މަސްވެރިކަން ރަނގަޅު ހިސާބުތައް ހާމަކުރުމަށް މިފްކޯއިން ތަފާސް ހިސާބު އާންމުކުރަން ފަށައިފި

ސަރުކާރުގެ މަސް ކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އަށް ދުވަހުން ދުވަހަށް ކިރާ މަހުގެ ތަފާސް ހިސާބު އެ ކުންފުނިން އާންމު ކުރަން ފަށައިފިއެވެ. 

އެގޮތުން އެ ކުންފުނިން މިއަދު ވަނީ މި އަހަރުގެ އެއްވަނަ ދުވަހު ކިރާފައިވާ މަހުގެ މައުލޫމާތު ހާމަކޮށްފައެވެ. މި މައުލޫމާތުގައި މަސްކިރާފައިވާ ސަރަހައްދުތަކާއި، އެ ސަރަހައްދުތަކަށް މަސްކިރި ދޯނިތަކުގެ މައުލޫމާތު ވެސް ހާމަކޮށްފައި ވެއެވެ. މިކަމުގެ ސަބަބުން މަސްވެރިކަން ރަނގަޅު ހިސާބުތައް އެނގިގެންދާނެ ކަމަށް މިފްކޯއިން ހާމަކުރެއެވެ.

2025 ވަނަ އަހަރުގެ ފުރަތަމަ ދުވަހަށް ބަލާއިރު، އެ ދުވަހު ޖުމްލަ 311 މެޓްރިކް ޓަނުގެ މަސް ވަނީ މިފްކޯއަށް ކިރާފައެވެ. އެއީ ޖުމްލަ 79 ދޯންޏަކުންނެވެ. 

ތަފާސް ހިސާބުތައް ދައްކާ ގޮތުން، އެންމެ ގިނައިން މަސްކިރާފައި ވަނީ ހުވަދު އަތޮޅަށެވެ. އެގޮތުން، ހުވަދު އަތޮޅު ދެކުނުބުރިއަށް 22 ދޯންޏަކުން 92.6 މެޓްރިކް ޓަނުގެ މަސް ކިރުވި އިރު، ހުވަދު އަތޮޅު އުތުރުބުރިއަށް ވަނީ 20 ދޯންޏަކުން 80.7 މެޓްރިކްޓަނުގެ މަސް ކިރުވާފައެވެ. 

މީގެ އިތުރުން އުތުރުގެ އަތޮޅުތަކަށް މަސް ބޭނޭ މިންވަރު ވެސް ގޯހެއް ނޫނެވެ. އެގޮތުން ފެލިވަރުގެ ބޭރުގައި އޮތް 3 ބޯޓަކަށް 15 ދޯންޏަކުން 58.1 މެޓްރިކް ޓަނުގެ މަސް ކިރާފައިވެއެވެ.

ތަފާސް ހިސާބު އާންމު ކުރުމުގެ އިތުރުން، އެ ކުންފުނިން މިހާރު އަމަލު ކުރުމަށް ނިންމާފައިވާ ގޮތުގެ މަތީން، މަސް ކިރާތާ 48 ގަޑިއިރުގެ ތެރޭގައި އަންނަނީ މަސްވެރިނަށް ފައިސާ ދޫކުރަމުންނެވެ. އަދި މިދިޔަ އަހަރަށް މަސްވެރިންނަށް ދޫކުރަން ޖެހޭ ހުރިހާ ފައިސާއެއް މިހާރު ވަނީ ދޫކޮށް ނިންމާފައެވެ.