ޓެރަރިސްޓު ހަމަލާއެއްގައި އިންޑިއާގެ ގިނަ ސިފައިންތަކެއް މަރުވެއްޖެ

އިންޑިއާގެ މެދުތެރޭ ހިސާބެއް ކަމުގައިވާ ޗަތިޝްގަރުގައި ބޮމެއް ގޮއްވާލައި ދިން ޓެރަރިސްޓު ހަމަލާއެއްގައި އެ ގައުމުގެ އަސް ފުލުހުންނާއި އާންމުންގެ މީހަކު މަރުވެއްޖެއެވެ. 

މި ހަމަލާދީފައިވަނީ، ޗަތިޝްގަރުގެ ބިޖަޕޫރު ޑިސްޓުރިކްޓުގައި ދުއްވަމުން ދިޔަ ފުލުހުންގެ އުޅަނދަކަށް އަމާޒުކޮށް، އެ ގައުމުގައި ހަރަކާތްތެރިވަމުންދާ ހަނގުރާމަވެރި ޖަމާޢަތެއް ކަމަށްވާ މައޮއިސްޓުންނެވެ. 

މި ޖަމާއަތަކީ އިންޑިޔާގެ ފަޤީރު ދަނޑުވެރިންނާއި ލޭބަރުންގެ ހައްގުގައިކަމަށް ބުނެ މަސައްކަތް ކުރަމުން އަންނަ ޓެރަރިސްޓު ޖަމާއަތެކެވެ. މި ޖަމާއަތުން ބުނަމުން އަންނަނީ، އެ މީހުން މަސައްކަތްކުރަނީ ފަޤީރު ދަނޑުވެރިންނާއި ލޭބަރުންނަށް އެ މީހުންގެ ބިމުގެ މައްޗަށް ފުރިހަމަ ބާރު ހޯދައިދިނުމަށެވެ.

މި ޖަމާޢަތް ހިންގަނީ ޗައިނާގެ ކުރީގެ ލީޑަރެއް ކަމަށްވާ މާއޯ ޒެދޮންގެ ފިކުރުގެ މައްޗަށް ބިނާކޮށެވެ. އަދި މި ޖަމާއަތުން ދޭތެރެދޭތެރެއިން ޗަތިޝްގަރުގެ އެކި ހިސާބުތަކުގައި ޓެރަރިސްޓު އަމަލުތައް އަންނަނީ ހިންގަމުންނެވެ. 

އަދި ސިފައިންނާ ދެމެދު މީގެ ކުރިން ބަދަލުކޮށްފައިވާ ހަމަލާތަކުގައި މޮއިސްޓުންގެ ގިނަ ހަނގުރާމަވެރިންތަކެއް މަރާލެވިފައިވެއެވެ.