"ވިލުންތެރި 20" މަޢުރަޒު ނައިބުރައީސް ހުޅުވައިދެއްވައިފި

ސުނާމީ ކާރިސާއަށް 20 އަހަރު ފުރުމާ ގުޅުވައިގެން، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ފަރާތުން އިންތިޒާމުކުރައްވާފައިވާ "ވިލުންތެރި 20" މަޢުރަޒު ނައިބުރައީސް ޙުސެއިން މުޙައްމަދު ލަޠީފް ހުޅުވައިދެއްވައިފިއެވެ. 

މިމަޢުރަޒު ހުޅުވުމަށް ބޭއްވުނު ރަސްމިއްޔާތުގައި ނައިބުރަޢީސް ޙުސެއިން ވާހަކަފުޅު ދައްކަވައިފައިވެއެވެ. 

އެގޮތުން މިރަސްމިއްޔާތުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ އަލަށް އެކުލަވާލި ދިވެހިރާއްޖޭގެ "ކާރިސީ ހިރާސް ކުޑަކުރުމުގެ އިސްތިރާޖު" މި ވެރިކަމުގެ ޅަފަތުގައި އެކުލަވާލެވުމުން ދައްކުވައިދެނީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ސިޔާސަތު ބައްޓަންކުރެއްވުމުގައި މިކަމަށް ދެއްވާ އަހަންމިއްޔަތުކަން ކަމުގައެވެ.

މީގެއިތިުރުން ނައިބުރަޢީސް ޙުސެއިން ވިދާޅުވީ ސުނާމީ ކާރިސާއިން ލިބުނު ގެއްލުންތަކުން އަރައިގަނެ، ވިލުންތެރި ފަތިހަކަށް ޤައުމު ގެންދެވުނީ، މާތްﷲ މި ޤައުމަށް މިންވަރުކުރައްވާފައިވާ އިސްލާމީ ހިދާޔަތުގެ ނޫރުގެ ސަބަބުންކަމަށެވެ.

މީގެއިތުރުން ކާރިސާގެ ވަގުތުގައި ދިވެހިން ދެއްކި އެއްބައިވަންތަކަމުގެ ނަމޫނާގެ ހަނދާން އާކުރައްވައި، ސަލާމަތީ ބާރުތަކާއި، ދަރުމަވެރިންނާއި، ޢާންމު ރައްޔިތުން، އެކަކު އަނެކެއްގެ ކިބައިން ހިތްވަރު ނެރެ، ޤައުމީ ޚިދުމަތުގައި ވެދެއްވި ޤުރުބާނީގެ އަގުވަޒަންކުރައްވާފައިވެއެވެ. 

މީގެއިތުރުން މި ކާރިސާއާއެކު އުފަންވި، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ މަސައްކަތްތަކަށްވެސް އެމަނިކުފާނުގެ ވާހަކަފުޅުގައި އަލިއަޅުއްވާލެއްވިއެވެ.

ސުނާމީ ކާރިސާއަށް 20 އަހަރު ފުރުމާ ގުޅުވައިގެން، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ފަރާތުން އިންތިޒާމުކުރައްވާފައިވާ މި މަޢުރަޒު ކުރިއަށްދަނީ، ނޭޝަނަލް އާޓް ގެލެރީގައެވެ.

 މި ރަސްމިއްޔާތުގައި ނައިބުރަޢީސް ޙުސެއިން ވަނީ، އަންގާރަ ދުވަހު، ނެޝަނަލް ޑިޒާސްޓަރ މެނޭޖްމަންޓް ކައުންސިލުން ފާސްކުރެއްވި "މޯލްޑިވްސް ޑިޒާސްޓަރ ރިސްކް ރިޑަކްޝަން ސްޓްރެޓަޖީ 2024-2030" ގެ ފޮތް އިފުތިތާޙުކޮށްދެއްވާފައެވެ.

ނައިބުރަޢީސް ޙުސެއިން ވަނީ މަޢުރަޒު ހުޅުވައިދެއްވުމަށްފަހު މަޢުރަޒު ބައްލަވާލައްވައިފައެވެ.

އެއަށްފަހު "ފަނޑުވުމެއް ނެތް ހަނދާންތައް" ސެގްމެންޓްގައި ސުނާމީއާ ގުޅޭ ޚާއްޞަ މެސެޖެއް، އެމަނިކުފާނު ލިޔުއްވިއެވެ. މީގެއިތުރުން މިރަސްމިއްޔާތުގައި "ވިލުންތެރި 20" މައުރަޒުގެ ފޮޓޯފޮތް އެމަނިކުފާނަށް ވަނީ އަރުވާފައެވެ.