ގަދަ ފިނީގެ ސަބަބުން ގާޒާގެ ހަވަނަ ތުއްތު ކުއްޖާ ޝަހީދުވެއްޖެ

ގާޒާގެ ހޮސްޕިޓަލްތަކަށް އަމާޒުކޮށް އިޒްރޭލުން ގިނަ ހަމަލާތަކެއް ދެމުންދާއިރު، އެތަނުގެ ފިނިހޫނުމިން އިންތިހާއަށް ދަށްވެ، މިކަމުގެ ސަބަބުން މިހާތަނަށް ގާޒާގެ ހަ ކުއްޖަކު ޝަހީދުވެފައިވާކަމަށް، ގާޒާގައި ސިއްހީ ހިދުމަތް ފޯރުކޮށްދެމުންދާ ފަރާތްތަކުން ބުނެފިއެވެ.

އުމުރުން އެއް މަހުގެ އަލީ އަލް-ބަތުރާން ޝަހީދުވިއިރު، އޭނާގެ އެއްމާބަނޑު ކޮއްކޮ، ޖުމާ އަލް-ބަތުރާން ޝަހީދުވީ އޭގެ ކުރިން ދުވަހުއެވެ. އޭރު އޭނާގެ އާއިލާ ދިރިއުޅެމުން ދިޔައީ، ދަޔާ އަލް-ބަލާހެގެ ރެފިއުޖީ ޓެންޓެއްގައެވެ. 

ޖުމާ ޝަހީދުވިގޮތް ކިޔައިދެމުން އޭނާގެ ބައްޕަ ބުނީ، ޖުމާ މަރުވިކަން އެނގުނުއިރު އޭނާގެ ބޮލުގަ ފިނިކަން ހުރީ އައިސްގަނޑެއްހާ ފިނިކޮށް ކަމަށެވެ. 

އަލީ އާއި ޖުމާއަކީ ދުވަސް ނުފުރާ ވިހާފައިވާ ދެ ކުދިންނެވެ.

އިޒްރޭލުން ގާޒާގައި ހިންގަމުންދާ ގަތުލުއާމާ ގުޅިގެން، މިހާތަނަށް އެ ގައުމުގެ 2.3 މިލިއަން މީހުންގެ ގެދޮރު ވަނީ ގެއްލިފައެވެ. އަދި އޭގެ ތެރެއިން ގިނަ ބަޔަކު މިހާރު އުޅެމުންދަނީ، ހަމައެކަނި މަތި ހިޔާކޮށްފައިވާ ޓެންޓު ތަކެއްގައެވެ. 

އެއް ހަފްތާ ތެރޭ ޝަހީދުވި 6 ކުދިންގެ ތެރެއިން ތިން ކުދިން ޝަހީދުވީ ހައިޕޯތާރމިއާގެ ސަބަބުންނެވެ. 

ގާޒާގެ ސިއްހީ ވުޒާރާއިން ހާމަކޮށްފައިވާ ގޮތުގައި، މޫސުމް ގޯސްވުމުގެ ސަބަބަން ފާއިތުވި 24 ގަޑިއިރުގެ ތެރޭގައި 27 މީހަކު ވަނީ ޝާހީދުވެފައެވެ.