ބޯކޮށް ވާރޭ ވެހުމުގެ ސަބަބުން މެދުރާއްޖެތެރޭގެ ގިނަ ރަށްރަށުގައި ފެންބޮޑުވެއްޖެ

މިހާރު ރާއްޖެއަށް ކުރަމުންދާ ގަދަ ވިއްސާރައިގައި މެދުރާއްޖެތެރޭގެ ގިނަ ރަށްތަކެއްގައި ފެން ބޮޑުވެއްޖެއެވެ.

ނޭޝަނަލް ޑިޒާސްޓަރ މެނޭޖުމެންޓް އޮތޯރިޓީއިން ހިއްސާކޮށްފައިވާ ގޮތުގައި، ބޯކޮށް ވާރޭ ވެހުމުގެ ސަބަބުން ފެން ބޮޑުވެފައިވާކަމަށް މިހާތަނަށް ވަނީ ހަތަރު ރަށަކުން ރިޕޯޓުކޮށްފައެވެ. އެއީ ދ. ކުޑަހުވަދޫ އާއި ދ. މީދޫ އާއި ފ. ނިލަންދޫ އާއި ފ. މަގޫދޫއެވެ. އަދި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފައިވާ ގޮތުގައި، އދ. މާމިގިލީގައި ފެން ބޮޑުވެފައި ވުމުގެ ސަބަބުން ސިފައިން ވަނީ އެ ރަށުގައި ހަރަކާތްތެރި ވެފައެވެ.

މި ހާދިސާތަކާ ގުޅިގެން، މި ހުރިހާ ރަށެގައި އެމްއެންޑީއެފް އިން އަންނަނީ ފެން ހިންދުމަށް އެހީތެރިކަން ފޯރުކޮށްދެމުންނެވެ. އެގޮތުން މި މަސައްކަތުގައި އެމްއެންޑީއެފް މާލޭ އޭރިއާ ކޮމާންޑުންނާއި ސެންޓްރަލް އޭރިއާ ކޮމާންޑުން އަންނަނީ ހަރަކާތްތެރިވަމުންނެވެ.  

މީގެ އިތުރުން، އެމްއެންޑީއެފް އިން ސޯޝަލް މީޑިއާގައި ހިއްސާކޮށްފައިވާ ގޮތުގައި، އެމްއެންޑީއެފް ނޮދަން އޭރިއާއިން އަންނަނީ ރެއިން ފެށިގެން ށ. ނަރުދޫއަށް އުދަ އަރައި ރަށުތެރޭގައި ފެން ބޮޑުވެފައި ވުމުގެ ސަބަބުން، ފެން ހިންދުމުގައި އެ ރަށުގެ ރައްޔިތުންނަށް އެހީތެރިކަން ފޯރުކޮށްދެމުންނެވެ.

މެޓު އޮފީހުން ހާމަކޮށްފައިވާ ގޮތުގައި، މިހާރު ރާއްޖެއަށް ކުރަމުންދާ ވިއްސާރައަކީ މި ސަރަޙައްދުގައި އުފެދިފައިވާ ސަރކިއުލޭޝަނެއްގެ ސަބަބުން ކުރަމުންދާ ވިއްސާރައެކެވެ. އަދި މި ވިއްސާރަ އަލިކުރާނެކަމަށް ލަފާކުރެވެނީ އަންނަ ހޮނިހިރު ދުވަހުން ފެށިގެންކަމަށް ވެސް އެ އިދާރާއިން ވަނީ ހާމަކޮށްފައެވެ.