ދުނިޔެ
ތުރުކީވިލާތުގައި ގޮވާތަކެތި އުފައްދާ ފެކްޓްރީއެއްގައި ގޮވައި 12 މީހުން މަރުވެއްޖެ
ގޮވައިގެން 12 މީހުން މަރުވި ގޮވާތަކެތި އުފައްދާ ފެކްޓަރީ
ތުރުކީވިލާތުގައި ގޮވާތަކެތި އުފައްދާ ފެކްޓްރީއެއް ގޮވައި 12 މީހުން މަރުވެއްޖެއެވެ.
މިހާދިސާ ހިނގާފައިވަނީ ތުރުކީވިލާތުގެ ހުޅަނގު އުތުރުގައި އޮންނަ ގޮވާތަކެތި އުފައްދާ ފެކްޓްރީއެއްގައެވެ. މި ގޮވުން ގޮވާފައިވަނީ ބާލިކެސިރު ޕްރޮވިންސްގެ ކަވަކްލީ އަވަށުގައި ހުންނަ ފެކްޓްރީއެއްގައެވެ.
މިހާދިސާގައި 12 މީހަކު މަރުވެ ހަތަރު މީހަކު ޒަޚަމްވެފައިވާ ކަމަށް އަލްޖަޒީރާގައި ބުނެފައިވެއެވެ.
ތުރުކީވިލާތުގެ ލޯކަލް މީޑިއާގައި ބްރޯޑްކާސްޓް ކުރި ފޫޓޭޖްތަކުން ފެންނަ ގޮތުގައި ފެކްޓްރީގެ ބޭރުގައި ބިއްލޫރި އާއި ދަގަނޑުތައް ގޮވައި އެކި ދިމަދިމާލަށް ބުރައިގެން ދާތަން ފެނެއެވެ.
އަންގާރަ ދުވަހު ހިނގި ބާރުގަދަ ގޮވުމާ ގުޅިގެން ތަހުޤީޤެއް ފަށާފައިވާ ކަމަށް ތުރުކީވިލާތުގެ އިންޓީރިއާ މިނިސްޓަރު އަލީ ޔަރްލިކާޔާ ވަނީ ވިދާޅުވެފައެވެ. މިކަމާގުޅޭ ގޮތުން މީޑިއާ އަށް މަޢުލޫމާތު ދެއްވި ސަރުކާރުގެ އޮފިޝަލް ވިދާޅުވެފައިވަނީ ޒަޚަމްވި މީހުންގެ ހާލު ސީރިއަސް ނޫން ކަމަށެވެ.
މިނިސްޓަރު ޔެރްލިކާޔާ ވިދާޅުވީ ހާދިސާ ހިނގަން މެދުވެރިވި ސަބަބު އަދި އެނގިފައި ނުވާ ކަމަށެވެ. އަދި ކަމާބެހޭ ފަރާތްތަކުން ހާދިސާ ހިނގި ސަބަބު ދެނެގަތުމުގެ މަސައްކަތް ހުއްޓާނުލާ ކަމަށެވެ.
އިސްތަންބޫލުން ރިޕޯޓްކުރި އަލްޖަޒީރާގެ ސިނެމް ކޮސެއޮގްލޫ ބުނެފައިވަނީ މި ގޮވުން ގޮވާފައި ވަނީ ހެނދުނު 8:25 ގައި ހެނދުނު ޝިފްޓް ބަދަލުކުރުމުގެ ތެރޭގައި ކަމަށެވެ.
އަދި މިހާދިސާ ހިނގާފައިވަނީ ފެކްޓްރީގެ ބުލެޓް ކެޕްސޫލް އުފައްދާ ބައިގައި ކަމަށްވެސް އޭނާ ވަނީ ބުނެފައެވެ. ކޮސެއޮގްލޫ އިތުރަށް ބުނެފައިވަނީ އެގޮވުމުގެ ސަބަބުން ކަރަންޓް ކެނޑިފައިވާ ކަމަށެވެ. އަދި އެކަމުގެ ސަބަބުން އޮފިޝަލުންނަށް މަޖުބޫރުވެފައިވަނީ އަދިވެސް އެ އިމާރާތުގެ ތެރޭގައި މީހަކު ތާށިވެފައި ތިބެދާނެ ކަމަށް ލަފާކޮށް އެތަނުގައި އަތްފުނާ އެޅުމަށް ކަމަށެވެ.
ގޮވުމުގެ ހާދިސާ ހިނގި މިފެކްޓްރީއަކީ ތުރިކީވިލާތުގެ އެތެރޭގެ އަދި ބައިނަލްއަޤްވާމީ މާކެޓްތަކަށް ވިއްކާ ގޮވާތަކެތި އަދި ފްލޭއާތައް އުފައްދާ ފެކްޓަރީއެކެވެ.
މި ހާދިސާ ހިނގާފައިވަނީ ވެރިރަށް އަންކާރާ ކައިރީގައި އޮންނަ ތުރުކީވިލާތުގެ ދައުލަތުގެ ޑިފެންސް ކުންފުންޏަކަށް ދިން ހަމަލާއެއްގައި ފަސް މީހުން މަރުވެ 22 މީހުން ޒަޚަމްވިތާ ދެ މަސް ފަހުންނެވެ.
އެ ހަމަލާއަކީ ޤާނޫނާ ޚިލާފު ޕީކޭކޭ (ކުރުދީސްތާން ވޯކަރސް ޕާޓީ) އިން ދިން ހަމަލާއެކެވެ.
