ވިންޓާ ބްރޭކަށް ދިއުމުގެ ކުރިން ބެޔާންއިން މެއިންޒް މެޗުގެ ހިތި ހަނދާންތައް ފޮހެލައިފި

ޖަރުމަން ބުންޑަސްލީގާގައި ހުކުރު ދުވަހުގެރޭ ބެޔާން މިއުނިކުން ލެޕްޒިގްގެ މައްޗަށް ބޮޑު މޮޅެއް ހޯދައި، މީގެ ހަފްތާއެއް ކުރިން މެއިންޒްއާ ބައްދަލުކުރި މެޗުގައި އެ ޓީމުން ސީޒަންގެ ފުރަތަމަ ލީގު ބައްޔާއި ކުރިމަތިލައި ބަރުދާސްތުކުރަން ޖެހުނު ހިތި ހަނދާންތައް، ވިންޓާ ބްރޭކަށް ދިއުމުގެ ކުރިން ފޮހެލައިފިއެވެ.

ބެޔާންގެ އެލިއެންޒް އެރީނާގައި ކުޅުނު މި މެޗު އެ ޓީމުން ކާމިޔާބުކުރީ 5-1 އިންނެވެ.

ބެޔާންއިން މެޗުގެ ލީޑު ނެގީ ފުރަތަމަ މިނެޓުގެ ތެރޭގައެވެ. ލިޕްޒިގްގެ ފަހަތުން ސާފުކޮށްލުމަށް އުޅުނު ބޯޅައެއް ހޯދައި އެ ޓީމުން އުފެއްދި މި ހަމަލާ ގޯލުގެ ކުރިމައްޗަށް ހުރަސްކޮށްދިނީ މައިކަލް އޮލީސޭއެވެ. އަދި އެ ބޯޅަ މެޗުގެ 36 ވަނަ ސިކުންތުގައި ގޯލަށް ފޮނުވާލީ ޖަމާލް މުސިއާލާއެވެ. 

ނަމަވެސް އޭގެ މިނެޓެއް ފަހުން ލެޕްޒިގުން މެޗުގެ ނަތީޖާ ހަމަހަމަކުރިއެވެ. އެ ޓީމުގެ ކަނާތް ފަރާތުން ކުޅޭ ބެންޖަމިން ސެސްކޯ ޕެނަލްޓީ އޭރިއާގެ ކަނާހިސާބުން ތިރިތިރިން ހުރަސްކޮށްލި ބޯޅަ ގޯލަށް ފޮނުވާލީ ލިއޮސް އޮޕެންޑާއެވެ.

ބެޔާންގެ ލީޑު މިނެޓެއް ތެރޭގައި ގެއްލުނު ނަމަވެސް، އެ ޓީމުން ވަނީ ފުރަތަމަ ހާފުގައި އަލުން ލީޑު ނަގާފައެވެ. މެޗުގެ 25 ވަނަ މިނެޓުގައި އަނެއްކާ ވެސް އޮލީސޭ ދިން ޕާހަކުން ބެޔާންއަށް ލީޑު ނަގައިދިނީ، ލެޕްޒިގްގެ ޖާޒީގައި ކުރިން ކުޅުނު، ކޮންރަޑް ލެއިމަރއެވެ. އަދި، އޭގެ 11 މިނެޓުފަހުން ޖޮޝުއާ ކިމިޗް ކާމިޔާބުކުރި ގޯލާއެކު، ބެޔާންއިން މެޗުގައި ހަމަޖެހިލިއެވެ. 

އަނިޔާގައި ހުރުމަށްފަހު ކުޅެން ނިކުތް ބެޔާންގެ ފޯވާޑް، ހެރީ ކޭންއަށް މިއީ އެހާ ރަގަޅު މެޗެއް ނޫނެވެ. މެޗުތަކެއް ނުކުޅެ ގިނަ ދުވަސްތަކެއް ވެފައިވާކަން އޭނާގެ ޕާފޯމެންސް ހެކިދިނެވެ.

ބެޔާންގެ ފަހު ދެ ގޯލު ތިން މިނެޓުގެ ދުރު މިނުގައި ކާމިޔާބުކުރީ ލެރޯއީ ސާނޭ އާއި އަލްފޮންސޯ ޑޭވިސްއެވެ. އެއީ މެޗުގެ 75 ވަނަ މިނެޓާއި 78 ވަނަ މިނެޓުގައެވެ.

މި ނަތީޖާއާއެކު، ބެޔާނުން މިވަނީ މިދިޔަ ހަފްތާގައި މެއިންޒް އަތުން 2-1 އިން ބަލިވި މެޗުގެ ހަނދާންތައް ފޮހެލާ، ލީގުގެ އެއްވަނައިގައި އޮތް ލީޑު ދަމަހައްޓާފައެވެ. 

ބެޔާންގެ މެޗެއް ދެން އޮންނާނީ، ވިންޓާ ބްރޭކަށްފަހު ޖެނުއަރީ 11 ގައެވެ.