ޣައްޒާގެ މައި ހޮސްޕިޓަލް ތަކަށް އިޒްރާއިލުން ހަމަލާދެމުންދާތީ ބައިނަލްއަޤްވާމީ އެހީއަށް އެދިއްޖެ

ޣައްޒާގެ މައި ހޮސްޕޓަލް ތައް ކަމަށްވާ ކަމަލް އަދްވަން ހޮސްޕިޓަލް، އިންޑޮނޭޝިއަން ހޮސްޕިޓަލް އަދި އަލް އަވްދާ ހޮސްޕިޓަލަށް އިޒްރާއިލްގެ ހަމަލާތައް ހުއްޓުމެއް ނެތި ދެމުންދާތީ އެކަން ހުއްޓުވުމަށް ބައިނަލް އަޤްވާމީ އެހީއަށް އެދިއްޖެއެވެ.

އިޒްރާއީލުގެ ޢަސްކަރިއްޔާއިން ޣައްޒާގެ އުތުރުގެ ބޮޑެތި ތިން ހޮސްޕިޓަލަށް އަމާޒުކޮށް ހަމަލާތައް ދެމުންދާއިރު، ޑޮކްޓަރުންނާއި ކަމާބެހޭ ފަރާތްތަކުން އެދިފައިވަނީ ބައިނަލްއަޤްވާމީ މުޖުތަމައުން މިކަމަށް ތަދައްޚުލުވުމަށެވެ. 

އަންގާރަ ދުވަހު އިޒްރާއީލުން ވަނީ ހަފްތާއެއްހާ ދުވަަސް ވަންދެން ހުއްޓުމެއް ނެތި ހޮސްޕިޓަލް ތަކަށާއި ހޮސްޕިޓަލްތައް ހިމެނޭ ސަރަހައްދުތަކަށް ދެމުންދާ ހަމަލާތައް ވަރުގަދަކޮށްފަ އެވެ.

އެގޮތުން ކަމަލް އަދްވަން ހޮސްޕިޓަލުގެ ޑިރެކްޓަރު ޑރ ޙުސާމް އަބޫ ސާފިޔާ އަލްޖަޒީރާއަށް ވިދާޅުވީ މީގެ ކުރިން އިޒްރާއީލުގެ އަސްކަރިއްޔާއިން އެހޮސްޕިޓަލް ހިމެނޭ ސަރަހައްޑުގައި އިންދާފައިވާ ް ދެ ރޮބޮޓިކް ވެހިކަލް އަންގާރަ ދުވަހުގެ ހެނދުނު ގޮއްވާލައި ގާތްގަނޑަކަށް 20 ބަލިމީހުންނާއި މެޑިކަލް ސްޓާފުން ޒަޚަމްކޮށްލައިފައިވާ ކަމަށެވެ.

 މިއީ ކަމާލް އަދުވާންގެ ބޭރުގައި އިޒްރާއީލު ސިފައިން މިފަދަ ގޮވާތަކެތި ބޭނުންކުރި ފުރަތަމަ ފަހަރު ނަމަވެސް، ޣައްޒާގެ އުތުރުގައި ހުރި އިމާރާތްތައް ގޮއްވާލުމަށް މިފަދަ ގޮވާތަކެތި ބޭނުންކުރި ކަމުގެ ރިޕޯޓްތައް ވަނީ ލިބިފައެވެ.

 މެދުތެރޭގެ ޣައްޒާގެ ދެއިރް އަލް ބަލްޙްއިން ރިޕޯޓް ކުރަމުން އަލްޖަޒީރާގެ ޙާނީ މަޙްމޫދު މަންޒަރު ދުށް މީހަކާ ހަވާލާދީ ބުނެފައިވަނީ، ހޮސްޕިޓަލުގެ ވަށައިގެންވާ ބޮޑު ބައެއް އިމާރާތްތަކުން ހަލާކުވެ އިމާރާތައް ބޮޑެތި ގެއްލުންތަކެއް ލިބިފައިވާ ކަމަށެވެ.

ކަމަލް އަދްވަން ހޮސްޕިޓަލަށް އިޒްރާއީލުގެ އަސްކަރިއްޔާއިން ތަކުރާރުކޮށް ބޮން އެޅުމުގެ ސަބަބުން އިންޓެންސިވް ކެއާ ޔުނިޓް ހިމެނޭ ގޮތަށް އެކި ޑިޕާޓްމަންޓްތައް ހިންގުމަށް ދަތިތަކެއް ކުރިމަތިވެފައިވާ ކަމަށް ޑރ ޙުސާމް ވަނީ ވިދާޅުވެފައެވެ.

