ޚަބަރު
މޫސުން ގޯސްވުމުގެ ސަބަބުން މިއަދުގެ ފްލައިޓް މޫވްމެންޓަކަށް ވެސް ވަނީ ބުރޫ އަރާފައި

ފްލައިމީ އެއާރލައިންގެ ފްލައިޓަކަށް މިއަދު މާމިގިއްޔަށް ނުޖެއްސިގެން އަނބުރާ މާލެ ގޮށްފައިވޭ

ފަރުދުން
03 ޖެނުއަރީ 2025، 07:21
03 ޖެނުއަރީ 2025، 07:21
ހުލާސާ
މޫސުން ގޯސްވުމުގެ ސަބަބުން މިއަދު ފްލައިމީ އެއާރލައިން، މޯލްޑިވިއަން އަދި އަޒޫރު އެއާރގެ ފްލައިޓުތަކެއްގެ މޫވްމެންޓަށް ބުރޫއަރާފައިވޭ.
ރާއްޖެއަށް މިހާރު ކުރަމުންދާ ވިއްސާރައިގައި، ރާއްޖޭގެ ސަރަހައްދުގެ ފްލައިޓް މޫވްމެންޓްތަކަށް ވެސް ވަނީ ބުރޫ އަރާފައެވެ.
އެގޮތުން މިއަދު ހެނދުނު 9 ޖަހާކަށްހާއިރު މާލެއިން ފުރައިގެން މާމިގިއްޔަށް ދަތުރުކުރި ފްލައިމީ އެއާރލައިންގެ ފްލައިޓަށް ވަނީ މާމިގިއްޔަށް ޖެއްސޭ ގޮތް ނުވެފައެވެ.
މި ނޫހަށް މައުލޫމާތު ލިބިފައިވާ ގޮތުގައި އެ ފްލައިޓަށް މާމިގިލި އެއާރޕޯޓަށް ނުޖެއްސުނީ، އެވަގުތު އެ ސަރަހައްދުގައި އޮތް ވިލާގަނޑު ވައި ނުޖެހުމުގެ ސަބަބުން ދައުރުވަމުން ނުދިއުމުންނެވެ. އެހެންކަމުން ޕައިލެޓުގެ ވިސިބިލިޓީ ދަށްވެ، އެންމެ ފަހުން އަނބުރާ ވެލާނާ އިންޓަނޭޝަނަލް އެއާރޕޯޓަށް އައުމަށް ނިންމިއެވެ.
އެ ފްލައިޓް އަނބުރާ އައިއިރު، މާލޭ ސަރަހައްދުގައި ވައި ގަދަވުމުގެ ސަބަބުން އަނެއްކާ ވެސް ގިނަ ވަގުތު ނުޖެއްސިގެން ވައިގެ ތެރޭގައި މަޑުކުރަން ޖެހުނެވެ. އަދި ފްލައިޓް ޖެއްސޭވަރަށް މޫސުން ރަގަޅުވެ، އެންމެ ފަހުން ފްލައިޓަށް ރަންވޭއަށް ތިރިކުރެވުނުއިރު، 11:30 ވެފައިވާ ކަމަށް މައުލޫމާތު ލިބެއެވެ.
މީގެ އިތުރުން، އެ ވަގުތު ވެލާނާ އިންޓަނޭޝަނަލް އެއާރޕޯޓަށް ޖައްސަން މަސައްކަތްކުރި މޯލްޑިވިއަން ފްލައިޓަކަށް ނުޖެއްސިގެން، އެ ފްލައިޓް ވަނީ މާފަރަށް ޑައިވާޓުކޮށްފައެވެ.
އަދި މިއަދު މެންދުރުފަހު ރަޝިއާއިން އައި އަޒޫރު އެއާރގެ ފްލައިޓަކަށް ނުޖެއްސިގެން ސްރީލަންކާގެ ކޮލޮމްބޯއަށް ޑައިވާޓްކޮށްފައިވާ ކަމުގެ މައުލޫމާތު ވެސް ވަނީ ލިބިފައެވެ.