ހަކުރުބައްޔާ ދެކޮޅަށް ކުރެވޭ ކޮންމެ މަސައްކަތަކީ އަގުހުރި މަސައްކަތެއް: މެޑަމް ސާޖިދާ

ހަކުރުބައްޔާ ދެކޮޅަށް ފަރުދީ ގޮތުންނާއި، ޖަމާޢަތުގެ ފެންވަރުގައި ކުރެވޭ ކޮންމެ މަސައްކަތަކީ ވެސް އަގުހުރި މަސައްކަތެއް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

ދުނިޔޭގެ ހަކުރުބަލީގެ ދުވަހާ ގުޅިގެން އެކްސްގައި ކުރެއްވި ޕޯސްޓެއްގައި މެޑަމް ސާޖިދާ ވިދާޅުވީ، ގިނަ ބަޔަކަށް ހަކުރުބައްޔާއެކު ދިރިއުޅުމަކީ، ކޮންމެ ދުވަހެއްގެ އާދަތައް ވަކި އިންތިޒާމެއްގެ ދަށުން ބެލެހެއްޓުމާއި، ޞިއްޙަތަށް ފައިދާހުރި ގޮތްތައް ޚިޔާރުކުރުމާއި، މުޅި ޢުމުރަށް ދެމިގެންދާ ފަރުވާއަކަށް ސަމާލުކަން ދިނުން ކަމަށެވެ. އަދި ބައެއް ފަރާތްތަކަށް މިއީ ފުރާނައަށް ނުރައްކާވާ ފަދަ ސީރިއަސް ޙާލަތްތަކާ ކުރިމަތިލާންޖެހޭ ކަމެއްކަން ވެސް އެކަމަނާ ފާހަގަކުރެއްވިއެވެ.

އެހެންކަމުން، ދުނިޔޭގެ ހަކުރުބަލީގެ ދުވަހުގައި މިފަދަ ތަފާތު ތަޖުރިބާތައް ބަލައިގަނެ، ފުރާނަ ސަލާމަތްކުރުމަށާއި ތަހައްމަލުކުރަންޖެހޭ ވޭން ކުޑަކުރުމަށްޓަކައި އަވަހަށް ފިޔަވަޅު އެޅުމަކީ ނުހަނު މުހިންމު ކަމެއްކަން އެކަމަނާ ފާހަގަކުރެއްވިއެވެ.

އެގޮތުން ބައްޔަށް ފަރުވާ ހޯދަމުންދާ ޢާއިލާގެ މެންބަރަކަށް ނުވަތަ ގާތް ފަރާތަކަށް އެހީތެރިކަން ދިނުމާއި، ގަވާއިދުން ޓެސްޓުތައް ހެދުމަށް ބާރުއެޅުމާއި، އެންމެން ގުޅިގެން ދުޅަހެޔޮ ދިރިއުޅުމުގެ އާދަތައް އިޚްތިޔާރުކުރުން ފަދަ ކަންކަމަކީ މި ބައްޔާ ދެކޮޅަށް ކުރެވޭ މުހިންމު މަސައްކަތްތަކެއްކަން އެކަމަނާ ފާހަގަކުރެއްވިއެވެ.

For many, living with diabetes means managing daily routines, making healthier choices and staying committed to lifelong care. For others, it can mean facing serious complications, at times life threatening. On World Diabetes Day, we recognise these different experiences and the importance of early action in protecting lives and minimising suffering. Whether it is supporting a loved one through treatment, encouraging regular screenings or making healthier choices together, every effort matters. Let us build a Maldives where diabetes is detected early and every individual, regardless of the severity of their condition, is supported with compassion and quality care. #WorldDiabetesDay

— First Lady Sajidha Mohamed (@sajidhaamohamed) November 14, 2026

މީގެއިތުރުން، ހަކުރުބަލި ކުރީކޮޅުގައި ދެނެގަނެވޭނެ އިންތިޒާމުތައް ހަމަޖެހިފައިވާ، އަދި ބަލީގެ ނުރައްކާ އޮތް މިންވަރަކަށް ބެލުމެއްނެތި ކޮންމެ ފަރުދަކަށް ވެސް އޯގާތެރިކަމާއެކު ފެންވަރު ރަނގަޅު ފަރުވާ ލިބޭނެ ފަދަ ރާއްޖެއެއް ބިނާކުރުމަށް އެންމެން އެކުގައި މަސައްކަތްކުރުމަށް ރައީސުލްޖުމްހޫރިއްޔާގެ އަނބިކަނބަލުން ވަނީ ގޮވާލައްވާފައެވެ.