުންކުރާ ފަރާތްތަކުން ގިނަ ދުވަސްތަކެއް ވަންދެން ކުރަމުންދިޔަ ޝަކުވާތަކަށް ލިބިގެންދާ ހައްލެކެވެ. ޚާއްޞަ ގޮތެއްގައި މިއީ ފުރަތަމަ ޑިވިޝަނުގެ ކްލަބުތަކަށް ލިބިގެންދާނެ ބޮޑު ހިންހަމަ ޖެހުމެކެވެ.

މި މަޝްރޫޢުގެ ދަށުން ދަނޑުގެ ޓާފް ބަދަލުކުރުމުގެ މަސައްކަތް ހަވާލުކުރެވިފައިވަނީ ދައުލަތުގެ ކުންފުންޏެއް ކަމަށްވާ ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)އާއެވެ. މި މަސައްކަތް 20 ދުވަހުގެ ތެރޭގައި ނިންމުމަށް ރާވާފައިވާއިރު، މި މަޝްރޫޢަށް ބޭނުންވާނެ ޓާފާއި އެހެނިހެން ތަކެތި ފޯރުކޮށްދީފައިވަނީ ޒުވާނުން ބާރުވެރިކުރުވުމާ ކުޅިވަރާ ހަށިހެޔޮކަމާބެހޭ ވުޒާރާއިންނެވެ.

އެފްއޭއެމް ޓާފް ގްރައުންޑް 1 ގެ ޓާފްގެ މައްސަލައަކީ ޒަމާންވީ މައްސަލައެކެވެ. ދަނޑުގެ ޓާފް ހަލާކުވެފައި ހުރިކަމަށް ގިނަ ދުވަސްތަކެއް ވަންދެން ކުޅުންތެރިންނާއި ކުލަބުތަކުން ޝަކުވާ ކުރަމުން އައި ނަމަވެސް، މިކަމަށް މީގެ ކުރިން ހައްލެއް ލިބިފައިނެތުމަކީ ދަނޑު ބޭނުންކުރަމުންދާ ފަރާތްތަކުގެ ބޮޑު ކަންބޮޑުވުމަކަށް ވެފައިވާ ކަމެކެވެ. އެންމެ ފަހުން މި ދަނޑުގެ ޓާފް ބަދަލުކޮށްފައިވަނީ މީގެ 12 އަހަރުކުރިން 2014 ވަނަ އަހަރުއެވެ.

ޒަމާންވީ މިމައްސަލައަށް ހައްލެއް ނުލިބި ދިގުލާ ދިއުމާ ގުޅިގެން ދަނޑު ބޭނުންކުރާ ފަރާތްތަކަށް ގިނަގުނަ އުނދަގޫތަކާ ވަނީ ކުރިމަތިލާންޖެހިފައެވެ. ދަނޑުގެ ހާލަތު ދަށްވުމުގެ ސަބަބުން ކުޅުންތެރިންނަށް އަނިޔާވުމުގެ ފުރުސަތު ބޮޑުވެ، ކުޅުމުގެ ފެންވަރަށް ވެސް ނޭދެވޭ އަސަރުތަކެއް ކޮށްފައިވާ ކަމަށް ގިނަ ބަޔަކު ވަނީ ފާހަގަކޮށްފައެވެ. އެހެންކަމުން އަލަށް މިފެށުނު މަޝްރޫޢުވެގެންދާނީ ދަނޑު ބޭނުންކުރާ ފަރާތްތަކުގެ ޒަމާންވީ ޝަކުވާތަކަކަށް ލިބިގެންދާނެ ހައްލަކަށް ކަމަށް ބެލެވެއެވެ.