ދުނިޔެ

އަހަރެމެންގެ ހޮސްޕިޓަލަށް އަމާޒުކޮށް ހަމަލާދެނީ އަހަރެމެން ޝަހީދުކޮށް އަހަރެމެން ޙާލުގައި ޖައްސަން: ޑރ ޙުސާމް

އަހަރެމެންގެ ހޮސްޕިޓަލަށް އަމާޒުކޮށް ހަމަލާދެނީ އަހަރެމެން ޝަހީދުކޮށް އަހަރެމެން ޙާލުގައި ޖައްސަން: ޑރ ޙުސާމް

ޑރ ޙުސާމް އަބޫ ސާފިޔާ.

ޙަސްނާ އަޙްމަދް

ޙަސްނާ އަޙްމަދް

23 ޑިސެމްބަރު 2024، 07:20

23 ޑިސެމްބަރު 2024، 07:20

ޣައްޒާގެ ކަމަލް އަދްވަން ހޮސްޕިޓަލަށް އަމާޒުކޮށް އިޒްރާއިލް ސިފައިން ހަމަލާދެނީ އެތަނުގައި ތިބި ޑޮކްޓަރުންނާއި މެޑިކަލް އޮފިސަރުންނާއި ބަލިމީހުން ޝަހީދުކޮށް އެހޮސްޕިޓަލް ހުސްކޮށް އެމީހުން ޙާލުގައި ޖައްސަން ކަމަށް ކަމަލް އަދްވަން ހޮސްޕިޓަލްގެ ޑިރެކްޓަރ ޖެނެރަލް ޑރ ޙުސާމް އަބޫ ސާފިޔާ ވިދާޅުވެއްޖެއެވެ.

ޑރ ޙުސާމް އެންމެ ފަހުން ދީފައިވާ ބަޔާނުގައި ވިދާޅުވެފައިވަނީ ހުރިހާ ދިމާލަކުން ވެސް ބޮމުގެ ހަމަލާތައް ހޮސްޕިޓލަށް ދެމުންދާކަމަށެވެ. އަދި ހަމަލާތަކުގެ އަސަރު އެހޮސްޕިޓަލުގެ އިމާރާތުގެ ތެރޭގައި ހުރި އެކި އެކި  ޑިޕާޓްމަންޓްތަކަށް ކުރަމުންދާ ކަމަށާއި އެހަމަލާތަކުގެ އަސަރު ހޮސްޕިޓަލްގެ  މުވައްޒަފުންނަށް ވެސް ކުރަމުންދާ ކަމަށެވެ.

ޑރ ޙުސާމް ވިދާޅުވެފައިވަނީ މިއީ ސީރިއަސް އަދި އިންތިހާއަށް ބިރުވެރި ހާލަތެއް ކަމަށެވެ. 

“ހަމަލާތައް އަޅުގަނޑުމެންގެ ހޮސްޕިޓަލަށް އަމާޒުކޮށްގެން އުޅެނީ އަޅުގަނޑުމެން ޝަހީދުކޮށްލައި، ގަދަކަމުން މިތަނުން ނެރުމުގެ ނިޔަތުގައި، އަޅުގަނޑުމެން ބައިނަލްއަޤްވާމީ މުޖުތަމަޢަށް އިލްތިމާސް ކުރަން ވީ އެންމެ އަވަހަކަށް މިމައްސަލައަށް ތަދައްޚުލްވެ، އަޅުގަނޑުމެންނަށް ދެމުންދާ މި ވަރުގަދަ ހަމަލާތައް ހުއްޓުވުމަށް، ޞިއްޙީ ޚިދުމަތުގެ ނިޒާމާއި، އެނިޒާމުގެ މަސައްކަތްތެރިންނާއި، އެ ނިޒާމުގެ ތެރޭގައި ތިބި ބަލިމީހުން ރައްކާތެރި ކުރުމަށް.” ޑރ ޙުސާމް އަބޫ ސާފިޔާ ވިދާޅުވެފައިވެއެވެ. 

 އިޒްރާއީލުން ދެމުންދިޔަ ބޮމުގެ ހަމަލާ މުޅި ރޭ ނުހުއްޓައި އެހޮސްޕިޓަލަށް ދިން ހަމަލާތަކުގެ ސަބަބުން އެސަރަހައްދުގެ ވަށައިގެން ހުރި ޢިމާރަތްތައްވެސް ހަލާކުވެފައިވާ ކަމަށް އަބޫ ސާފިޔާ ވިދާޅުވެފައިވެއެވެ.

މީގެއިތުރުން ހެނދުނުން ފެށިގެން ހޮސްޕިޓަލުގެ ގޯތިތެރެއަށް ބޮން އެޅުމުގެ ސަބަބުން އަނެއްކާވެސް ހޮސްޕިޓަލުގެ ތެލާއި އޮކްސިޖަން ސަޕްލައި އަށް ގެއްލުންވެފައިވާ ކަމަށް ޑރ އަބޫ ސާފިޔާ ވިދާޅުވެފައިވެއެވެ. 

އަހަރެމެންގެ ހޮސްޕިޓަލަށް އަމާޒުކޮށް ހަމަލާދެނީ އަހަރެމެން ޝަހީދުކޮށް އަހަރެމެން ޙާލުގައި ޖައްސަން: ޑރ ޙުސާމް

ކަމަލް އަދްވާން ހޮސްޕިޓަލަށް ދެމުންދާ ހަމަލާތަކުގެ ސަބަބުން ރޯވެފައިވާ ތަނެއް

އިންޓެންސިވް ކެއާ ޔުނިޓާއި މެޓަނަނިޓީ ޑިޕާޓްމަންޓާއި ސްޕެޝަލައިޒްޑް ސާޖަރީ ޑިޕާޓްމަންޓަށް ހަމަލާގެ އަސަރުތައް ކޮށްފައިވާ ކަމަށް ޑރ އަބޫ ސާފިޔާ ވިދާޅުވެފައިވެއެވެ.

 އަދި ހަމަލާތަކުގެ ސަބަބުން ބަލިމީހުން ހޮސްޕިޓަލުގެ ކޮރިޑޯތަކަށް ބަދަލުކޮށްފައިވާ ކަމަށާއި ނަމަވެސް ބައެއް ވަޒަންތައް ޑިޕާޓްމަންޓްތަކަށް އަރައި ހޮސްޕިޓަލްގެ ތެރޭގައި ބިރުވެރިކަން އުފެދިފައިވާ ކަމަށްެވެސް ޑރ އަބޫ ސާފިޔާ ވިދާޅުވެފައިވެއެވެ.

 އޭނާ އިތުރަށް ވިދާޅުވީ މިވަގުތުވެސް އެހޮސްޕިޓަލުގައި ފަރުވާ ހޯދާ 91 ބަލިމީހުން އެބަތިބި ކަމަށާއި އޭގެ ތެރޭގައި ބޮޑެތި މީހުންނާއި ކުޑަކުދިންނާއި އަންހެނުން ހިމެނޭ ކަމަށެވެ.

 އެހޮސްޕިޓަލުން މިހާރުވެސް ދަނީ މިނިމަމް ލެވެލްގެ ޚިދުމަތް ފޯރުކޮށްދެވެމުން ކަމަށާއި އަބޫ ސާފިޔާ ވަނީ ބައިނަލްއަޤްވާމީ މުޖުތަމަޢަށް ރައްކާތެރިކަމާއި އިންސާނީ އެހީތެރިކަމަށް އެދި ގޮވައިލައްވައިފައެވެ.

 

 

 

 

މި ލިޔުން ކިޔާލުމުން

Ads by MSS