ކިރިޔަ ކިރިޔާ ހިނގަހިނގާ އޮތް ކަމަލް އަދްވަން ހޮޮސްޕިޓަލަށް އަނެއްކާވެސް އިޒްރާއިލުން ހަމަލާދީފި

 ކިރިޔަ ކިރިޔާ ހިނގަހިނގާ އޮތް ޣައްޒާގެ ކަމަލް އަދްވަން ހޮސްޕިޓަލަށް އަނެއްކާވެސް އިޒްރާއިލުން ހަމަލާދީފިއެވެ.

އިޒްރާއިލް ސިފައިން މިއަދު ކަމަލް އަދްވަން ހޮސްޕިޓަލަށް ހަމަލާދިނުމުގެ ކުރިން އެހޮސްޕިޓަލުގެ އެތެރޭގައި ތިބި މީހުންނާއި އެހޮސްޕިޓަލާއި ކައިރި ސަރަހައްދުގައި ތިބި މީހުން އެތަން ދޫކޮށް ދިޔުމަށް ވަނީ އަމުރުކޮށްފައެވެ. 

އިޒްރާއިލްގެ ހަމަލާތަކުގެ އަމާޒަކަށް އާންމުކޮށް މިހާރު ހަދަމުންދާ ކަމަލް އަދްވަން ހޮސްޕިޓަލަށް ދިން ހަމަލާއާއި ގުޅިގެން އެހޮސްޕިޓަލްގެ ޑިރެކްޓަރ ޑރ ހުސާމް އަބޫ ސާފިޔާ ވިދާޅުވެފައިވަނީ އިޒްރާއިލްގެ މިހަމަލާތައް އަމާޒުކޮށްފައިވަނީ އެހޮސްޕިޓަލްގެ އައިސީޔޫއަށް ކަމަށެވެ. 

އައިސީޔޫއަށް އަމާޒުކުރި ބޮމުގެ ހަމަލާތަކުގެ ސަބަބުން ވަރުގަދަ ގޮވުންތަކެއް ގޮވައިފައިވާ ކަމަށާއި، ބަޑީގެ ހަމަލާތަކެއްވެސް އެތަނަށް އަމާޒުކޮށްފައިވާ ކަމަށެވެ. މީގެ އިތުރުން މިހަަމަލާތަކުގެ އަސަރު ގައިނަކޮލޮޖީ ޑިޕާޓްމެންޓަށް ވެސް ކޮށްފައިވާކަމަށް ޑރ ހުސާމް ވަނީ ވިދާޅުވެފައެވެ.

ޑރ ހުސާމް މިމަޢުލޫމާތުތައް އަލްޖަޒީރާއަށް ދެއްވަމުން ދިޔައިރުވެސް އިޒްރާއިލްގެ ހަމަލާތައް ހުއްޓުމަަކަށް އައިސްފައިނުވާކަން ފާހަގަކޮށްލަންޖެހެއެވެ. ހެނދުނުއްސުރެ އިޒްރާއިލުން ހޮސްޕިޓަލާއި ހޮސްޕިޓަލް ހިމެނޭ ސަރަހައްދަށް ހުއްޓުމެއްނެތި ހަމަލާތައް ދެމުންދާކަމަށް އަލްޖަޒީރާއާއި ވާހަކަ ދައްކަވަމުން ޑރ ހުސާމް އަބޫ ސާފިޔާ ވިދާޅުވެފައިވެއެވެ.

ބާރުގަދަ ގޮވުންތައް ގޮއްވަމުންދާއިރު ހަނގުރާމަމަތީ އުޅަނދުތައް އެސަރަހައްދުގެ މަތިން އުދުއްސަމުންދާތީ ހޮސްޕިޓަލުގެ މާހައުލުގައި ބިރުވެރިކަން އުފެދިފައިވާކަމަށް ޑރ ހުސާމް ވިދާޅުވެފައިވެއެވެ. 

ޑރ ހުސާމް ވަނީ މެޑިކަލް ފެސިލިޓީއަކަށް އެފަދަ ހަމަލާތައް ދެމުންދަނީ ކީއްވެގެންތޯ ސުވާލު އުފައްދަވައިފައެވެ. 

”އަޅުގަނޑުމެން ޑިމާންޑް ކުރިން އަދިވެސް ޑިމާންޑް ކުރަމުންމިދަނީި ޖެނީވާގެ މުއާހަދާތަކުގެ ދަށުން ކަށަވަރުކޮށްދީފައިވާ ރައްކާތެރިކަން މެޑިކަލް ފެސިލީޓީތަކަށް ފޯރުކޮށްދިނުމަށް، އެކަމަކު މުޅި ދުނިޔެ މިދަނީ އަޅުގަނޑުމެންނަށް ބީރު ކަންފަތެއް ދެމުން، ޖެނީވާގެ މުއާހަދާތަކުގެ ދަށުން ހުރިހާ ހޮސްޕިޓަލްތަކާއި މެޑިކަލް ސްޓާފުންނަށް ހިމާޔަތް ދޭން ޖެހޭ، ހިތާމައަކީ އަޅުގަނޑުމެންގެ ހުރިހާ އިލްތިމާސްތަކަކަށް ބީރު ކަންފަތެއް ދެމުންދާތީ” އަބޫ ސާފިޔާ ވިދާޅުވެފައިވެއެވެ.

އެ ހޮސްޕިޓަލަކީ އަދިވެސް އެ ސަރަހައްދުގައި ހިންގަމުންދާ މަދު ހޮސްޕިޓަލެއްގެ ތެރެއިން ކަމަލް އަދްވަން ހޮސްޕިޓަލަކީ، ކޮންމެހެން ބޭނުންވާ ޞިއްޙީ ސާމާނު ވަރަށް ބޮޑަށް މަދުވެ ނުވަތަ މުޅިންހެން ހުސްވެފައިވާ ތަނެކެވެ. އަދި މިފަދަ ޙާލަތެއްގައި އެތަން އޮތް އިރު ބަލިމީހުންނަށް ފަރުވާ ދިނުމަށް ބާކީ ތިއްބެވީވެސް މަދު ޑޮކްޓަރުންކޮޅެކެވެ. 

މިފަދަ ޙާލަތުގައިވެސް އެތަން ހުއްޓާނުލައި ކުރިއަށް ގެންދިޔުމަށް ޑރ ހުސާމް އަބޫ ސާފިޔާ އާއި އޭނާގެ ޓީމުން ދަނީ އަޖައިބެއްފަދަ ހިތްވަރެއް ދައްކަވަމުންނެވެ.