ޣައްޒާގެ ޢާންމުންނަށް ހިލޭ ބޭސްފަރުވާ ކޮށްދެމުންދާ ޗެރިޓަބަލް ފެސިލިޓީއެއް ކަމަށްވާ އަލްއަވްދާގެ ތިން ވަނަ ފަންގިފިލާއަށް އަމާޒުކޮށް އިޒްރާއީލުގެ އަސްކަރިއްޔާއިން ވަނީ ހަމަލާއެއް ދީފައެވެ. އެހަމަލާގެ ސަބަބުން އެ އިމާރާތުގެ ބައެއް ހިސާބުތަކުގައި އަލިފާން ރޯވެ، ކައިރީގައި ހުރި މީހުން ދިރިއުޅޭ އިމާރާތްތަކަށް ވެސް ވަނީ ފެތުރިފައި ކަމަށް އަލްޖަޒީރާގައި ބުނެފައިވެއެވެ. 

އަދި ހަމަލާތައް ދެމުން އަންނަ ހޮސްޕިޓަލެއް ކަމަށްވާ އިންޑޮނޭޝިއަން ހޮސްޕިޓަލަށް ވެސް އެތަން ހުސްކުރުމުގެ އިންޒާރު އިޒްރާއީލުގެ ސިފައިން ދީފައިވެއެވެ.

 ޣައްޒާގެ ޞިއްޙީ ވުޒާރާގެ ޑިރެކްޓަރު މުނީރު އަލް ބުރްޝް ވިދާޅުވީ އިޒްރާއީލު ސިފައިން އިންޑޮނޭޝިއަން ހޮސްޕިޓަލް ހުސްކުރުމަށް އެހޮސްޕިޓަލުގެ އޮފިޝަލުންނަށް ހޯމަ ދުވަހު އަންގާފައިވާ ކަމަށާއި އޭގެ ކުރިން އަންގާރަ ދުވަހުގެ ވަގުތެއްގައި އެތަނަށް ވަދެ އެތެރޭގައި ތިބި މީހުންނަށް އެތަނުން ނުކުތުމަށް މަޖުބޫރުކޮށްފައިވާ ކަމަށެވެ. 

ވޭތުވެދިޔަ މަސްތަކުގައި ދިން ހަމަލާތަކުގެ ސަބަބުން އިންޑޮނޭޝިއަން ހޮސްޕިޓަލްގެ ޙާލަތު ވަރަށްބޮޑަށް ގޯސްވެފައިވާކަމަށެވެ. ފެސިލިޓީގެ ބޮޑު ބައެއް ހަލާކުވެފައިވާތީ އެތަން ހުސްކުރަން މަޖުބޫރުވެފައިވާކަމަށްވެސް ވަނީ ބުނެފައެވެ.

ޣައްޒާގެ އެތެރެއާއި ބޭރުގައި ހޮސްޕިޓަލްތަކުގެ ޑިރެކްޓަރުންނާއި ސިއްހީ އިދާރާތަކާއި އިންސާނީ ހައްޤުތަކާ ބެހޭ ޖަމިއްޔާތަކުން މި ހަމަލާތައް ކުށްވެރިކޮށް ބައިނަލްއަޤްވާމީ އެހީތެރިކަމަށް ގޮވާލަމުން ދިޔަ ނަމަވެސް ޣައްޒާގެ އުތުރުގެ ޙާލަތު ދަނީ ދުވަހުން ދުވަހަށް ގޯހަށެވެެ. 

ހުއްޓުމެއްނެތި ދެމުންދާ ހަމަލާތަކުގެ ސަބަބުން އެހީގެ ޤާފިލާތައް އެއެހީ ފޯރުކޮށްދޭން ޖެހޭ ހިސާބަށް ފޯރުކޮށްދިނުމަށް ވަނީ ދަތިވެފައެވެ. މީގެ އިތުރުން އެހީގެ ޤާފިލާތަކަށް އަމާޒުކޮށް އިޒްރާއިލް ސިފައިން ދޭތެރެދޭތެރެއިން ހަމަލާތައްވެސް އަންނަނީ ދެމުންނެވެ.