ކޮލަމް
ވިޔަފާރިއާއި އިސްތިޢުމާރުގެ ތެރެއިން އުފަންވި ކަޅުސައި
ވިޔަފާރިއާއި އިސްތިޢުމާރުގެ ތެރެއިން އުފަންވި ކަޅުސައި
ދުނިޔޭގެ އެކި ކަންކޮޅުތަކުގައި އެތައް މިލިއަން ބައެއްގެ ދުވަސް ފެށެނީ ހޫނު ކަޅުސައި ތައްޓަކުންނެވެ. ނަމަވެސް މިއަދު އަޅުގަނޑުމެން ބޯ މި މަގުބޫލު ބުއިމަކީ އެތައް ހާސް އަހަރެއްގެ ދިގު ތާރީޚަކާއި، ސަގާފީ އަދި އިޤްތިޞާދީ ގޮތުން ބޮޑެތި ބަދަލުތަކެއް ކަނޑައްތުކޮށްފައިވާ އެއްޗެކެވެ. ސައިގެ އަސްލަކީ ޗައިނާ ކަމުގައި ވިޔަސް، މިއަދު ދުނިޔޭގައި އެންމެ އާންމު އެއް ވައްތަރު ކަމަށްވާ ކަޅުސައި އުފެދި، މަގުބޫލުވެގެން ދިޔައީ ތާރީޚީ ޚާއްޞަ ހާދިސާތަކަކާ ގުޅިގެންނެވެ.
ސައިގެ ފެށުން އަދި ކަޅުސައި އުފެދުން
ތާރީޚީ ރިވާޔަތްތައް ބުނާގޮތުން ސައިގެ ބޭނުން އެންމެ ފުރަތަމަ ކުރަން ފެށީ މީލާދީގެ އެތައް ސަތޭކަ އަހަރެއް ކުރިން ޗައިނާގައެވެ. އެންމެ ފުރަތަމަ ސައި ބޭނުންކުރީ ބޭހެއްގެ ގޮތުގައެވެ. އެ ދުވަސްވަރު އާންމުކޮށް ބޭނުންކުރީ ގްރީން ޓީއެވެ.
ކަޅުސައި އުފެދިގެން އައީ ޗައިނާގެ މިންގް ދަރިކޮޅުގެ ވެރިކަމުގެ ދުވަސްވަރު (1368–1644)، ވޫޔީ ފަރުބަދަތަކުގެ ސަރަހައްދުގައެވެ. ސައިފަތް ގިނަ ދުވަހަށް ރައްކާކޮށް، ދުރު ސަރަހައްދުތަކަށް އުފުލުމަށްޓަކައި، ސައިފަތް މޯޅިކޮށް، އޮކްސިޑައިޒްކޮށް (އަލްފާޒް ކުރެވި) އަދި ދުންއަޅުވައި ހިއްކުމުގެ އުކުޅުތައް ބޭނުންކުރަން ފެށުނެވެ. މިގޮތަށް ތައްޔާރުކުރާ ސައިފަތް ކަޅުކުލައަކަށް ބަދަލުވެ، އޭގެ ރަހަ ގަދަވެގެން ދިޔައެވެ. މިއީ "ހޮންގްޗާ" ނުވަތަ ރަތް ސައިގެ ނަމުން ޗައިނާގައި މަޝްހޫރުވި، އަދި ހުޅަނގުގެ ގައުމުތަކުގައި "ބްލެކް ޓީ" (ކަޅުސައި) ގެ ނަމުން ނަންދެވުނު ސައިގެ ފެށުމެވެ.
ޔޫރަޕަށް ތަޢާރަފްވުމާއި ވިޔަފާރީގެ އިންގިލާބު
17 ވަނަ ގަރުނުގެ ކުރީކޮޅު ޑަޗް އަދި ޕޯޗުގީޒް ވިޔަފާރިވެރިންގެ ޒަރީއާއިން ސައި ޔޫރަޕަށް ތަޢާރަފްވިއެވެ. ނަމަވެސް ކަޅުސައި އެންމެ ބޮޑަށް މަގުބޫލުވެ، ދިރިއުޅުމުގެ ސަގާފަތަކަށް ބަދަލުވީ އިނގިރޭސިވިލާތުގައެވެ. ކަނޑުމަގުން ކުރާ ދިގު ދަތުރުތަކުގައި ގްރީން ޓީއަށް ވުރެ ކަޅުސައިގެ ރަހަ އަދި ތާޒާކަން ދެމެހެއްޓޭތީ، ޔޫރަޕްގެ ވިޔަފާރިވެރިން ކަޅުސައި އިޚްތިޔާރު ކުރިއެވެ.
18 އަދި 19 ވަނަ ގަރުނާ ހަމައަށް އައިއިރު، އިނގިރޭސިވިލާތުގައި ސަޔަށް އޮތް ޑިމާންޑް އިންތިހާއަށް އިތުރުވިއެވެ. ސައިގެ ވިޔަފާރިއަށް ބަރޯސާވެފައި އޮތް މިންވަރު ބޮޑުވެ، އިނގިރޭސި އީސްޓް އިންޑިއާ ކުންފުނިން ޗައިނާގެ މޮނޮޕޮލީ ނައްތާލުމަށް މަސައްކަތް ފެށިއެވެ. އޭގެ ނަތީޖާއެއްގެ ގޮތުން، އިންޑިއާގެ އާސާމް ވާދީން ފެނުނު ސައި ގަސްތަކާއި، ޗައިނާއިން ގެނެވުނު އޮށްތައް ބޭނުންކޮށްގެން އިންޑިއާ އަދި ސްރީލަންކާގައި ބޮޑެތި ސައި ދަނޑުތައް ހައްދަން ފެށުނެވެ. މި ބަދަލާއެކު ދުނިޔޭގެ އެކި ކަންކޮޅުތަކަށް ހެޔޮ އަގުގައި ކަޅުސައި ލިބެން ފެށިއެވެ.