އިސްރާއީލުން ޣައްޒާގެ މެޑިކަލް ކޮމްޕްލެކްސަކަށް ހަމަލާދީ އިތުރު 9 މީހުން ޝަހީދުކޮށްލައިފި

އިސްރާއީލުން ޣައްޒާގެ އެކި ސަރަޙައްދުތަކަށް ދިން ވައިގެ ހަމަލާތަކެއްގައި ފަލަސްތީނުގެ 9 މީހުން ޝަހީދުވެއްޖެއެވެ. މި ހަމަލާތައް ދީފައި ވަނީ ޣައްޒާއަށް ބޯކޮށް ވާރޭވެހި ފެންބޮޑުވުމުގެ ސަބަބުން ހާލުގައި ޖެހިފައިވާ އެތައް ލައްކަ ރައްޔިތުންނަށް ފެން ނުވަންނަ ފަދަ ޓެންޓު ފޯރުކޮށްދިނުމަށް އދ. އިން ކުއްލި އެހީއަށް އެދިފައިވާ ދަނޑިވަޅެއްގައެވެ.

ޣައްޒާގެ ސިވިލް ޑިފެންސްގެ ތަރުޖަމާނު މަޙްމޫދު ބަސަލް ވިދާޅުވި ގޮތުގައި، ބުރާސްފަތި ދުވަހުގެ ފަތިހުގެ ވަގުތެއްގައި ޣައްޒާގެ ދެކުނުގައިވާ ޚާން ޔޫނިސްގެ ހުޅަނގު ފަރާތުގައި ހުންނަ ނާސިރު މެޑިކަލް ކޮމްޕްލެކްސަށް އިސްރާއީލުން ދިން ވައިގެ ހަމަލާއެއްގައި 4 މީހުން ވަނީ ޝަހީދުވެފައެވެ. މީގެ އިތުރުން ބުދަ ދުވަހު ޣައްޒާ ސިޓީގެ ދެކުނުން އަލް-ސަބްރާ އަވަށަށް ދިން ހަމަލާއެއްގައި އުމުރުން 38 އަހަރުގެ މުޙައްމަދު ސާލިމް އަލް-ދާޝް ޝަހީދުވެފައިވާއިރު، މެދުތެރޭ ޣައްޒާގެ އަލް-ބުރައިޖް ކޭމްޕުގެ އިރުމަތީ ފަރާތުން ފަލަސްތީނުގެ މީހެއްގެ ގަޔަށް އިސްރާއީލު ސިފައިން ބަޑިޖަހައި ވަނީ މަރާލާފައެވެ. އަދި ޣައްޒާ ސިޓީގެ ހުޅަނގު އުތުރުން އަލް-ނަސްރު އަވަށަށް ޑްރޯން ހަމަލާއެއް ދީ އިތުރު މީހަކު ޝަހީދުކޮށްލާފައިވާއިރު، ޝެއިޚް ރަޟްވާން އަވަށުގައި ގެދޮރު ގެއްލިފައިވާ މީހުން ދިރިއުޅެމުންދިޔަ ޓެންޓަކަށް ދިން ހަމަލާގައި 2 މީހުން ޝަހީދުވެ، އިތުރު ބަޔަކު ވަނީ ޒަޚަމްވެފައެވެ.

ހަމަލާތަކުގެ ތަފްސީލު ހާމަކުރަމުން އަލްޖަޒީރާގެ ރިޕޯޓަރު ހިންދު ޚުދަރީ ފާހަގަކުރި ގޮތުގައި، އިސްރާއީލުން ދެމުންދަނީ އާންމުންނަށް އަމާޒުކޮށް ވަކި ބެލުމެއްނެތި ދޭ އަނިޔާވެރި ހަމަލާތަކެކެވެ. އެގޮތުން ފެން ތާނގީއަކަށް ފެން އަޅަން ހުރި މީހަކަށް ޑްރޯން ހަމަލާއެއް އަމާޒުވެ ފުރާނަ ގެއްލިފައިވާއިރު، އަލް-ޖަލާ މަގުގައި ހުރި ޓެންޓެއްގެ ތެރޭގައި ތިބި އަލް-އަބްސީ އާއިލާގެ ދެބެއިން ވެސް ވަނީ މަރާލާފައެވެ. މި ހަމަލާތަކުން ސާފުވަނީ ޣައްޒާގެ އެއްވެސް ތަނަކީ ރައްކާތެރި ތަނެއް ނޫން ކަމަށް އޭނާ ބުންޏެވެ.

