އިޒްރާއިލުން ފަލަސްޠީނުގެ ފަސް ނޫސްވެރިޔެއް ޝަހީދުކޮށްލައިފި

އިޒްރާއިލުން ފަލަސްޠީނުގެ ފަސް ނޫސްވެރިޔެއް ޝަހީދުކޮށްލައިފިއެވެ. 

ޣައްޒާގެ މެދުތެރޭގައި ހުންނަ ހޮސްޕިޓަލެއްގެ ކައިރިއަށް އިޒްރާއީލުން ދިން ހަމަލާއެއްގައި ފަސް ނޫސްވެރިން ޝަހީދުވެފައިވާ ކަމަށް ފަލަސްޠީނުގެ ކަމާބެހޭ ފަރާތްތަކާއި މީޑިއާ ރިޕޯޓްތަކަށް ހަވާލާދީ އަލްޖަޒީރާގައި ވަނީ ބުނެފައެވެ. 

އިޒްރާއިލްގެ ހަމަލާގައި ޝަހީދުވެފައިވަނީ އަލް ޤުދުސް ޓުޑޭ ޗެނަލްގެ ނޫސްވެރިން ތަކެކެވެ. އެނޫސްވެރިން ޝަހީދުކޮށްލައިފައިވަނީ މިއަދު ހެނދުނުގެ ވަގުތެއްގައި ނުޞައިރަތް ރެފިއުޖީ ކޭމްޕްގައި ހުންނަ އަލް އައުދާ ހޮސްޕިޓަލް ކައިރީގައި ހިނގަމުންދިޔަ ކަންކަން ކަވަރު ކުރަމުން ދިޔަވަގުތުކަމަށް އަލްޖަޒީރާއިން ބުނެފައިވެއެވެ. އެމީހުން ޝަހީދުވެފައިވަނީ އެމީހުންގެ ބްރޯޑްކާސްޓިން ވޭންއަށް އިޒްރާއިލްގެ ހަމަލާއެއް އަރައިގެނެވެ.

ސޯޝަލް މީޑިއާގައި ދައުރުވަމުންދާ ފޫޓޭޖްތަކުން ފެންނަނީ އުޅަނދެއް ބޮޑު އަލިފާންގަނޑެއް ރޯވެއަނދަމުންދާތަނެވެ. ފުޓޭޖް ތަކުން ފެންނަ ގޮތުގައި އިޒްރާއިލްގެ ހަމަލާއެރައި ރޯވި ވެހިކަލްގައި “ޕްރެސް” ޖަހައިފައިވެއެވެ.

ޝަހީދުވި ނޫސްވެރިންގެ ތެރޭގައި ހިމެނެނީ ފާދީ ހަސޫނާ، އިބްރާހިމް އަލްޝެއިޚް ޢަލީ، މުޙައްމަދު އަލް ލަދާ، ފައިސަލް އަބޫ އަލް ޤުމްސާން އަދި އައިމަން އަލް ޖާދީ އެވެ.

 އަލްޖަޒީރާގެ އަނަސް އަލް ޝަރީފް މިކަމާބެހޭ ގޮތުން ރިޕޯޓު ކުރަމުން ބުނެފައިވަނީ އައިމަން އަލް ޖާދީ ޝަހީދުވެފައިވަނީ އޭނާގެ އަނބިމީހާ ވިހަން ވައްދައި، އަލަތު ދަރިފުޅު އުފަންވުމުގެ އިންތިޒާރުގައި ހޮސްޕިޓަލްގެ ކުރިމަތީގައި ހުއްޓައި ކަމަށެވެ. 

 ސިވިލް ޑިފެންސް ޓީމުތަކުން ވަނީ ޝަހީދުވި މީހުންގެ ހަށިގަނޑުތައް ނެގުމަށްފަހު އެ ސަރަހައްދުގައި ހިނގި އަލިފާންގަނޑު ނިއްވާލާފައެވެ.  މިހަމަލާއާއި ގުޅިގެން އިޒްރާއީލުގެ ޢަސްކަރިއްޔާއިން ބުނެފައިވަނީ އިސްލާމިކް ޖިހާދުގެ މެމްބަރުންނާއެކު ދުއްވާ އުޅަނދަކަށް އަމާޒުކޮށްގެން ހަމަލާއެއް ދީފައިވާ ކަމަށެވެ. އަދި ޣައްޒާގައި ތިބި "ޓެރަރިސްޓް ޖަމާއަތްތަކާ" ދެކޮޅަށް ފިޔަވަޅު އަޅާނެ ކަމަށެވެ. 

ނޫސްވެރިންގެ ހައްޤުގައި ވަކާލާތުކުރާ ކޮމިޓީން މި މަހުގެ ކުރީކޮޅު ވަނީ އިޒްރާއީލުން ހަފްތާއެއްގެ ތެރޭގައި ފަލަސްޠީނުގެ ހަތަރު ނޫސްވެރިން ޝަހީދުކޮށްލި މައްސަލަ ކުށްވެރިކޮށް، މީޑިއާތަކަށް ދޭ ހަމަލާތައް ކުށްވެރިކޮށްފައެވެ.

 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިޒްރާއީލުން ޣައްޒާގައި ހިންގި ހަނގުރާމައިގައި މަދުވެގެން 141 ނޫސްވެރިން މިހާތަނަށް ޝަހީދުވެފައިވެއެވެ.