ދުނިޔެ
ޢިމްރާން ޚާންގެ 25 ސަޕޯޓަރެއް ޖަލަށްލުމަށް ޙުކުމްކޮށް ޖަލަށްލައިފި

ޢިމްެރާން ޚާން ރެލީއެއްގައި ބައިވެރިވަނީ.
ޕާކިސްޠާނުގެ ކުރީގެ ބޮޑުވަޒީރު ޢިމްރާން ޚާންގެ 25 ސަޕޯޓަރެއް ޖަލަށްލުމަށް ޙުކުމްކޮށް ޖަލަށްލައިފިއެވެ.
މި 25 މީހުން ޖަލަށް ލުމަށް ޙުކުމް ކޮށްފައިވަނީ 2023 ވަނަ އަހަރު ޢިމްރާން ޚާން ހައްޔަރުކުރުމާ ގުޅިގެން އޭނާގެ ސަޕޯޓަރުން ކުރިއަށް ގެންދިޔަ މުޒާހަރާތަކުގައި އެޤައުމުގެ ޢަސްކަރީ ތަންތަނަށް ގެއްލުންދިނުމުގެ ކުށުގައެވެ.
މިކަމާގުޅިގެން ޕާކިސްޠާނުގެ ޢަސްކަރިއްޔާގެ ޕަބްލިކް ރިލޭޝަންސް ވިންގުން ހޮނިހިރު ދުވަހު ބުނެފައިވަނީ އިމްރާން ޚާންގެ ސަޕޯޓަރުންގެ މައްޗަށް މި ޙުކުމްތައް އިއްވައިދީފައިވަނީ އެޤައުމުގެ ޢަސްކަރީ ކޯޓުން ކަމަށެވެ.
އެގޮތުން އެއްބައެއްގެ މައްޗަށް ދެ އަހަރާއި 10 އަހަރާ ދެމެދުގެ "ހަރުކަށި ޖަލު ޙުކުމެއް" އިއްވާފައިވާ ކަމަށާއި 14 މީހަކަށް ދިހަ އަހަރުގެ ޖަލު ޙުކުމެއް އިއްވާފައިވާ ކަމަށް ވަނީ ބުނެފައެވެ.
ޢަސްކަރިއްޔާގެ އެ ބަޔާނުގައި އެމީހުންގެ މައްޗަށް ތުހުމަތުކުރެވޭ ކަންކަން ބަޔާންކޮށްފައެއް ނުވެއެވެ. ނަމަވެސް 2023 ވަނަ އަހަރުގެ މެއި މަހު ހިނގި ހަމަނުޖެހުންތަކުގެ ތެރޭގައި ޢަސްކަރީ ތަންތަނަށް ވަދެ ޢަސްކަރިއްޔާގެ ޖެނެރަލެއްގެ ގެގައި އަލިފާން ރޯކޮށްލި ޢިމްރާން ޚާންގެ ސަޕޯޓަރުން ހިންގި ޢަމަލުތަކަކީ ޓެރަރިޒަމްގެ ޢަމަލުތަކެއް ކަމަށް ބުނެފައިވެ އެވެ.
ޕާކިސްޠާނުގެ ޢަސްކަރިއްޔާއިން ބުނެފައިވަނީ އެ ޙުކުމަކީ ހަރުކަށި ހަނދާންކޮށްދިނުމެއް ކަމަށާއި ދުވަހަކުވެސް ޤާނޫނުގެ ބާރުގެ ކުރިމަތީގައި އަމިއްލަ ގޮތް ނުގެންގުޅެވޭނެ ކަަން ހަނދާން ކޮށްދިނުމެއް ކަމަށެވެ.
ޕާކިސްޠާނުގެ ޢަސްކަރިއްޔާއިން ބުނެފައިވަނީ މަދުވެގެން އަށް މީހަކު މި ހަމަނުޖެހުން ތަކުގައި މަރުވެފައިވާ ކަމަށެވެ. ޢަސްކަރީ ކޯޓުން ޙުކުމް އިއްވި މީހުންގެ އިތުރުން އެހެން މީހުންގެ މައްޗަށް އެންޓި ޓެރަރިޒަމް ކޯޓުތަކުގައި ޝަރީއަތް ކުރިއަށްދާ ކަމަށެވެ.
