ކުޅިވަރު

އިނގިރޭސި ލީގު ކަޕްގެ ފުރަތަމަ ލެގުން ލިވަޕޫލްއާ އާސެނަލް ބަލިވެއްޖެ

އިނގިރޭސި ލީގު ކަޕްގެ ފުރަތަމަ ލެގުން ލިވަޕޫލްއާ އާސެނަލް ބަލިވެއްޖެ

ލިވަޕޫލްކޮޅަށް ގޯލު ޖެހުމަށްފަހު ސްޕާސްގެ ބެރިވާލް އުފާފާޅުކުރަނީ، ފޮޓޯ: ގެޓީ އިމޭޖަސް

މިފްތާޙް މުޙައްމަދު

މިފްތާޙް މުޙައްމަދު

09 ޖެނުއަރީ 2025، 09:20

09 ޖެނުއަރީ 2025، 09:20

ހުލާސާ

ފުރަތަމަ ލެގުން ބަލިވި ނަމަވެސް، ފައިނަލުގެ ޖާގަތައް ކަނޑައެޅިގެން ދާނީ ފެބުރުއަރީ 6 އަދި 7 ގައި ކުޅޭ ސެމީފައިނަލް ދެވަނަ ލެގަށްފަހު.

އިނގިރޭސި ލީގު ކަޕް ނުވަތަ ކަރަބޯ ކަޕްގެ ސެމީ ފައިނަލްގެ ފުރަތަމަ ލެގުގައި ނިއުކާސްލް ޔުނައިޓެޑުން އާސެނަލްގެ މައްޗަށް ކުރިހޯދިއިރު، ޓޮޓެންހަމް ހޮޓްސްޕާސް އިން ލިވަޕޫލް ބަލިކޮށްފިއެވެ. 

މި މުބާރާތުގެ ސެމީފައިނަލްގެ ފުރަތަމަ ލެގުގެ ފުރަތަމަ މެޗުގައި އަންގާރަ ދުވަހުގެރޭ އެމިރޭޓްސް ސްޓޭޑިއަމްގައި ކުޅުނު މެޗު ނިއުކާސްލްއިން ކާމިޔާބުކުރީ 2-0 އިންނެވެ. އެ މެޗުގައި ނިއުކާސްލްގެ ގޯލުތައް ކާމިޔާބުކުރީ، އެންތޮނީ ގޯޑަން އާއި އެލެކްސެންޑަރ އިސާކްއެވެ.

އެ މެޗުގައި އާސެނަލްއިން 23 ޝޮޓު ހަދާފައިވާއިރު، އެ ޓީމަށް ގޯލާ އަމާޒުކުރެވިފައި ވަނީ އެންމެ ތިން ހަމަލާއެވެ. ނަމަވެސް މި މުބާރާތުގައި އެންމެ ފަހުން ކުޅުނު ތިން މެޗުން އާސެނަލް ވަނީ 11 ގޯލު ކާމިޔާބުކޮށްފައެވެ. 

މި މެޗަށްފަހު ވާހަކަ ދައްކަމުން އާސެނަލްގެ ކޯޗު، މައިކަލް އާޓޭޓާ ބުނީ މުބާރާތް ކުޅޭ ބޯޅައިގެ ސަބަބުން ކުޅުންތެރިންނަށް އުނދަގޫވި ކަމަށެވެ. 

ކުޅުންތެރިން އާންމުކޮށް ބޭނުންކުރަނީ ޕްރިމިއަރ ލީގުގައި ކުޅޭ ނައިކް ބްރޭންޑުގެ ބޯޅައެވެ. އަދި ކަރަބޯ ކަޕް ކުޅެނީ ޕޫމާ ކުންފުނިން ހަދާ ބޯޅައެއްގައެވެ. ނަމަވެސް މެޗުގެ ކުރިން ޕްރެކްޓިސް ކުރުމަށް މުބާރާތް ކުޅޭ ބޯޅަ އަބަދުވެސް ޓީމުތަކަށް ދެއެވެ.

ބުދަ ދުވަހުގެރޭ ލިވަޕޫލްއާ ސްޕާސް ބައްދަލުކުރި މެޗު ސްޕާސް އިން ކާމިޔާބުކުރީ 1-0 އިންނެވެ. 

މި މެޗުގައި ލިވަޕޫލްގެ ފަރާތުން ދަށް ކުޅުމެއް ފެނުނުއިރު، މި ފަހަކުން ރަގަޅު ނަތީޖާތަކެއް ނެރެވިފައިނުވާ ސްޕާސްވަނީ ރަގަޅު ކުޅުމެއް ދައްކާފައެވެ. 

ސްޕާސްގެ ހަމައެކަނި ގޯލް މެޗު ނިމެން 4 މިނެޓަށްވެފައި ވަނިކޮށް ކާމިޔާބުކުރީ، އެ ޓީމުގެ ޒުވާން މިޑްފީލްޑަރ، ބެރިވާލްއެވެ. 

މި މުބާރާތުގެ ސެމީ ފައިނަލްގެ ދެވަނަ ލެގުގެ މެޗުތައް ކުޅެން ހަމަޖެހިފައިވަނީ ފެބުރުއަރީ 6 އަދި 7 ގައެވެ.

މި ލިޔުން ކިޔާލުމުން

Ads by MSS