އިޒްރާއިލްގެ ހަމަލާއެއްގައި ޣައްޒާގެ މާބަނޑު އަންހެނަކު ޝަހީދުވެއްޖެ

އިޒްރާއިލުން ޣައްޒާގެ ސަރަހައްދަކަށް ދިން ހަމަލާއެއްގައި ޣައްޒާގެ މާބަނޑު އަންހެނަކު ޝަހީދުވެއްޖެއެވެ. 

ދެއިރް އަލް ބަލަހް އިން ރިޕޯޓު ކުރަމުން ހިންދު އަލް ޙުދްރީ ބުނެފައިވަނީ ޣައްޒާގެ ހުރިހާ ހިސާބަކަށްވެސް އިޒްރާއިލުން ހަމަލާތަައް ދެމުންދާކަމަށެވެ.

އެގޮތުން އިޒްރާއިލުން ދެމުންދާ ހަމަލާތަކުގެ ތެރެއިން ހަމަލާއެއް ޣައްޒާގެ މީހުން ދިރިއުޅޭ ގެއަކަށް އަރައި އެގޭގެގައި ދިރިއުޅެމުންދިޔަ  މާބަނޑު އަންހެނަކު ވަނީ ޝަހީދުވެފައެވެ. 

ހަމަލާގައި މާބަނޑު އަންހެންމީހާ ޝަހީދުވެގެން ދިޔަ ނަމަވެސް މެޑިކަލް އޮފިސަރުންގެ މަސައްކަތުން އޭނާގެ ބަނޑުގައި އޮތް ދަރިފުޅު ވަނި ސަލާމަތް ކޮށްފައެވެ. 

 ޣައްޒާގެ އެހެން ސަރަހައްދަކަށް ދިން ހަމަލާއެއްގައި ފަލަސްޠީނުގެ ވަރަށް މަޝްހޫރު ލިޔުންތެރިއެއް ކަމަށް ވާ ވަލާ ޖުމާ އަލް އިފްރާންޖީ އާއި އޭނާގެ ފިރިމީހާ އަހުމަދު ސައީދު ސަލާމާ ވަނީ ޝަހީދުވެފައެވެ. އެމީހުން ޝަހީދު ވެފައިވަނީ ނުޞައިރަތް ރެފިއުޖީ ކޭމްޕްގެ ދެކުނުގައި ހުންނަ އެމީހުންގެ ގެއަށް އިޒްރާއީލުން ދިން ހަމަލާއެއްގައެވެ. 

ޣައްޒާގެ ދެކުނުގައި އޮންނަ ޚާން ޔޫނިސް ސިޓީގައި ވަގުތީ ބޯހިޔާވަހިކަން ފޯރުކޮށްދިނުމަށް ހަދައިފައިވާ ފޭލިގެއެެއްގައި ފެތުރެމުންދާ ގަދަ ފިނީގެ ސަބަބުން ތުއްތު ކުއްޖަކު ނިޔާވެފައިވާ ކަމަށް އަލްޖަޒީރާގައި ވަނީ ބުނެފައެވެ.

ފިނީގެ ސަބަބުން ޝަހީދުވި ތުއްތު ސައިލްގެ ހަށިގަނޑު ހޮސްޕިޓަލަށް ގެންދަނީ

ހަމަލާތަކުގެ ސަބަބުން އެއްތަނުން އަނެއްތަނަށް ބަދަލުވަމުން ވަގުތީ ކޭމްޕްތަކުގައި މީހުން ދިރިއުޅެމުން އަންނަތާ 14 މަސް ދުވަސް މިހާރު ވަނީ ފާއިތުވެގެން ގޮސްފައެވެ.

 ވަގުތީ ބޯހިޔާވަހިކަން ހޯދުމަށް ބޭނުންކުރަމުންދާ ޓެންޓު ތަކަކީ ވާރޭ ވެހޭނަމަ ފެން ވަންނަ ގޮތައް ހުރި ފިނި މޫސުމުގެ ފިނިން ރައްކާތެރިކަން ހޯދޭނެ ފަދައެއް ނެތް ގޮތައް ހުރި ތަންތަނެވެ. 

7 އޮކްޓޯބަރު 2023ން ފެށިގެން އިޒްރާއިލުން ފަލަސްޠީނަށް ދެމުންދާ ހަމަލާތަކުގައި މިހާތަނަށް ފަލަސްޠީނުގެ 45،361 މީހުން ވަނީ ޝަހީދުވެފައެވެ. 107،803 މީހަކު ވަނީ ޒަޚަމްވެފައެވެ.