ފެންބޮޑުވުމުގެ ކާރިސާއާއި ޓެންޓުގެ ދަތިކަން

ހަމަލާތައް ވަރުގަދަވެފައި މިވަނީ ފާއިތުވި ބަންދު ދުވަސްވަރު ވެހުނު ބޯ ވާރޭގެ ސަބަބުން މަދުވެގެން 70,000 ޓެންޓުގައި ފެންބޮޑުވެ، އިތުރު ޓެންޓު ފޯރުކޮށްދިނުމަށް އދ. އިން ގޮވާލާފައިވާ ދަނޑިވަޅެއްގައެވެ. ޔުނިސެފުން ހާމަކުރި ގޮތުގައި މި ފަހުން ވެހުނު ވިއްސާރައިގެ އަސަރު ސީދާ ގޮތުން 106,000 އަށް ވުރެ ގިނަ މީހުންނަށް ވަނީ ކޮށްފައެވެ. އެތައް ހާސް ޓެންޓުތަކެއް ފެނުގެ އަޑީގައި އޮތްއިރު، ފާޚާނާތައް ފުރިގެން ބަންޑުންވެ ކޭމްޕުތަކަށް ވަނީ ނަޖިސް ފެތުރިފައެވެ.

އިސްރާއީލުން ޒަރޫރީ އެހީ އެތެރެކުރުމަށް ހުރަސްއަޅަމުންދާތީ މި ކާރިސާއާ ކުރިމަތިލާނެ ވަސީލަތްތައް ނެތް ކަމަށް ޖަމިއްޔާތަކުން ބުނެއެވެ. އދ. ގެ ތަރުޖަމާނުގެ ނައިބު ފަރްހާން ޙައްޤު ވިދާޅުވީ، ޓެންޓުތައް އެތެރެކުރުމަށް ފަންޑުގެ އިތުރުން އިސްރާއީލުގެ ކަމާބެހޭ ފަރާތްތަކުގެ ހުއްދަ ބޭނުންވާ ކަމަށެވެ. މީގެ އިތުރުން އދ. ގެ އިންސާނީ އެހީއާ ބެހޭ އިސްވެރިޔާ ޓޮމް ފްލެޗަރ ވިދާޅުވީ ފިނި މޫސުމުގެ އެހީ ފޯރުކޮށްދިނުމަށް އިސްރާއީލުގެ އައު ސަރުކާރެއް އެކުލަވާލަންދެން މަޑުކުރަން ޖެހޭނެ ކަމަށް ބައެއް ގައުމުތަކުން ބުނަމުންދާ ކަމަށާއި، އެއީ ބަލައިގަނެވޭނެ އުޒުރެއް ނޫން ކަމަށެވެ.

މި ކާރިސާއާ ގުޅިގެން އިޓަލީގެ ޚާރިޖީ ވަޒީރު އެންޓޯނިއޯ ތަޔާނީ ވަނީ، ޣައްޒާއަށް ކުއްލި އެހީގެ ގޮތުގައި 5 މިލިއަން ޔޫރޯ (5.5 މިލިއަން ޑޮލަރު) ފޯރުކޮށްދިނުމަށް އިޓަލީން ނިންމާފައިވާކަން ހާމަކުރައްވާފައެވެ.

ފަލަސްތީނުގެ ވަފާ ނިއުސް އެޖެންސީއަށް ސިއްހީ އޮފިޝަލުން މައުލޫމާތު ދެއްވި ގޮތުގައި، 7 އޮކްޓޫބަރު 2023 އިން ފެށިގެން އިސްރާއީލުން ހިންގަމުންދާ ނަސްލުހައްތާލުމުގެ ހަނގުރާމައިގައި ޝަހީދުވި އާންމުންގެ އަދަދު މިހާރު ވަނީ 74,653 އަށް އަރާފައެވެ. އަދި ޒަޚަމްވި މީހުންގެ އަދަދު 176,007 އަށް އަރައެވެ. މީގެ ތެރެއިން 11 އޮކްޓޫބަރު 2025 ގައި ހަމަލާ ބަދަލުކުރުން ހުއްޓާލުމަށް ވީ އެއްބަސްވުމަށް އަމަލުކުރަން ފެށި ފަހުން ވެސް އިސްރާއީލުން ވަނީ 1,622 މީހުން ޝަހީދުކޮށް، 5,878 މީހުން ޒަޚަމްކޮށްލާފައެވެ.