ކުޅިވަރު

ބުންޑަސްލީގާ: ކޭންގެ ގޯލަކުން ހަނިގޮތަކަށް ބެޔާން މޮޅުވެއްޖެ

ބުންޑަސްލީގާ: ކޭންގެ ގޯލަކުން ހަނިގޮތަކަށް ބެޔާން މޮޅުވެއްޖެ

ގޯލު ކާމިޔާބުކުރުމަށްފަހު ހެރީ ކޭން އުފާފާޅުކުރަނީ، ފޮޓޯ: ގެޓީ އިމޭޖަސް

މިފްތާޙް މުޙައްމަދު

މިފްތާޙް މުޙައްމަދު

12 ޖެނުއަރީ 2025، 09:12

12 ޖެނުއަރީ 2025، 09:12

ހުލާސާ

މި މެޗުން ލިބުނު ތިން ޕޮއިންޓަކީ ލީގުގެ އެއްވަނައިގައި އޮތް ލީޑު ދެމެހެއްޓުމަށް އެ ޓީމަށް ލިބުނު މުހިންމު ޕޮއިންޓުތަކެއް.

ޖައުމަނު ބުންޑަސްލީގާގައި، ހެރީ ކޭންގެ ގޯލަކުން ލީގުގެ އެއްވަނައިގައި އޮތް ބެޔާން މިއުނިކް ހަނިގޮތަކަށް މޮޅުވެއްޖެއެވެ.

ވިންޓަރ ބްރޭކަށްފަހު އެނބުރި އައިސް ބޮރޫޝަ މޮންޝެންގްލަބެކްއާ ދެކޮޅަށް ކުޅުނު އަހަރުގެ ފުރަތަމަ މެޗުގައި ބެޔާން ފެނުނީ އެޓޭކިން ދަށް ޓީމެއްގެ ގޮތުގައެވެ. އަދި ގިނަ ވަގުތު ބޯޅަ ހިފަހައްޓައިގެން ކުޅުނު ނަމަވެސް، ގޯލެއް ކާމިޔާބު ކުރެވޭ ވަރުގެ ހަމަލާއެއް އެ ޓީމަށް ފުރަތަމަ ހާފުގައި އުފެއްދިފައެއް ނުވެއެވެ. 

އެގޮތުން، އެ ޓީމުގެ ފޯވާޑް، ތޯމަސް މުލާރއަށް މޮންޝެންގްލަބެކްއާގެ ގޯލްކީޕަރު، މޮރިޓްސް ނިކޮލަސްއާއެކު ލިބުނު ވަން-އޮން-ވަން ފުރުސަތު ވެސް ފޮނުވާލެވުނީ ކީޕަރާ ދިމާލަށެވެ. 

މެޗުގެ 37ވަނަ މިނެޓުގައި، މޮންޝެންގްލަބެކްއާގެ ޕެނަލްޓީ އޭރިއާގެ ތެރެއިން އެ ޓީމުގެ ޑިފެންޑަރ، ކޯ އިޓަކޫރާގެ މޫނުގައި ޖެހެން ދިޔަ ބޯޅައަކުން މޫނު ސަލާމަތްކުރުމަށް އޭނާ ހިއްލާލި އަތުގައި ބޯޅަ ޖެހުމުން ބެޔާންގެ ކުޅުންތެރިން ވަނީ ރެފްރީ ވަށާލައި، ޕެނަލްޓީއެއް ހޯދުމަށް މަސައްކަތްކޮށްފައެވެ. ނަމަވެސް، ރެފްރީ ވަނީ އެއީ ޕެނަލްޓީއެއް ނޫންކަމަށް ނިންމާފައެވެ.

ދެވަނަ ހާފުގައި މޮންޝެންގްލަބެކްއާއިން ކުޅެން މަސައްކަތްކޮށް، ހަމަލާތަކެއް އުފައްދަން އުޅުނުތަން ފެނުނެވެ. އެގޮތުން ބެޔާންގެ ޕެނަލްޓީ އޭރިއާގެ ތެރޭގައި އެކަނި ހުރި ޓިމް ކްލޭންޑިއެންސްޓަށް މެޗުގެ 56ވަނަ މިނެޓުގައި ލިބުނު ފުރުސަތު ފާހަގަކޮށްލެވެއެވެ. ނަމަވެސް އޭނާއަށް ވަނީ ބޯޅަ ގޯލާ އަމާޒުކުރެވޭ ގޮތް ނުވެފައެވެ.

އެ ޓީމުގެ ނުރައްކަލުން ރައްކާތެރިވުމަށް، ބެޔާންގެ ކޯޗު، ވިންސެންޓު ކޮމްޕެނީ އަވަސް ފިޔަވަޅުތަކެއް އެޅިއެވެ. އެގޮތުން މުލާރގެ ބަދަލުގައި ކިންގްސްލީ ކޯމަން ކުޅެން އެރުވުން ފާހަގަކޮށްލެވެއެވެ. އޭނާ ކުޅެން ނިކުތްތާ މާގިނައިރުތަކެއްނުވެ، މައިކަލް އޮލީސޭއަށް ހުރަސްކޮށްދިން ބޯޅައިގައި މޮންޝެންގްލަބެކްއާގެ ކުޅުންތެރިއަކު އޮލީސޭ ކޮއްޕާލުމަށްފަހު ކުރި ފައުލާ ގުޅިގެން އެ ޓީމަށް ޕެނަލްޓީއެއް ލިބުނެވެ. މި ޕެނަލްޓީ ކާމިޔާބުކޮށް، ކޭން ވަނީ ބެޔާންއަށް ލީޑު ނަގާދީފައެވެ.

މި މެޗުން ލިބުނު ތިން ޕޮއިންޓަކީ ލީގުގެ އެއްވަނައިގައި އޮތް ލީޑު ދެމެހެއްޓުމަށް އެ ޓީމަށް ލިބުނު މުހިންމު ޕޮއިންޓުތަކެކެވެ. މި މެޗުގެ ކުރިން، ބެޔާން ލެވަކޫސެން ވަނީ ބްރޫޝާ ޑޯޓްމަންޑް ބަލިކޮށް، އެ ލީޑު އެއް ޕޮއިންޓަށް ހަނިކޮށްފައެވެ.

މި ލިޔުން ކިޔާލުމުން

Ads by MSS