ކޮންމެ އަތޮޅެއްގައި ޕިކްނިކް އައިލެންޑެއް ތަރައްގީކުރުމަށް އަންނަ އަހަރުގެ ބަޖެޓުގައި ހިމަނައިފި

ދިވެހިރާއްޖޭގެ ކޮންމެ އަތޮޅެއްގައި ދަތުރުގޮސް ހިތްހަމަޖައްސާލެވޭނެ ފަދަ ޕިކްނިކް ރަށެއް ތަރައްގީކުރުމަށާއި، ތިމާވެށި ހިމާޔަތްކުރުމުގެ މުހިންމު މަޝްރޫއުތަކެއް ހިންގުމަށް އަންނަ އަހަރަށް ލަފާކުރާ ދައުލަތުގެ ބަޖެޓުގައި ހިމަނައިފިއެވެ.

މިއަދު ރައްޔިތުންގެ މަޖިލީހަށް އަންނަ އަހަރަށް ލަފާކުރާ 59 ބިލިއަން ރުފިޔާގެ ބަޖެޓު ހުށަހަޅުއްވައިދެއްވަމުން މާލީ ވަޒީރު ހަސަން ޒަރީރު ވިދާޅުވީ، ރައްޔިތުންގެ މެދުގައި އިޖުތިމާއީ ގުޅުން ބަދަހިކޮށް، ދުޅަހެޔޮ މުޖުތަމައެއް ގާއިމުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ހާއްސަ އިސްކަމެއް ދެއްވާ ކަމެއް ކަމަށެވެ. އެގޮތުން، އާއިލާތަކާއި ރަހުމަތްތެރިން އެކުގައި އުފާވެރި ވަގުތުތަކެއް ހޭދަކޮށްލުމުގެ ފުރުސަތު ފަހިކޮށްދިނުމަށްޓަކައި، ކޮންމެ އަތޮޅެއްގައިވެސް ޕިކްނިކް ދާނެ ވަކި ރަށެއް ތަރައްގީކުރުމުގެ އަމަލީ މަސައްކަތްތައް ބަޖެޓުގައި ހިމަނައިގެން ކުރިއަށްގެންދިއުމަށް ވަނީ ކަނޑައަޅާފައެވެ.

މީގެއިތުރުން، ރާއްޖޭގެ އިގްތިސާދު ސިންދަފާތު ކުރުމަށާއި، ދެމެހެއްޓެނިވި ގައުމީ ތަރައްގީއެއް ހާސިލުކުރުމަށްޓަކައި މޫސުމަށް އަންނަ ބަދަލުތަކުން އަރައިގަތުމަށް ވަރަށް ބޮޑު ސަމާލުކަމެއް ދީފައިވާ ކަމަށް ވަޒީރު ފާހަގަކުރެއްވިއެވެ. އެގޮތުން، ތިމާވެށި ރައްކާތެރިކުރުމާއި ރަށްރަށުގެ ދެމެހެއްޓެނިވި ތަރައްގީ ކަށަވަރުކުރުމަށް ހިންގޭ "ކްލައިމެޓް އެޑެޕްޓޭޝަން މޮޑެލް އައިލެންޑް ޕްރޮޖެކްޓް" ފަދަ މުހިންމު މަޝްރޫއުތަކަށް އަންނަ އަހަރުގެ ބަޖެޓުން ބޮޑު ހޭދައެއް ކުރުމަށް ވަނީ ނިންމާފައެވެ.

ސަރުކާރުން ހާމަކުރި ގޮތުގައި، މަޖިލީހަށް މިއަދު ހުށަހެޅުނު މި ބަޖެޓަކީ ދިވެހި ރައްޔިތުންގެ އިޖުތިމާއީ ފާގަތިކަމާއި، ނާޒުކު ތިމާވެށީގެ ދެމެހެއްޓެނިވި ރައްކާތެރިކަން ކަށަވަރުކުރުމަށް އަމާޒުހިފައިގެން އެކުލަވާލާފައިވާ އުންމީދީ ބަޖެޓެކެވެ.