ފުރިހަމައަށް އިންސާފު ލިބޭނީ މިކަމުގެ އަޑީގައި އަސްލު ތިބި މީހުންނަށް އަދަބު ލިބުމުން ކަމަށެވެ.
މިކަމާއި ގުޅިގެން އެމްނެސްޓީ އިންޓަނޭޝަނަލް އިން ބުނެފައިވަނީ މި ޙުކުމަކީ ބިރުދެއްކުމުގެ އުކުޅެއް ކަމަށާއި ޚިޔާލުތަފާތުވުންތައް ހުއްޓުވުމަށް ފަރުމާކޮށްފައިވާ އުކުޅެއް ކަމަށެވެ.
ޕާކިސްޠާނުގެ ކުރީގެ ބޮޑުވަޒީރު އެމަޤާމު އަދާކުރައްވައިފައިވަނީ 2018 ވަނަ އަހަރުން ފެށިގެން 2022 ވަނަ އަހަރާއި ހަމައަށެވެ. ޢިމްރާން ޚާން މަޤާމުން ދުރުކޮށްފައިވަނީ އެޤައުމުގެ ޤާނޫނު ހަދާ މަޖިލީހުން ޢިމްރާންގެ އިތުބާރުނެތް ކަމުގެ ވޯޓު ނަގައިގެނެވެ.
ޢުމުރުން 72 އަހަރުގެ ޢިމްރާން ޚާން 2023 ވަނަ އަހަރުގެ މެއި މަހު ދުވަސްތަކެއް ވަންދެން ޖަލުގައި ދުވަސްތަކެއް ހޭދަކުރިއެވެ. އޭގެފަހުން ކޯޓު އަމުރެއްގެ ދަށުން ޖަލުން މިނިވަން ވުމަށްފަހު އޭގެ ފަހުން އަނެއްކާވެސް ތިން މަސް ފަހުން އޭނާ ޖަލަށް ލައިފައިވެއެވެ.
ޢިމްރާން ޚާންގެ ޕާޓީ ކަމަށްވާ ޕާކިސްތާން ތަހްރީކް އިންސާފް (ޕީޓީއައި) ޕާޓީއަށް ސިޔާސީ ގޮތުން ބޮުޑެތި ފިއްތުންތައް ކުރިމަތިކުރަމުން އަންނަ ކަމަށް އެޕާޓީ އިން ބުނަމުންދާއިރު، އެޕާޓީގެ އެތައް ހާސް ސަޕޯޓަރުންނާއި އިސް އޮފިޝަލުން ވަނީ ހައްޔަރުކޮށްފަ އެވެ.
މި އަހަރުގެ ފެބްރުއަރީ މަހު އިންތިޚާބުގައި ވާދަކުރުން ޢިމްރާން ޚާންއަށް އެޤައުމުގެ އިންތިޚާބާއި ބެހޭ އިދާރާއިން ފުރުސަތު ނުދިން އިރު، އެކަން ކޮށްފައިވަނީ އޮޅުވާލުމާ މަކަރުން ކަމަށް ޕާކިސްޠާނުގެ މަސްރަޙުގެ ކަންކަން ދިރާސާކުރާ ފަރާތްތަކުން ދަނީ ބުނަމުންނެވެ.
މިދިޔަ މަހު ޕާކިސްޠާނުގެ ވެރިރަށް އިސްލާމްއާބާދުގައި އަނެއްކާވެސް މުޒާހަރާތަކާއި ހަމަނުޖެހުންތަކެއް ޢިމްރާން ޚާންގެ ޕީޓީއައިގެ އެތައް ހާސް ސަޕޯޓަރުންނެއް ވަނީ މަޖިލީހުގެ ދޮރުމަތީގައި ހުރި އާންމު މައިދާނެއް ހިފުމަށް މަސައްކަތްކޮށްފައިވެއެވެ. މި ހަމަނުޖެހުން ތަކުގައިވެސް އެތައް ބަޔަކު ހައްޔަރުކޮށް އެތައް ބަޔަކަށް ބޮޑެތި އަނިޔާތަކެއް ވަނީ ވެފައެވެ.