އެތުލެޓިކް ކްލަބް ބަލިކުރުމަށްފަހު ބާސެލޯނާއިން ސްޕެނިޝް ސުޕަ ކަޕްގެ ފައިނަލުން ޖާގަ ހޯދައިފި

ޔަމާލް އާއި ގަވީގެ ގޯލުތަކުން އެތުލެޓިކް ކްލަބް ބަލިކުރުމަށްފަހު ބާސެލޯނާއިން ސްޕެނިޝް ސުޕަ ކަޕް ފައިނަލުގެ ފުރަތަމަ ޖާގަ ހޯދައިފިއެވެ.

ސައުދީ އަރަބިއްޔާގެ ކިންގް އަބްދުﷲ ސްޕޯޓްސް ސިޓީ ސްޓޭޑިއަމްގައި ކުޅުނު މި މެޗު ބާސެލޯނާއިން ފެށީ ވަރަށް ވަރުގަދަކޮށެވެ. އެގޮތުން އެ ޓީމުން ވަނީ މެޗުގެ 17 ވަނަ މިނެޓުގައި ފުރަތަމަ ގޯލު ކާމިޔާބުކޮށްފައެވެ. މި ގޯލު، އަލެހާންޑްރޯ ބާލްޑޭގެ ޕާހަކުން އެ ޓީމަށް ކާމިޔާބުކޮށްދިނީ ގަވީއެވެ. 

ބާސެލޯނާއަށް މެޗުގެ ދެވަނަ ގޯލު ކާމިޔާބުކޮށްދިނީ، ދެވަނަ ހާފުގެ 7ވަނަ މިނެޓުގައި އެ ޓީމުގެ ޒުވާން ކުޅުންތެރިޔާ، ލެމީން ޔަމާލްއެވެ.

މެޗު ނިންމެ ގާތްވެފައި ވަނިކޮށް، އެތުލެޓިކްގެ އިނާކީ ވިލިއަމްސް ގޯލެއް ކާމިޔާބުކުރިއެވެ. ނަމަވެސް ރެފްރީ ނިންމީ އެ ގޯލު އޮފްސައިޑް ކަމަށެވެ.

ފައިނަލުގައި ބާސެލޯނާއާ ބައްދަލުކުރާނީ، މިރޭ ކުޅޭ ސެމީފައިނަލްގެ ދެވަނަ މެޗުން މޮޅުވާ ޓީމެކެވެ. މިރޭ ކުޅޭ މެޗުގައި ބައްދަލުކުރާނީ ރިއާލް މެޑްރިޑާއި މަޔޯކާއެވެ. 

ރޭ ކުޅުނު ސެމީފައިނަލް މެޗުގައި ބާސެލޯނާގެ ޑެނީ އޮލްމޯ އާއި ޕައު ވިކްޓަރއަށް ކުޅެވިފައެއް ނުވެއެވެ. އެއީ އެ ދެ ކުޅުންތެރިން ޓީމުގައި ރެޖިސްޓަރ ކުރުމުގެ ވަގުތީ ހުއްދަ ސްޕެނިޝް ސްޕޯޓްސް ކައުންސިލުން ދީފައިވާލެއް ލަސްކަމުންނެވެ. 

ލަލީގާގެ ބައެއް އުސޫލުތަކާ ފުށުއެރުމުގެ ސަބަބުން އެ ދެ ކުޅުންތެރިން ޓީމުގައި ރެޖިސްޓްރީކޮށްފައިވަނީ ސީޒަންގެ ފުރަތަމަ ހާފަށް އެކަންޏެވެ. އުސޫލުތަކާ ހިލާފުވެފައިވުމާ ގުޅިގެން ސްޕެނިޝް ފުޓުބޯޅަ ފެޑެރޭޝަނުން މި ކުޅުންތެރިން ރެޖިސްޓަރ ކުރުމަށް ބާސެލޯނާއިން ހުށަހެޅުމުން އެކަން ފުރަތަމަ ބަލައެއް ނުގަތެވެ. ނަމަވެސް ސްޕެނިޝް ސްޕޯޓްސް ކައުންސިލުން ފަހުން ވަނީ މިކަމުގައި ވަގުތީ ހުއްދައެއް ދީފައެވެ.

އެހެންކަމުން އާދިއްތަ ދުވަހު ކުޅޭ މި މުބާރާތުގެ ފައިނަލް މެޗުގައި މި ދެ ކުޅުންތެރިންނަށް ކުޅެވޭނެއެވެ.