ބޮޑު ތަފާތަކުން ރެއާލް ބަލިކުރުމަށްފަހު ބާސެލޯނާ އިން ސުޕަ ކަޕް ކާމިޔާބުކޮށްފި

ބޮޑު ތަފާތަކުން ރެއާލް މެޑްރިޑް ބަލިކުރުމަށްފަހު ބާސެލޯނާއިން ސްޕެނިޝް ސުޕަރ ކަޕް ކާމިޔާބުކޮށްފިއެވެ.

ސައުދީ އަރަބިއްޔާގެ ރިޔާޛުގައި ކުޅުނު މި މެޗު ބާސެލޯނާއިން ކާމިޔާބުކުރީ، ރެއާލް އިން މެޗުގެ ކުރީކޮޅު ލީޑު ނަގާފައިވަނިކޮށް، ފަހަތުން އަރައި 5-2 އިންނެވެ. 

މެޗު ފަށައިގެން ދެތިން މިނެޓުގެ ތެރޭގައި ބާސެލޯނާއިން ވަނީ ރަގަޅު ދެ ހަމަލާއެއް އުފައްދާފައެވެ. ނަމަވެސް ރެއާލްގެ ގޯލްކީޕަރު، ތިއާބަތު ކޯޓްވާ ވަނީ އެ ހަމަލާތައް ދިފާއުކޮށްފައެވެ.

ރެއާލްއަށް މެޗުގެ 5 ވަނަ މިނެޓުގައި ލީޑު ނަގައިދިނީ ކީލިއަން އެމްބައްޕޭއެވެ. މެދުރޮނގާ ހިސާބުން ބޯޅަ ހިފައިގެން ގޮސް އެމްބައްޕޭ ކާމިޔާބު ކުރި ގޯލުން އޭނާގެ މޮޅު ހުނަރު ފެނިގެން ދިޔައެވެ.

ބާސެލޯނާއަށް މެޗުގެ 21 ވަނަ މިނެޓުގައި ނަތީޖާ ހަމަހަމަކޮށްދިނީ އެ ޓީމުގެ ޒުވާން ފޯވާޑް، ލެމީން ޔަމާލްއެވެ. 

އަދި އޭގެ ފަހުން، ފުރަތަމަ ހާފު ނިމުމުގެ ކުރިން ބާސެލޯނާއިން ވަނީ އިތުރު ތިން ގޯލު ކާމިޔާބުކޮށް، މެޗުގެ ނަތީޖާ 4-1 އަށް ބަދަލުކޮށްފައެވެ. 

އެގޮތުން އެ ޓީމަށް ލީޑު ނަގައިދިނީ، ގަވީއަށްކުރި ފައުލަކަށް ލިބުނު ޕެނަލްޓީއަކުން، ރޮބަޓް ލެވަންޑޯސްކީއެވެ. އަދި އޭގެ ތިން މިނެޓުފަހުން ބާސެލޯނާގެ ލީޑު ފުޅާކޮށްދިނީ ރަފީނިއާ ބޮލުން ކާމިޔާބުކުރި ރީތި ގީލަކުންނެވެ. އެ ގޯލަށްފަހު އޭނާ ވަނީ ބާސެލޯނާގެ ހަތަރު ވަނަ ގޯލު ޖެހުމަށް އެސިސްޓުކޮށްދީފައެވެ. ހަތަރުވަނަ ގޯލު ކާމިޔާބުކުރީ ފުރަތަމަ ހާފުގެ އިތުރު ވަގުތުގައި އެލެކްސް ބާލްޑޭއެވެ. 

ބާސެލޯނާއިން މެޗުގެ ފަސްވަނަ ގޯލު ކާމިޔާބުކުރީ ދެވަނަ ހާފުގެ 3 ވަނަ މިނެޓުގައެވެ. ރަފީނިއާ ކާމިޔާބުކުރި މި ގޯލަކީ، ރެއާލްގެ ރޮޑްރީގޯ އުފެއްދި ހަމަލާއެއް ގޯލުގެ ހުރަސްދަނޑީގައި ޖެހުމަށްފަހު ބޭރަށް ނިކުތްތާ މިނެޓެއްގެ ތެރޭގައި އެ ޓީމުން ކާމިޔާބުކުރި ގޯލެކެވެ. މި ގޯލާ އެކު ރެއާލްއަށް އިތުރު މާޔޫސްކަމެއް ލިބުނެވެ.

އޭގެ ފަހުން ބާސެލޯނާގެ ގޯލްކީޕަރު ވޮޒްނިއަކް ސެޒްނީ އެމްބައްޕޭއަށް ކުރި ފައުލަކަށް އޭނާއަށް ވަނީ ރަތްކާޑެއް ދެއްކުމަށްފަހު މެޗުގެ 56 ވަނަ މިނެޓުގައި ދަނޑުން ފޮނުވާލާފައެވެ. 

ފަހު ހާފުގެ ބޮޑުބައި އެއް ކުޅުންތެރިއަކު މަދުކޮށް ކުޅުނު ބާސެލޯނާ ކޮޅަށް ރެއާލްގެ ދެވަނަ ގޯލު ކާމިޔާބުކުރީ އެ ފައުލާ ގުޅިގެން ލިބުނު ހިލޭ ޖެހުމުގައި ރޮޑްރީގޯއެވެ.

މި ނަތީޖާއަކީ، ބާސެލޯނާއާ ހެންސީ ފްލިކް ހަވާލުވިފަހުން މި ދެ ޓީމުގެ ކުރިމަތިލުންތަކުގައި ރެއާލް ކޮޅަށް ބާސެލޯނާއިން ގިނަ ގޯލުތަކެއް ކާމިޔާބުކުރި ދެވަނަ ފަހަރެވެ. މި ދެ ޓީމު މިދިޔަ އޮކްޓޯބަރގައި ރެއާލްގެ ދަނޑުގައި ބައްދަލުކުރި މެޗު ބާސެލޯނާއިން ވަނީ 4-0 އިން ކާމިޔާބުކޮށްފައެވެ. 

މިއީ ބާސެލޯނާއިން ސުޕަރ ކަޕް ކާމިޔާބުކުރި 15 ވަނަ ފަހަރެވެ.