ޖަލުގައި ހުރި މެލޭޝިއާގެ ކުރީގެ ބޮޑު ވަޒީރު ގޭބަންދަށް ބަދަލު ކުރުމަށް ނިންމައިފި

ޖަލުގައި ހުރި މެލޭޝީއާގެ ކުރީގެ ބޮޑު ވަޒީރު، ނަޖީބް ރަޒަކްއަށް ކޮށްފައިވާ ޖަލު ހުކުމް ގޭބަންދަށް ބަދަލުކޮށްދިނުމަށް އެދި އޭނާގެ ފަރާތުން އެ ގައުމުގެ އިސްތިއުނާފު ކޯޓަށް ހުށަހެޅި މައްސަލައިގައި، ނަޖީބްގެ ފަރާތުން އެދުނު ގޮތަށް ކޯޓުން ނިންމައިފިއެވެ. ނަޖީބުއަށް ޖަލު ހުކުމެއް އައީ، އޭނާ ބޮޑުވަޒީރު ކަމުގައި ހުންނަވައިގެން މެލޭޝިއާގެ ތާރީހުގައި ހިންގާފައިވާ އެންމެ ބޮޑު ހިޔާނާތުގައި ޝާމިލުވާކަމަށް ޝަރީއަތުން ކަނޑައެޅުމާ ގުޅިގެންނެވެ.

އިސްތިއުނާފު ކޯޓުގެ ތިން މެމްބަރުންގެ ބެންޗުގެ ދެ މެމްބަރުންގެ ވޯޓާއެކު މި މައްސަލަ ނަޖީބު ކޮޅަށް ނިންމީ، މި މައްސަލަ އަލުން ހައިކޯޓަށް ހުށަހެޅުމަށް ހުކުމްކުރުމަށްފަހުއެވެ.

އެތައް ބިލިއަން ޑޮލަރެއްގެ ކޮރަޕްޝަންގެ މި މައްސަލައިގެ ޖަލު ހުކުމް ތަންފީޒުކުރަން ފެށިފަހުން، އެ ގައުމުގެ ރަސްފާނު އޭނާ ގޭބަންދަށް ބަދަލުކޮށްދިނުމަށް އެންގި ނަމަވެސް އެކަން ތަންފީޒު ނުކުރާކަމަށް ބުނެ، މިދިޔަ އަހަރުގެ ޖުލައިމަހު ނަޖީބް ވަނީ އެ ގައުމުގެ ދަށު ކޯޓަކަށް މައްސަލަ ހުށަހަޅާފައެވެ. ނަމަވެސް ރަސްގެފާނުގެ އެފަދަ އަމުރެއް އައިނަމަ އެކަން ތަންފީޒު ކުރީސްކަމަށް އަންގައި، އެ މައްސަލަ ވަނީ ކޯޓުން ބޭރުކޮށްލާފައެވެ.

މެލޭޝީއާގެ ޕާރޑަން ބޯޑުގެ ޗެއަރއަކަށް އިންނަވަނީ އެއިރެއްގެ ރަސްގެފާނެކެވެ. އެގޮތުން، ފަސް އަހަރުން ބަދަލުވާ ރަސްގެފާނުގެ މަގާމުގައި ކުރިން ހުންނެވި އައްސުލްތާން އަބްދުﷲ އަޙުމަދު ޝާހު ވަނީ، ނަޖީބުގެ 12 އަހަރުގެ ޖަލު ހުކުމް 6 އަހަރަށް ކުޑަކޮށްދީފައެވެ. އަދި މި ލުޔާއެކު އޭނާ ގޭބަންދައް ބަދަލުކުރަން ނިންމާފައިވާކަމަށް ވެސް ނަޖީބު އަޑު ފެތުރިއެވެ. ނަމަވެސް ކަމާގުޅުންހުރި އިދާރާތަކުން ވަނީ މިކަން ދޮގުކޮށްފައެވެ. 

މި މައްސަލައާ ގުޅިގެން މެލޭޝީއާގެ ހޯމް މިނިސްޓަރު ބުނެފައިވަނީ، ނަޖީބު ގޭބަންދަށް ބަދަލު ކުރުމުގެ އެއްވެސް އޯޑަރެއް މިދިޔަ އަހަރު ލިބިފައިނުވާކަމަށާއި، އެފަދަ އޯޑަރެއް ލިބުނުނަމަ އެކަން ތަންފީޒުކުރީސް ކަމަށެވެ.

ނަޖީބުގެ މައްޗަށް ކޮރަޕްޝަންގެ ކުށް ސާބިތުވީ 2020 ވަނަ އަހަރުއެވެ. އޭނާގެ މައްޗަށް އުފުލާފައިވަނީ، މަގާމުގެ ފައިދާ ނާޖާއިޒުގޮތުގައި ނަގައި، ދައުލަތުގެ މާލިއްޔަތަށް ހިޔާނާތްތެރިވިކަމުގެ ޖިނާއީ ދައުވާއެވެ. އޭނާ އެކަންކުރީ، ގައުމުގެ އިޤްތިޞާދީ ދުވެލި ބާރުކުރުމަށްކަމަށް ބުނެ އުފައްދާފައިވާ '1 މެލޭޝިއާ ޑިވެލޮޕްމެންޓް ބާރހެޑް' ބޭނުންކޮށްގެނެވެ. 

މި މައްސަލައާ ގުޅޭ ބައެއް ތަހުގީގުތައް އަދިވެސް އަންނަނީ ހިންގަމުންނެވެ.