އެޕަލްގެ ސިރީ އެސިސްޓެންޓް އަޑުއަހަމުންދިޔަކަމަށް ބުނެ 95 މިލިއަން ޑޮލަރު ދައްކަން އެއްބަސްވެއްޖެ

ޓެކްނޮލޮޖީ ދުނިޔޭގެ ބޮޑު ކުންފުންޏެއް ކަމަށްވާ އެޕަލް އިން، އެ ކުންފުނީގެ ވާރޗުއަލް އެސިސްޓެންޓް ކަމަށްވާ ސިރީ މެދުވެރިކޮށް ކަސްޓަމަރުންގެ އަޑު ހުއްދަނެތި ރެކޯޑުކޮށް އަޑުއަހަމުން ދިޔަކަމަށް ތުހުމަތުކޮށް ކުރެވުނު ދަޢުވާއެއް ހައްލުކުރުމަށް 95 މިލިއަން އެމެރިކާ ޑޮލަރު (77 މިލިއަން ޕައުންޑް) ދައްކަން އެއްބަސްވެއްޖެއެވެ.

މި މައްސަލައިގައި ދަޢުވާކުރި ފަރާތްތަކުން ބުނެފައިވަނީ އެޕަލްގެ ސިރީ އެސިސްޓެންޓް މެދުވެރިކޮށް ރެކޯޑުކުރެވުނު އަޑުތައް އިޝްތިހާރުކުރާ ފަރާތްތަކާ ހިއްސާކޮށްފައިވާ ކަމަށެވެ. ނަމަވެސް އެޕަލްއިން މިކަން ދޮގުކޮށް، އެއްވެސް ކުށެއް ކޮށްފައިވާކަން ޤަބޫލުކޮށްފައެއް ނުވެއެވެ.

މި މައްސަލައިގެ މައިގަނޑު ދަޢުވާކުރާ ފަރާތް ކަމަށްވާ ފުމިކޯ ލޯޕެޒް ބުނެފައިވަނީ އޭނާއާއި އޭނާގެ ދަރިފުޅުގެ އަޑު ހުއްދަނެތި ރެކޯޑުކޮށްފައިވާ ކަމަށެވެ. އަދި އެ ދެމީހުން ވާހަކަދެއްކި ބައެއް އުފެއްދުންތަކުގެ އިޝްތިހާރުތައް އޭގެފަހުން ފެންނަން ފެށިކަމަށް ވެސް ބުނެފައިވެއެވެ.

މި މައްސަލައިގައި އެޕަލްއިން ހުށަހަޅާފައިވަނީ 2024 ވަނަ އަހަރުގެ ފެބްރުއަރީ 14 ވަނަ ދުވަހު ނޯދަން ކެލިފޯނިއާގެ ކޯޓުން ނިންމުމެއް ނެރުމަށެވެ. މި މައްސަލައިގައި ކާމިޔާބު ލިބިއްޖެނަމަ، 2014 އާއި 2019 އާ ދެމެދު ސިރީ އެނޭބަލްޑް ޑިވައިސްއެއް ބޭނުންކުރި ކޮންމެ އެމެރިކާ ރައްޔިތަކަށް 20 ޑޮލަރާ ހަމައަށް ލިބިދާނެ ކަމަށް ވެއެވެ.

އެޕަލްއިން މި މައްސަލަ ހައްލުކުރުމަށް އެއްބަސްވުމުން، އެ ކުންފުނިން ކުށެއް ކުރިކަން ޤަބޫލުކުރުމުގެ އިތުރުން، ކޯޓަށް ގޮސްގެން މާ ބޮޑު އަދަދެއް ދައްކަން ޖެހުމުގެ ރިސްކުން ސަލާމަތްވެފައިވެއެވެ. އެޕަލްއަކީ ފާއިތުވި އަހަރުތަކުގައި މިފަދަ އެތައް މައްސަލައެއްގައި ބައިވެރިވެފައިވާ ކުންފުންޏެކެވެ.