ދުނިޔެ
އިޒްރާއިލުން ފަލަސްޠީނުގެ އެއް ޢާއިލާއެއްގެ 7 ކުދިން އެއް ހަމަލާއެއްގައި ޝަހީދު ކޮށްލައިފި

އިޒްރާއިލްގެ ހަމަލާއެއްގައި ޒަޚަމްވި ތުއްތު ކުއްޖެއް.
އިޒްރާއިލުން ފަލަސްޠީނުގެ އެއް ޢާއިލާއެެއްގެ 7 ކުދިން އެއް ހަމަލާއެއްގައި ޝަހީދު ކޮށްލައިފިއެވެ.
ފަލަސްޠީނުގެ ސިވިލް ޑިފެންސް ރެސްކިޔު އެޖެންސީއާ ހަވާލާދީ އަލްޖަޒީރާގައި ބުނެފައިވަނީ އިޒްރާއީލުން ދިން ވައިގެ ހަމަލާއެއްގައި ޣައްޒާގެ އުތުރު ސަރަހައްދުގައި ހަތް ކުޑަކުދިން ހިމެނޭ ގޮތަށް އެއް ޢާއިލާއެއްގެ 12 މީހަކު ޝަހީދުވެފައިވާ ކަމަށެވެ.
ހުކުރު ދުވަހުގެ ހަވީރު އެ އިދާރާގެ ޓެލެގްރާމް ޗެނަލްގައި އާންމުކުރި ވީޑިއޯއަކުން ފެންނަ ގޮތުގައި އެ އިދާރާގެ މުވައްޒަފުން ޖަބަލިއްޔާގައި ހުންނަ ޚައްލާ ޢާއިލާގެ ގޭގެ ވެއްޓިފައިވާ ޢިމާރާތުގެ ގައުކުނޑިތަކުގެ ދަށުން ހަމަލާގައި ޝަހީދުވި މީހުން ނެރޭތަން ފެނެއެވެ.
ޝަހީދުވި ހުރިހާ މީހުންނަކީ ވެސް އެއް ޢާއިލާއެއްގެ މީހުން ކަމަށާއި އޭގެ ތެރޭގައި ހަތް ކުދިން ހިމެނޭއިރު އެންމެ ދޮށީ ކުއްޖާގެ ޢުމުރަކީ ހަ އަހަރު ކަމަށް ސިވިލް ޑިފެންސްގެ ތަރުޖަމާނު މަޙްމޫދު ބަސާލްއާއި ހަވާލާދީ އަލްޖްޒީރާގައި ބުނެފައިވެއެވެ.
އޭނާ އިތުރަށް ބުނެފައިވަނީ ވައިގެ ހަމަލާގައި އިތުރު 15 މީހަކަށް އަނިޔާވެފައިވާ ކަމަށެވެ.
މިހަމަލާއާއި ގުޅިގެން އިޒްރާއީލު ސިފައިން ބުނެފައިވަނީ މިހަމަލާއަކީ ހަމާސް ޖަމާޢަތަށް ނިސްބަތްވާ އަސްކަރީ ސްޓްރަކްޗާއެއްގައި ހަރަކާތްތެރިވާ ބައަކަށް އަމާޒުކޮށް ދިން ހަމަލާއެއް ކަމަށާއި މިހަމަލާދީފައިވަނީ ހަމާސް ޖަމާޢަތުގެ ހަމަލާތަކުގެ ސަބަބުން އެމީހުންނަށް ނުރައްކާވެފައިވާތީ ކަމަށެވެ.
އިޒްރާއީލުން ޣައްޒާއަށް ހަމަލާދޭން ފެށިތާ 14 މަހަށްވުރެ ގިނަ ދުވަސްވީއިރު މިދިޔަ ހުކުރު ދުވަހުވެސް ޣައްޒާގެ އެކި ހިސާބުތަކަށް އިޒްރާއިލުން ހަމަލާތައް ދީފައިވެއެވެ.
އޭގެތެރޭގައި ނުޞައިރަތް ރެފިޔުޖީ ކޭމްޕްގެ މާރުކޭޓް މަގުގައި ހުރި މީހުން ދިރިއުޅޭ ޢިމާރާތަކަށް ޑްރޯން ހަމަލާއެއްދީ އަށް މީހަކު ޝަހީދުކޮށްލައިފައިވެއެވެ.
މީގެއިތުރުން ބައިތު ޙަނޫނަށް ދިން ވައިގެ ހަމަލާއެއްގައި ވެސް ހަތަރު މީހަކު ޝަހީދުވެފައިވެއެވެ. އެހަމަލާގައި ޝަހީދުވެފައިވަނީ ދެ އަންހެން ކުދިންނާއި އެމީހުންގެ މައިންބަފައިންނެވެ. ކަމްލް އަދްވާން ހޮސްޕިޓަލް ކައިރީގައި ހުރި ގެއަކަށް ދިން ހަމަލާއެއްގައި ވެއްޓުނު ޢިމާރާތެއްގެ ގައު ކުނިތަކުގެ ތެރެއިން އެއްބަނޑު އެއްބަފާ ތިން ފިރިހެނެއްގެ ހަށިތައް ނަގައިފައިވާކަމަށްވެސް އަލްޖަޒީރާގައި ބުނެފައިވެއެވެ.