ކޮރަޕްޝަންގެ މައްސަލަތަކެއް ރިޕޯޓުކުރި އިންޑިއާގެ ނޫސްވެރިއަކު މަރާލާފައި އޮއްވާ ފެނިއްޖެ

ކޮރަޕްޝަންގެ މައްސަލަތަކެއް ރިޕޯޓުކުރި އިންޑިއާގެ ނޫސްވެރިއަކު މަރާލާފައި އޮއްވާ ޖަންކްޝަން ޓޭންކެއްގެ ތެރެއިން ފެނިއްޖެއެވެ. އޭނާއަކީ އާންމު ގޮތެއްގައި އިންޑިއާގެ ކޮންސްޓްރަކްޝަން ދާއިރާގައި ހުރި ކޮރަޕްޝަންގެ މައްސަލަތައް އާންމުންނަށް ތިލަކޮށްދެމުން ދިޔަ ނޫސްވެރިއެކެވެ. 

މިކަން ހިނގާފައިވަނީ އިންޑިއާގެ ޗައްތިޝްގަރް ސްޓޭޓްގައެވެ.

ފްރީލޭންސްކޮށް މަސައްކަތްކުރާ އުމުރުން 32 އަހަރުގެ މުކޭޝް ޗަންދުރަކަރު ގެއްލިގެން އޭނާގެ އާއިލާއިން އެކަން ޕޮލިހުންނަށް ރިޕޯޓުކުރީ މި އަހަރުގެ ފުރަތަމަ ދުވަހުއެވެ. އޭގެ ދެ ދުވަސް ފަހުން އޭނާގެ ހަށިގަނޑު ފެނުނީ، ޕޮލިހުން އޭނާގެ މޯބައިލް ފޯން ޓްރެކްކޮށްގެން ބެލިބެލުމުންނެވެ.

ރިޕޯޓުތައް ބުނާ ގޮތުން، މި ހާދިސާއާ ގުޅިގެން މިހާތަނަށް ތިން މީހަކު ހައްޔަރުކޮށްފައިވާއިރު މީގެ ތެރެއިން ދެ މީހުންނަކީ، މަރާލާފައިވާ ނޫސްވެރިޔާއާއި އާއިލީ ގޮތުން ގުޅުން އޮންނަ ދެ މީހުންވެ. އަދި އިންޑިއާގެ މީޑިއާތަކުން ރިޕޯޓުކޮށްފައިވާ ގޮތުގައި، މީގެ ތެރެއިން އެކަކީ ޗަންދުރަކަރާއި ދެބެއިންގެ ދެދަރި ގުޅުން އޮންނަ ފަރާތެކެވެ. 

މި މައްސަލަ ތަހުގީގު ކުރަމުން އަންނަ ބަޖިޕޫރްގެ ޕޮލިހުން ހާމަކޮށްފައިވާ ގޮތުގައި، ޗަންދުރަކަރުގެ ހަށިގަނޑު ފެނުނުއިރު އޭނާއަށް ބޮޑެތި އަނިޔާތަކެއް ދީފައިވާކަމުގެ ނިޝާންތައް ފެންނަން ހުއްޓެވެ. 

ޗަންދުރަކަރުގެ މަރާ ގުޅިގެން 'ޕްރެސް ކައުންސިލް އޮފް އިންޑިއާ' ވަނީ މި މައްސަލަ ތަހުގީގުކޮށް، މި ކަމުގައި ޝާމިލްވާ ފަރާތްތަކަށް ހަރުކަށި އަދަބު ދިނުމަށް ގޮވާލާފައެވެ. 

އެ ސްޓޭޓްގެ ޗީފް މިނިސްޓަރ މި ހާދިސާ ސިފަކުރަނީ، ހިތް ފަޅައިގެންދާވަރުގެ ހިތާމަވެރި ހާދިސާއެއްގެ ގޮތުގައެވެ. އަދި މި މައްސަލަ ތަހުގީގު ކުރުމަށް ހާއްސަ ޓީމެއް އެކުލަވާލާފައިވާކަމަށް ވެސް އޭނާ ވަނީ އެކްސްގައި ކުރި ޕޯސްޓެއްގައި ބުނެފައެވެ. 

ކޮރަޕްޝަންގެ މައްސަލަތައް ރިޕޯޓުކުރާ ނޫސްވެރިންނަށް އަބަދުވެސް އިންޑިއާގައި ބިރުވެރިކަން އޮވެއެވެ. އެގޮތުން 2022 ވަނަ އަހަރުގެ މޭ މަހުގައި ވެސް މިފަދަ ހާދިސާއެއް ވަނީ ހިނގާފައެވެ. ސުބްހަޝް ކުމާރު މަޓޯ ނަމަކަށް ކިޔާ ނޫސްވެރިއަކު އޭރު މަރާލާފައިވަނީ ވަގަށް ވެލިނަގާ މައްސަލައެއް ރިޕޯޓުކޮށްގެން، އޭނާ ދިރިއުޅެމުން ދިޔަ ގޭގެ ބޭރުގައި ހުއްޓާ ބޮލަށް ބަޑިޖަހައިގެންނެވެ.