ކުޅިވަރު
ޔުނައިޓެޑު ބަލިކުރުމަށްފަހު އިނގިރޭސި ލީގު ކަޕްގެ ސެމީގެ ފަހު ޖާގަ ސްޕާސްއަށް

ސްޕާސްގެ ހަތަރުވަނަ ގޮލު ޖެހުމަށްފަހު އެ ޓީމުގެ ކުޅުންތެރިން އުފާފާޅު ކުރަނީ--- ފޮޓޯ: ގެޓީ އިމޭޖަސް
ހުލާސާ
ސެމީގައި ސްޕާސް ބައްދަލު ކުރަން ޖެހޭނީ ލިވަޕޫލްއާ, އަދި ދެވަނަ ސެމީގައި ކުޅޭނީ އާސެނަލް އާއި ނިއުކާސްލް ޔުނައިޓެޑު.
އިނގިރޭސި ލީގު ކަޕް ނުވަތަ ކަރަބޯ ކަޕްގެ ސެމީ ފައިނަލުގެ ފަހު ޖާގަ ޓޮޓެންހަމް ހޮޓްސްޕާއިން ހޯދައިފިއެވެ. ތައްޓެއް ނުލިބި 16 އަހަރު ހޭދަވެފައިވާ ސްޕާސްއިން މި ޖާގަ ހޯދީ، ބުރާސްފަތި ދުވަހުގެރޭ ޓޮޓެންހަމް ހޮޓްސްޕާ ސްޓޭޑިއަމްގައި މެންޗެސްޓަރ ޔުނައިޓެޑު 4-3 އިން ބަލިކުރުމަށްފަހުއެވެ.
މި މެޗުގެ ފުރަތަމަ ހާފު ސްޕާސްއިން އެއް ގޯލު ކުރީގައި އޮވެގެން ނިންމާލިއިރު، މެޗުގެ އެއް ގަޑިއިރު ކުޅެވުނު އިރު ސްޕާސްއިން އޮތީ ތިން ގޯލުގެ ލީޑެއް ނަގާފައެވެ.
މެޗުގެ 15 ވަނަ މިނެޓުގައި އެ ޓީމަށް ލީޑު ނަގައިދިނީ ޑޮމިނިކް ސޮލަންކީ ކާމިޔާބުކުރި ގޯލަކުންނެވެ. ޔުނައިޓެޑުގެ ޕެނަލްޓީ އޭރިއާގެ ބޭރުން ސްޕާސްގެ ޕެޑްރޯ ޕޯރޯ ތިރިތިރިން ފޮނުވާލި ބާރު ޝޮޓު ކީޕަރަށް ބައުންސްކޮށްލެވުނީ ގޯލު އޭރިޔާގެ ލައިން ކައިރީގައި، އެފަދަ ފުރުސަތަކަށް އަބަދުވެސް ބަލަބަލާ ހުންނަ ސޮލަންކީއަށެވެ. ސޮލަންކީ އެ ބޯޅަ ފޮނުވާލީ ކައިރި ކަނަށެވެ.
މި ހަމަލާގެ އިތުރުން ވެސް، ފުރަތަމަ ހާފުގައި ސްޕާސްގެ ކްލުސެވްސްކީ ވަނީ ޔުނައިޓެޑުގެ ގޯލަށް ނުރައްކާތެރި ހަމަލާއެއް ފޮނުވާލާފައެވެ. އަނެއްކޮޅުން، ނަތީޖާ ބަދަލު ކުރެވޭނެ ވަރުގެ ހަމަލާއެއް ފުރަތަމަ ހާފުގައި ޔުނައިޓެޑަށް ސްޕާސްގެ ގޯލަށް ފޮނުވާލެވިފައެއް ނުވެއެވެ. އަދި މި ހާފުގައި ޔުނައިޓެޑުގެ ޑިފެންޑަރު، ވިކްޓަރ ލިންޑެލޮފްއަށް ލިބުނު އަނިޔާއަކާ ގުޅިގެން، އޭނާގެ ބަދަލުގައި ވަނީ ޖޮނީ އިވަންސް ކުޅެން ނެރެފައެވެ.
ސްޕާސްއިން އެ ޓީމުގެ ލީޑު ފުޅާ ކުރީ ދެވަނަ ހާފުގެ ދެވަނަ މިނެޓުގައެވެ. އެ ޓީމުގެ ވާތްފަޅިން ޔުނައިޓެޑުގެ ގޯލު ކުރިމައްޗަށް ހުރަސް ކުރި ބޯޅައެއް ސާފުކޮށްލަން އުޅުމުގެ ތެރޭގައި، ލިސަންޑްރޯ މާޓިނޭޒްއަށް ޖައްސާލެވުނީ ކުލުސެވްސްކީއަށް ގޯލަށް ޖަހާލުމަށް ފަސޭހަ ހިސާބަކަށެވެ. އަދި ހަމަޖެހިލާފައި އޭނާ ވަނީ ގޯލު އޭރިއާގެ ބޭރުގައި ހުރެފައި ގޯލުގެ ތެރެއަށް ބޯޅަ ފޮނުވާލާފައެވެ.
