ކުޅިވަރު
ހީނުކުރާ ނަތީޖާތަކެއް ހޯދި މާފުށި ކަޓުވާލައި އައްޑޫ ސިޓީއިން ސެމީގެ ފަހު ޖާގަ ހޯދައިފި

އައްޑޫ ސިޓީގެ ފަހު ގޯލު ކާމިޔާބު ކުރުމަށްފަހު އިބްރާހިމް ވަހީދު އުފާފާޅު ކުރަނީ--- ފޮޓޯ: މިހާރު ސްޕޯޓްސް
ހުލާސާ
މާފުށި ކުއާޓާ ފައިނަލުން މުބާރާތާއި ވަކިވާން ޖެހުނުއިރު، އެ ޓީމަކީ މި މުބާރާތުގެ ސެމީއަށް ދަތުރުކޮށްފައިވާ އޭދަފުއްޓާއި އަލިފުށި ބަލިކުރެވުނު ހަމައެކަނި ޓީމު. އަދި އެ ޓީމު މޮޅުވެފައި ވަނީ ވެސް އެ ދެ މެޗުން އެކަނި.
ނައިންޓީ ޕްލަސް ގޯލްޑް ކަޕްގެ ކުއާޓާ ފައިނަލުގެ ފަހު މެޗުގައި އައްޑޫ ސިޓީ އިން މާފުށީގެ މައްޗަށް ކުރި ހޯދައި، ސެމީ ފައިނަލުގެ ފަހު ޖާގަ ކަށަވަރުކޮށްފިއެވެ. އައްޑޫ އިން މާފުށި ބަލިކުރީ 3-0 އިންނެވެ.
މާފުށި ކުއާޓާ ފައިނަލުން މުބާރާތާއި ވަކިވާން ޖެހުނުއިރު، އެ ޓީމަކީ މި މުބާރާތުގެ ސެމީއަށް ދަތުރުކޮށްފައިވާ އޭދަފުއްޓާއި އަލިފުށި ބަލިކުރެވުނު ހަމައެކަނި ޓީމެވެ. އަދި އެ ޓީމު މޮޅުވެފައި ވަނީ ވެސް އެ ދެ މެޗުން އެކަންޏެވެ.
މާފުށިން އަލިފުށި ބަލިކުރީ ފުރަތަމަ ބުރުގެ ފަހު މެޗުގައި 1-0 އިންނެވެ. އެއީ މާފުށިން ދެވަނަ ބުރު ޔަގީންކުރި މެޗެވެ.
އެ ޓީމުން އޭދަފުށި ބަލިކުރީ ދެވަނަ ބުރުގެ ފުރަތަމަ މެޗުގައި 2-0 އިންނެވެ. އެ މެޗުގައި އޭދަފުށީގެ ކީޕަރު ކުރި ނުރައްކާތެރި ފައުލަކަށް އޭނާއަށް ރަތް ކާޑު ދައްކާފައިވާއިރު، މުބާރާތުގެ ޑިސިޕްލިނަރީ ކޮމެޓީން ވަނީ އޭނާ އެއް އަހަރަށް ސަސްޕެންޑު ކުރުމަށް ވެސް ފަހުން ނިންމާފައެވެ.
ކުއާޓާ ފައިނަލުގެ ފަހު މެޗުގައި އައްޑޫ އިން މާފުށި ކޮޅަށް ޖެހި ތިން ގޯލު ވެސް ކާމިޔާބު ކޮށްފައިވަނީ މެޗުގެ ދެވަނަ ހާފުގައެވެ. އެ ޓީމަށް ފުރަތަމަ ގޯލު ކާމިޔާބު ކޮށްދިނީ، ޕެނަލްޓީ އޭރިޔާ ބޭރުން ލިބުނު ހިލޭ ޖެހުމަކުން އިސްމާއީލް އީސާ (މެސީ)އެވެ. އެ ބޯޅަ މަތަކުރާނެ ފުރުސަތެއް މާފުށި ގޯލްކީޕަރަށް ނެތް އިރު، އޭނާގެ ހިލޭ ޖެހުން އަމާޒުވީ ގޯލުގެ މަތީ ކަނަށެވެ.
އައްޑޫ ސިޓީއިން އެ ޓީމުގެ ލީޑު ފުޅާކުރީ ކޯނަރަކުން ތަނަވަސްވި ފުރުސަތެއްގައެވެ. އެ ގޯލު ކާމިޔާބުކުރީ މުހައްމަދު ހާޒިމް ރިއްފަތުއެވެ.
އައްޑޫ ސިޓީއިން އެ ޓީމުގެ ފަހު ގޯލު ކާމިޔާބުކުރީ މެޗުގެ އިތުރު ވަގުތުގައެވެ. އިބްރާހިމް މަހުދީ ހުސެއިން (ފޭދޫ އިއްބެ) ތަނަވަސްކޮށްދިން ފުރުސަތަކުން މި ގޯލު ކާމިޔާބުކުރީ އިބްރާހިމް ވަހީދު ހަސަން (އިއްބެ) އެވެ.
ގޯލެއް ކާމިޔާބު ނުކުރެވުނު ނަމަވެސް، މާފުށިން މި މެޗުގައި ރަގަޅު ހަމަލާތަކެއް އުފައްދާފައިވެއެވެ. އެ ހަމަލާތައް ދިފާއު ކުރުމުގައި އައްޑޫގެ ކީޕަރު ވިޝާން އަބްދުލް މަޖީދު ވަނީ މޮޅު ކުޅުމެއް ދައްކާފައެވެ.
މުބާރާތުގެ ސެމީ ފައިނަލްގައި އައްޑޫ ސިޓީއިން ނިކުންނަން ޖެހޭނީ އަލިފުއްޓާ ދެކޮޅަށެވެ. އަދި މުބާރާތުގެ އަނެއް ސެމީގައި ބައްދަލު ކުރާނީ އޭދަފުއްޓާއި މާލޭ ސިޓީއެވެ.