ދުނިޔެ
ބަރުދާސްތުނުކުރެވޭ ވަރުގެ ގަދަ ފިނީގެ ސަބަބުން ޣައްޒާގެ ތުއްތު ތިން ކުއްޖަކު ޝަހީދުވެއްޖެ

ގަދަފިނީގެ ސަބަބުން ޝަހީދުވި ސިލާގެ ބައްޕަ އޭނާގެ ހަށިގަނޑާއި އެކު
ބަރުދާސްތުނުކުރެވޭ ވަރުގެ ގަދަ ފިނީގެ ސަބަބުން ޣައްޒާގެ ތުއްތު ތިން ކުއްޖަކު ޝަހީދުވެއްޖެއެވެ.
އަލްޖަޒީރާގައި ބުނެފައިވަނީ ޣައްޒާގެ ދެކުނުގައި އޮންނަ އަލް މަވާސީ ރެފިއުޖީ ކޭމްޕްގައި ފާއިތުވި ދުވަސްތަކުގައި ފަލަސްޠީނުގެ ތިން ތުއްތު ކުދިން ޝަހީދުވެފައިވަނީ ފިނިހޫނުމިން ވަރަށް ބޮޑަށް ދަށްވެ، ކާބޯތަކެއްޗާއި ފިނިމޫސުމަށް ކޮންމެހެން ބޭނުންވާ ތަކެތި ލިބުމުގެ މަގު އިޒްރާއިލުން ބަންދުކޮށްފައިވާތީކަމަށެވެ.
ޚާން ޔޫނިސްގެ ނައްސިރް ހޮސްޕިޓަލުގެ ކުޑަކުދިންގެ ވޯޑްގެ ޑިރެކްޓަރު އަހުމަދު އަލް ފައްރާ އަލްޖަޒީރާއަށް ބުނެފައިވާ ގޮތުގައި އުމުރުން ތިން ހަފްތާގެ ސިލާ މަޙްމޫދު އަލް ފަސީހު ޝަހީދުވީ ހައިޕޮތަރމިއާ ޖެހިގެން ކަމަށެވެ.
”އޭނާގެ ޞިއްޙަތު ރަނގަޅު އަދި އުފަންވީ ގުދުރަތީ ގޮތުން ނަމަވެސް ޓެންޓްތަކުގައި ފިނިހޫނުމިން ބޮޑުވުމުގެ ސަބަބުން ފިނިހޫނުމިން ވަރަށް ބޮޑަށް ދަށްވެ ހަށިގަނޑުގެ ނިޒާމު މަސައްކަތް ހުއްޓާލައި ޝަހީދުވީ” ސިލާގެ ޙާލަތަށް އިޝާރާތް ކުރައްވައި އަލްފާރާ ވިދާޅުވި ކަމަށް އަލްޖަޒީރާގައި ބުނެފައިވެއެވެ.
ތުއްތު ސިލާގެ ބައްޕަ މަޙްމޫދު އަލް ފަސީހު ބުނީ އެ އާއިލާ ދިރިއުޅެމުން އައީ ޣައްޒާގެ އަލް މަވާސީގައި ހުންނަ ޓެންޓެއްގައި އުނދަގޫ އަދި ދަތިޙާލެއްގައި ކަމަށެވެ.
އަލް މަވާސީ އަކީ "ރައްކާތެރި ސަރަހައްދެއްގެ" ގޮތުގައި ކަނޑައަޅާފައިވާ ސަރަޙައްދެކެވެ. ނަމަވެސް އިޒްރާއީލުން އެސަރަޙައްދަށް ތަކުރާރުކޮށް ހަމަލާ ދީފައިވެ އެވެ.
"އަހަރެމެން ނިދަނީ ވެލިގަނޑުގައި، އަހަރެމެންގެ އަތުގައި އެކަށީގެންވާ ބްލެންކެޓެއްނެތް، އަހަރެމެންގެ ޓެންޓް ތެރޭގައި ގަދަ ފިނިކަން އިހުސާސް ކުރެވޭ، އަހަރެމެންގެ ޙާލަތު ދެނެވޮޑިގެންވަނީ ހަމައެކަނި މާތްﷲ އަހަރެމެންގެ ހާލަތު ވަރަށް ދަތި” ސިލާގެ ބައްޕަ ބުނެފައިވެއެވެ.
އެ އާއިލާ ދިރިއުޅެމުންދާ ޓެންޓްް ބަންދުކޮށްފައި ނުވާއިރު ޖެހޭ ފިނި ވައި މަނަލެއްނެތި އެތަނަށް ވަންނަމުން ދާކަމަށާއި، ބިންގަނޑު ފިނިވެފައި ވާއިރު، އަންގާރަ ދުވަހުގެ ރޭ ފިނިހޫނުމިން ވަނީ 9 ޑިގްރީ ސެލްސިއަސްއަށް ވެއްޓިފައި ކަމަށް އަލްޖަޒީރާގައި ބުނެފައިވެއެވެ.
ސިލާ ޝަހީދުވި ރޭ ގަދަ ފިންޏަށް ކެތް ނުވެގެން، ނިންދެވިފަހުން ތިން ފަހަރު ހޭލިކަމަށާއި، އޭނާ އެރޭ ވަރަށް ރުއި ކަމަށް އަލްޖަޒީރާގައި ބުނެފައިވެއެވެ. ހެނދުނު ސިލާގެ މައިންބަފައިންނަށް ސިލާގެ ހަށިގަނޑު ފެނުނީ ގަނޑުވެގެންހަށިގަނޑު ހަރުވެފައި އޮންނަ ފަދަ ގޮޮތަކަށް ކަމަށް އަލްޖަޒީރާގައި ބުނެފައިވެއެވެ.
ސިލާގެ ބައްޕަ ވަގުތުން ނައްސިރް ހޮސްޕިޓަލަށް ގެންދިޔަ ކަމަށާއި، ގެންދިޔައިރުވެސް ސިލާ ޝަހީދުވެފައިވާ ކަމަށް ވަނީ ބުނެފައެވެ.
ޣައްޒާގެ ޞިއްޙި ވުޒާރާގެ ޑިރެކްޓަރު ޖެނެރަލް ޑރ މުނީރު އަލް ބުރްޝް ވިދާޅުވީ ތުއްތު ސިލާ ޝަހީދުވީ ފިނިވެ ގަނޑުވާން ދޫކޮށްލުމުން ކަމަށެވެ. ފިނި މޫސުން ފެށުމާއެކު ލައްކައެއްހާ މީހުން އައްސޭރިފަށުގެ ޓެންޓް ކޭމްޕްތަކުގައި ދިރިއުޅެމުންދާއިރު، އެހީދޭ ޖަމާއަތްތަކުންވަނީ ކާބޯތަކެއްޗާއި ސާމާނު ފޯރުކޮށްދިނުމަށް އުނދަގޫތަކެއް ކުރިމަތިވެ، ބްލެންކެޓާއި ހޫނު ހެދުމާއި ލަކުޑި މަދުވެފައިވާ ކަމަށް ބުނެފައެވެ.