ގއ. ވިލިނގިލީގައި ސްޓެލްކޯގެ ޚިދުމަތްތައް ރަސްމީކޮށް ފަށައިފި

ގއ. ވިލިނގިލީގައި ސްޓެލްކޯއިން ކަރަންޓާއި ފެނާއި، ނަރުދަމާގެ ޚިދުމަތް ރަސްމީކޮށް ފެށުމުގެ ގޮތުން ޚާއްޞަ ދިދަ ނެގުމުގެ ރަސްމިއްޔާތެއް އެ ރަށުގައި ބާއްވައިފިއެވެ.

 އިއްޔެ އޮތް މި ރަސްމިއްޔާތުގައި ޤައުމީ ދިދަ ނަންގަވައިދެއްވީ ސްޓެލްކޯގެ ޗީފް ޓެކްނިކަލް އޮފިސަރ އަހުމަދު އިގްބާލްއެވެ. އަދި ސްޓެލްކޯގެ ދިދަ ނަންގަވައިދެއްވީ އެ ކުންފުނީގެ ޗީފް ފައިނޭންޝަލް އޮފިސަރ ފާތިމަތު ލީނާއެވެ.

ދިދަ ނެގުމުގެ ރަސްމިއްޔާތަށްފަހު ވާހަކަފުޅު ދައްކަވަމުން ސްޓެލްކޯގެ ޑެޕިއުޓީ މެނޭޖިންގ ޑިރެކްޓަރ ޢަބްދުﷲ ނާޡިރު ވިދާޅުވީ، ވިލިނގިއްޔަށް ދެވަނަ ފަހަރަށް ޚިދުމަތް ދިނުމުގެ ފުރުޞަތު ސްޓެލްކޯއަށް ލިބިގެންދިޔުމަކީ ވަރަށް ބޮޑު އުފަލެއް ކަމަށެވެ. އަދި އެއް އަޒުމެއްގައި ރައްޔިތުންނަށް ޚިދުމަތް ކުރުމުގައި ދެމިތިބުމަށް ވެސް އޭނާ އެދިވަޑައިގެންނެވިއެވެ.

ގއ. ވިލިނގިލީގައި ސްޓެލްކޯއިން ކަރަންޓާއި ފެނާއި، ނަރުދަމާގެ ޚިދުމަތް ރަސްމީކޮށް ފެށުމުގެ ގޮތުން، މިއަދު އެ ރަށުގައި ޚާއްޞަ ދިދަ ނެގުމުގެ ރަސްމިއްޔާތެއް ވަނީ ބާއްވާފައި. މި ރަސްމިއްޔާތުގައި ޤައުމީ ދިދަ ނަންގަވައިދެއްވީ ޗީފް ޓެކްނިކަލް އޮފިސަރ އަހުމަދު އިގްބާލް. އަދި ސްޓެލްކޯގެ ދިދަ ނަންގަވައިދެއްވީ ޗީފް ފައިނޭންޝަލް އޮފިސަރ ފާތިމަތު ލީނާ. ދިދަ ނެގުމުގެ ރަސްމިއްޔާތަށްފަހު ވާހަކަފުޅު ދައްކަވަމުން، ޑެޕިއުޓީ މެނޭޖިންގ ޑިރެކްޓަރ ޢަބްދުﷲ ނާޡިރު ވިދާޅުވީ، ވިލިނގިއްޔަށް ދެވަނަ ފަހަރަށް ހިދުމަތްދޭން ސްޓެލްކޯއަށް ލިބުމަކީ ވަރަށް އުފާ ކުރާ ކަމެއް ކަމަށާއި، އެއް އަޒުމެއްގައި ރައްޔިތުންނަށް ހިދުމަތް ކުރުމުގައި ދެމިތިބުމަށް އެދިވަޑައިގަންނަވާ ކަމަށް.

— STELCO (@STELCOMALDIVES) October 27, 2026

ސަރުކާރު ހިންގުން ޚަރަދު ކުޑަކޮށް ހަރުދަނާ ނިޒާމެއްގެ ދަށުން ކަރަންޓާއި ފެނާއި، ނަރުދަމާގެ ޚިދުމަތްތައް ދިނުމަށް ފެނަކަ އުވާލާ ސްޓެލްކޯގެ ދަށަށް ޚިދުމަތްތައް ބަދަލު ކުރުމަށް ސަރުކާރުން ވަނީ ނިންމަވާފައެވެ.

އެގޮތުން، މި މަސައްކަތުގެ ދަށުން ސްޓެލްކޯއިން ދަނީ، ފެނަކައިގެ ދަށުން ކަރަންޓު ހިމެނޭހެން އަސާސީ ޚިދުމަތްތައް ދެމުން އައި ރަށްތަކުގެ އޮޕަރޭޝަންތަކާއި ރަސްމީކޮށް ހަވާލުވަމުންނެވެ. އެކުންފުނިން މިހާރު ވަނީ، ރާއްޖޭގެ އުތުރުން ހއ.އަތޮޅުގެ ރަށްތަކުގެ ޚިދުމަތްތަކާއި ހަވާލުވެފައެވެ. އަދި ރާއްޖޭގެ ދެކުނުން އައްޑޫ ސިޓީއާއި، ފުވައްމުލަކު ސިޓީގެ ކަރަންޓު ޚިދުމަތާއި ވެސް އެކުންފުނިން ވަނީ ރަސްމީކޮށް ހަވާލުވެފައެވެ.