ފަހަތުން އަރައި އިންޓާރ ބަލިކޮށް އޭސީ މިލާނުން އިޓާލިއަން ސުޕަރ ކަޕް ކާމިޔާބުކޮށްފި

އިންޓާރ މިލާނުން ދެ ގޯލު ކާމިޔާބުކޮށްފައި ވަނިކޮށް، ފަހަތުން އަރައި 3-2 އިން އޭސީ މިލާނުން އިޓާލިއަން ސުޕަރ ކަޕް ކާމިޔާބުކޮށްފިއެވެ.

ސައުދީ އަރަބިއްޔާގެ ރިޔާޟުގައި ކުޅުނު މި މެޗު އޭސީ މިލާނުގެ ކޮޅަށް އަނބުރާލުމުގައި، ދެވަނަ ހާފުގައި ކުޅެން ނިކުން ރަފެއަލް ލިއާއޯގެ ދައުރު ބޮޑެވެ. އޭނާ ވަނީ މިލާނުން ކާމިޔާބުކުރި ތިން ގޯލުގައި ވެސް ދައުރެއް އަދާކޮށްފައެވެ. 

މިއީ 2022 ވަނަ އަހަރު ލީގު ކާމިޔާބުކުރި ފަހުން މިލާނުން ކާމިޔާބުކުރި ފުރަތަމަ ތައްޓެވެ. އަދި 2016 ވަނަ އަހަރުގެ ފަހުން ކާމިޔާބުކުރި ފުރަތަމަ ސުޕަރ ކަޕް ތަށި ވެސް މެއެވެ. އެ ޓީމުން މިހާރު މިވަނީ މި މުބާރާތް 8 ފަހަރު ކާމިޔާބުކޮށްފައެވެ.

އިންޓާރ އިން މި މެޗުގައި ލީޑު ނަގާފައިވަނީ ފުރަތަމަ ހާފުގެ އިތުރު ވަގުތުގައި، ލައުޓާރޯ މާޓިނޭޒްގެ ގޯލަކުންނެވެ. އަދި އެ ޓީމުން ލީޑު ފުޅާކުރީ ދެވަނަ ހާފުގެ ދެވަނަ މިނެޓުގައި، މެހްދީ ޓަރޭމީ ކާމިޔާބުކުރި ގޯލަކުންނެވެ. އެ ގޯލާއެކު އިންޓާރ އިން ލީގުގެ ތަށީގައި އެއް އަތުން ހިފިކަމަށް ބެލެވުނެވެ. 

ނަމަވެސް ލިއާއޯއަށް ކުރި ފަހުލަކަށް އިންޓާރގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުން ކާމިޔާބުކޮށް، ތެއޯ ހެނާންޑޭޒް މެޗުގެ 52 ވަނަ މިނެޓުގައި މިލާނުގެ ފުރަތަމަ ގޯލު ކާމިޔާބުކުރިއިރު، މެޗު ނިމެން 10 މިނެޓަށްވެފައި ވަނިކޮށް، ސެމީ ފައިނަލުގައި ޖުވެންޓަސް ކޮޅަށް ވެސް ގޯލެއް ކާމިޔާބުކުރި ކްރިސްޓިއަން ޕުލިސިޗް ވަނީ މިލާނަށް މެޗުގެ ނަތީޖާ ހަމަހަމަކޮށްދީފައެވެ. 

މިލާން މެޗުން މޮޅުވި ގޯލު ކާމިޔާބުކޮށްފައިވަނީ އިތުރު ވަގުތުގައެވެ. ލިއާއޯއަށް ކަނާތް ފަރާތުން ޕުލިސިޗް ދުއްވާލި ތުރޫ ޕާސް އެއް ޓަޗުން ގޯލުގެ ކުރިމައްޗަށް ކަނޑާލުމުން، ޓޭމީ އަބްރަހަމްއަށް އެ ބޯޅަ ގޯލުގެ ތެރެއަށް ފޮނުވާލުމަށް މާ ބޮޑު މަސައްކަތެއް ކުރާކަށް ނުޖެހުނެވެ. 

މިއީ މިދިޔަ ހަފްތާގައި މިލާނާއި ހަވާލުވި އައު ކޯޗު، ސާޖިއޯ ކޮންސީކާއޯއާއެކު މިލާނުން ކާމިޔާބުކުރި ފުރަތަމަ ތައްޓެވެ. އޭނާގެ އިރުޝާދުގެ ދަށުން އެ ޓީމު މިހާތަނަށް ދެ މެޗު ކުޅެފައިވާއިރު، ދެ މެޗު ވެސް ވިމަނީ ކާމިޔާބުކޮށްފައެވެ. އެންމެ ފުރަތަމަ އެ ޓީމުން ކާމިޔާބުކުރީ މި މުބާރާތުގައި ޔުވެންޓަސްއާ ދެކޮޅަށް ކުޅުނު ސެމީ ފައިނަލް މެޗެވެ.

މިއީ މި މުބާރާތް ސައުދީގައި ކުޅުނު ފަސްވަނަ ފަހަރެވެ. އަދި މުބާރާތުގެ ފޯމެޓަށް މިދިޔަ އަހަރު ގެނައި ބަދަލާއެކު، މިއީ ހަތަރު ޓީމާއެކު މުބާރާތް ކުޅުނު ދެވަނަ ފަހަރު ވެސް މެއެވެ. 

ކުރިން ދެ ޓީމުގެ މެދުގައި ކުޅުނު ސުޕަރ ކަޕްގެ ފޯމެޓު ބަދަލުކުރިފަހުން ކުޅުނު ފުރަތަމަ މުބާރާތް މިދިޔަ އަހަރު ކާމިޔާބުކޮށްފައި ވަނީ އިންޓާރއެވެ.