އޭގެ 8 މިނެޓު ފަހުން ސްޕާސްއިން އެ ޓީމުގެ ތިން ވަނަ ގޯލު ކާމިޔާބު ކުރިއެވެ. މި ގޯލު ކާމިޔާބުކުރީ ފުރަތަމަ ގޯލު ވެސް ކާމިޔާބުކުރި ސޮލަންކީއެވެ. އޭނާ ބޯޅަ ހިފައިގެން ގޯލުގެ ކަނާތް ފަރާތުން ޔުނައިޓެޑުގެ ޕެނަލްޓީ އޭރިއާ ތެރެއަށް ވަނުމަށްފަހު، އެ ބޯޅަ ގޯލަށް ފޮނުވާލީ މާޓިނޭޒް އަދި އީވަންސް ކައިރިން ނައްޓާލުމަށްފަހުއެވެ.
ސްޕާސްގެ ތިން ވަނަ ގޯލާއެކު، ޔުނައިޓެޑުން އެ ޓީމުގެ ރޭވުން ބަދަލުކޮށްލިއެވެ. އެގޮތުން، އަމަދު ޑިއާލޯ، ޖޯޝުއާ ޒީކްޒީ އަދި ކޮބީ މައިނޫ ކުޅެން އެރުވިއެވެ.
މި ބަދަލުތައް ގެނައިތާ 6 މިނެޓުފަހުން ޔުނައިޓެޑުން ފުރަތަމަ ގޯލު ކާމިޔާބު ކުރިއެވެ. ސްޕާސްގެ ފަހަތުން ގޯލު އޭރިއާގެ ތެރެއިން ގޯލްކީޕަރު، ފްރޭޒަރ ފޯސްޓާރއަށް ކުޅެލި ބޯޅަ، އަނެއް ފަރާތުގެ ގޯލު އޭރިއާގެ ތެރޭގައި ހުރި ޑިފެންޑަރަށްށް ކުޅެލަން އުޅުމުގެ ތެރޭގައި ބްރޫނޯ ފެނާންޑޭޒް ބޯޅަ ހޯދިއެވެ. އަދި ގޯލު ކުރިމަތީގައި ހުރި ޒީކްޒީއަށް ޕާސްކޮށްލުމުން، މާ ބޮޑު ޕްރެޝަރެއް ނެތި އޭނާ ވަނީ ޔުނައިޓެޑުގެ ފުރަތަމަ ގޯލު ކާމިޔާބުކޮށްފައެވެ.
ޔުނައިޓެޑުގެ ދެވަނަ ގޯލަކީ ވެސް ސްޕާސްގެ ކީޕަރަށް ހެދުނު ގޯހެއްގެ ބޭނުން ހިފައި އެ ޓީމުން ކާމިޔާބު ކުރި ގޯލެކެވެ. ޒީކްޒީގެ ގޯލަށްފަހު ހަތް މިނެޓު ކުޅެވުނު ފަހުން، ސްޕާސްގެ ޑިފެންޑަރަކު ކީޕަރަށް ކުޅެލި ބޯޅައެއް އޭނާ ކުރިޔަށް ޖަހަން އުޅުމުން، އެ ބޯޅަ ބްލޮކް ކުރުމަށް ސްލައިޑް ކުރި ޑިއާލޯގެ ފައިގައި ޖެހުމަށްފަހު ބޯޅަ ވަނީ ގޯލަށެވެ.
އޭގެ ފަހުން ޔުނައިޓެޑުގެ ކުޅުން ރަގަޅުކޮށް ސްޕާސްގެ ގޯލަށް ނުރައްކާކުރިއެވެ. ނަމަވެސް މެޗު ނިމެން ދެ މިނެޓަށް ވެފައި ވަނިކޮސް ޔުނައިޓެޑުން ކުރަމުން ދިޔަ މަސައްކަތަށް ހުރަސްއެޅުނީ، ސްޕާސްއަށް ލިބުނު ކޯނަރަކުން އެ ޓީމުގެ ސޮން ހިއުންގ-މިން ކާމިޔާބުކުރި ރީތި ގޯލަކަށް ފަހުއެވެ. ކަނާތް ފަރާތުން ސޮން ނެގި ކޯނަރު ގޯލަށް ގޮސް ވަނީ އެއްވެސް ކުޅުންތެރިއެއްގެ ގައިގައި ނުޖެހިއެވެ.
މެޗު ނިމުމުގެ ކުރިން ޔުނައިޓެޑުން އިތުރު ގޯލެއް ކާމިޔާބު ކުރިއެވެ. އެ ޓީމަށް ލިބުނު ކޯނަރެއްގައި މި ގޯލު ކާމިޔާބުކުރީ، އީވަންސް ބޮލުން ޖަހައެވެ.
މެޗު ނިމުނުތާ ކުޑަ އިރުކޮޅެއް ފަހުން މި މުބާރާތުގެ ސެމީ ފައިނަލުގެ ގުރުއަތުލުން ވަނީ ބާއްވާފައެވެ. ގުރުއަތުލުން ނިމުނު ގޮތުން، ސެމީގައި ސްޕާސް ބައްދަލު ކުރަން ޖެހޭނީ ލިވަޕޫލްއާއެވެ. އަދި ދެވަނަ ސެމީގައި ކުޅޭނީ އާސެނަލް އާއި ނިއުކާސްލް ޔުނައިޓެޑެވެ.