ޚަބަރު
މެދުރާއްޖެތެރެއަށް ނެރުނު އޮރެންޖު އެލާޓް މިރޭ 11 ޖަހާއިރަށް ދަންމާލައިފި

ކަނޑުގަދަ ދުވަހެއްގައި ދޯންޏެއް ދަތުރު ކުރަނީ، ފޮޓޯ: ކޮރަލް ގްލާސް

ފަރުދުން
03 ޖެނުއަރީ 2025، 08:43
03 ޖެނުއަރީ 2025، 08:43
ހުލާސާ
މޯލްޑިވްސް ޕޮލިސް ސާރވިސް އިން ވަނީ، ގޭގެއަށް ފެން ވަންނަމުން ދިއުމުގެ ސަބަބުން މަގުތަކުން ފެން ހިނދި އާންމު ހާލަތަށް އަންނަންދެން ބަރު އުޅަނދު ދުއްވުން މަނާކޮށްފައި.
މިއަދު 3:00 އިން ފެށިގެން މެދުރާއްޖެތެރެއަށް ނެރުނު އޮރެންޖު އެލާޓު މިރޭ 11:00 އާ ހަމައަށް ދަންމާލައިފިއެވެ. ކުރިން މި އިންޒާރު ނެރިފައި އޮތީ މިރޭގެ 7:00 އާ ހަމައަށެވެ.
އޮރެންޖު އެލާޓު ދަންމާލާފައިވާއިރު، ބޯކޮށް ވާރޭ ވެހުމާ ގުޅިގެން ފެންބޮޑުވެދާނެކަމަށް ސަމާލުކަން ދިނުމަށް މޯލްޑިވްސް މީޓިއޮރޮލޮޖިކަލް ސަރވިސް އިން ވަނީ އިލްތިމާސްކޮށްފައެވެ.
މި ވާރޭގެ ސަބަބުން މާލެ ހިމެނޭހެން ގިނަ ރަށްތަކެއްގައި ފެން ބޮޑުވެގެން ފެން ހިންދުމުގައި މޯލްޑިވެސް ނޭޝަނަލް ޑިފެންސް ފޯސް (އެމްއެންޑީއެފް) އިން އަންނަނީ ހަރަކާތްތެރިވަމުންނެވެ.
މާލޭގެ އިތުރުން، މާލެ އަތޮޅު ގުރައިދޫ އާއި އދ. މާމިގިއްޔާއި ފ. ނިލަންދޫއާއި ދ. ކުޑަހުވަދޫ އާއި ދ. މީދޫ އަދި ފ. މަގޫދޫގައި ފެން ހިންދުމުގެ މަސައްކަތް އަންނަނީ ކުރަމުންނެވެ.
މާލޭގައި ފެން ބޮޑުވެފައި ވުމުގެ ސަބަބުން މާލޭ ސިޓީ ކައުންސިލުންނާއި މޯލްޑިވްސް ޕޮލިސް ސާރވިސް އިން އަންނަނީ ވެލި ބަސްތާ ޖެއްސުމުގެ މަސައްކަތް އެކި ސަރަހައްދު ތަކުގައި ކުރަމުންނެވެ.
އަދި މޯލްޑިވްސް ޕޮލިސް ސާރވިސް އިން ވަނީ، ގޭގެއަށް ފެން ވަންނަމުން ދިއުމުގެ ސަބަބުން މަގުތަކުން ފެން ހިނދި އާންމު ހާލަތަށް އަންނަންދެން ބަރު އުޅަނދު ދުއްވުން މަނާކޮށްފައެވެ. މީގެ އިތުރުން ޒަރޫރީ ބޭނުންތަކުގައި ނޫނީ ހަތަރު ފުރޮޅުލީ އުޅަނދު ނުދުއްވުމަށް ވެސް ޕޮލިހުން ވަނީ އެދިފައެވެ.