ނަފްސާނީ ދަތިތަކާ ކުރިމަތިލާ ޒުވާނުންނަށް އެހީތެރިވާން ބިހެއް ބޮޑުއަގުގައި ވިއްކާލައިފި

ބްރިޓިޝް ބްރޯޑްކާސްޓިންގ ކޯޕަރޭޝަން (ބީބީސީ) އިން ރިޕޯޓުކޮށްފައިވާ ގޮތުގައި، ދުނިޔޭގައި މިލިއަނުން އެއް ފަހަރު ފެންނަ ވަރުގެ ފުރިހަމަ ވައްބޮޅެއްގެ ސިފައިގައި އޮތް ބިހެއް އިނގިރޭސިވިލާތުގައި ބޭއްވުނު ނީލަމެއްގައި 200 ޕައުންޑު (21،000 ރުފިޔާ) އަށް ވިއްކާލައިފިއެވެ. މި ތަފާތު ބިސް ކުރިން ގަތީ ބަރކްޝަޔަރގެ ލެމްބޯންއަށް ނިސްބަތްވާ އެޑް ޕައުނެލް އެވެ. އޭނާ މި ބިސް ގަތީ 150 ޕައުންޑު (16،000 ރުފިޔާ) އަށެވެ.

ބިސް ގަތުމަށްފަހު، ޕައުނެލް ވަނީ އެ ބިސް އިއުވެންޓާސް ފައުންޑޭޝަނަށް ހަދިޔާކޮށްފައެވެ. މިއީ އޮކްސްފޯޑްޝަޔަރގައި ޒުވާނުންނަށް ލައިފް ކޯޗިންގ، މެންޓަރިންގ އަދި ނަފްސާނީ އެހީތެރިކަން ފޯރުކޮށްދޭ ޗެރިޓީއެކެވެ. އެ ޗެރިޓީން ވަނީ އަލުން މި ބިސް ނީލަމުގައި ވިއްކާލާފައެވެ.

ފުރަތަމަ ޗެރިޓީން ހީކުރީ ޕައުނެލްގެ ހުށަހެޅުމަކީ މަޖަލެއް ކަމަށެވެ. ނަމަވެސް، ބިސް ވިއްކާލުމާ ގުޅޭ ގޮތުން ނޫސްތަކުގައި ޝާއިޢުކުރެވުނު މަޢުލޫމާތުތަކުން ޔަގީންވުމަށްފަހު، ޗެރިޓީން ނިންމީ ނީލަން ބާއްވަންށެވެ.

އަޅުގަނޑުމެން ވަރަށް އުފާވެއްޖެ އަދި ހައިރާންވެއްޖެ ބިސް ވިއްކުނީތީ. އެއީ އަޅުގަނޑުމެންނަށް މިހާރު ކުރަމުންދާ މަސައްކަތް ކުރިއަށް ގެންދެވޭނެތީ

ފައުންޑޭޝަނުގެ ރޮޒް ރެޕް ވަނީ ބުނެފައެވެ.

މި ފައިސާއިން 13 އަހަރާއި 25 އަހަރާ ދެމެދުގެ ނަފްސާނީ ދަތިތަކާ ކުރިމަތިލާ ޒުވާނުންނަށް އެހީތެރިވެދެވޭނެ. އަދި އެހީތެރިކަމަށް ބޭނުންވާ ނުވަތަ ދިގު ލިސްޓުތަކުގައި ތިބޭ އިތުރު ޒުވާނުންނާ ހަމައަށް އެހީ ވާސިލުވެވޭނެ

އޭނާ އިތުރަށް ބުންޏެވެ.

މި ބިސް އަސްލު ލިބުނީ ސްކޮޓްލެންޑްގެ އޭރ ސިޓީގައި ހުންނަ ސުޕަމާކެޓަކުން ބިސްކޭހެއް ގަތް އަންހެނަކަށެވެ. ބިސް ފުރަތަމަ ވިކުނު ނީލަންގެއިން  ތޯމަސް ރޮޑިކް ކަލަންގެ ބަހުން، މިފަދަ ވައްބުރެއްގެ ސިފައިގައި ހުންނަ ބިހެއް ފެންނަނީ "މިލިއަނުން އެއް ފަހަރު" އެވެ.