ގޭންގެއްކަމަށް ހީކޮށް އޮޅިގެން ދިން ހަމަލާއެއްގައި އާންމުންގެ 16 މީހުންމަރުވެއްޖެ

ނައިޖީރިއާގެ އުތުރު ހުޅަނގު ސަރަހައްދުގައި ހިމެނޭ ޒަމްފާރާ ސްޓޭޓުގައި މިލިޓަރީގެ ވައިގެ ހަމަލާއެއްގައި މަދުވެގެން 16 އާންމު ރައްޔިތުން މަރުވެއްޖެއެވެ. މި ހަމަލާ ދިނީ އެމީހުންނަކީ ކުށްވެރި ގޭންގުތަކަށް ނިސްބަތްވާ ބައެއް ކަމަށް ހީކޮށްގެން ކަމަށް ބެލެވެއެވެ.

ޒުރުމީ އަދި މަރަދުން ސަރަހައްދުތަކުގައި ތިބި މިލިޓަންޓް ގޭންގުތަކަށް އަމާޒުކޮށް ދިން މި ހަމަލާގައި މަރުވި މީހުންނަކީ އަމިއްލަ ރައްކާތެރިކަމަށް ހަތިޔާރު އުފުލާ ސިވިލް ޑިފެންސް ގްރޫޕްތަކުގެ މެންބަރުން ކަމަށް އެ ސަރަހައްދުގެ ރައްޔިތުން ލޯކަލް މީޑިއާއަށް މަޢުލޫމާތު ދީފައިވެއެވެ. މި ހާދިސާއާ ގުޅިގެން ސްޓޭޓްގެ ގަވަރުނަރު ދައުދާ ލަވާލް ވަނީ އެ ކޮމިއުނިޓީއަށް ހަމްދަރުދީ ފާޅުކޮށްފައެވެ.

މިލިޓަރީން ބުނެފައިވަނީ އެ ސަރަހައްދުގެ ރަށްތަކަށް ބިރުދައްކަމުން އައި "ބޭންޑިޓުންނަށް"  ހަމަލާއެއް ދެވުނު ކަމަށެވެ. ނައިޖީރިއަން އެއަރ ފޯސް (އެންއޭއެފް) އިން ބުނެފައިވަނީ "ވިޖިލަންޓޭ ގްރޫޕްތަކުގެ ގެއްލުންތަކާ" ގުޅޭ ރިޕޯޓުތައް ތަހުގީގުކުރަމުންދާ ކަމަށެވެ.

މި އޮޕަރޭޝަނުގައި ގިނަ އަދަދެއްގެ ބޭންޑިޓުން މަރާލެވި، ބައެއް ވަގަށް ނަގާފައިވާ މީހުން ސަލާމަތްކުރެވުނު ނަމަވެސް، އޮޕަރޭޝަނުގައި އާންމު ރައްޔިތުންގެ ފުރާނަ ގެއްލުނު ކަމަށް ބުނާ ރިޕޯޓުތަކާމެދު އެންއޭއެފްއިން ވަރަށް ބޮޑަށް ކަންބޮޑުވާކަމަށް އެ ފަރާތުން ނެރުނު ބަޔާނެއްގައި ބުނެފައިވެއެވެ.

މި ހާދިސާއާ ގުޅިގެން "ފުރިހަމަ ތަހުގީގެއް" ކުރިއަށްދާ ކަމަށާއި، އޭގެ ނަތީޖާ ޢާންމުންނަށް އަންގައި، އިތުބާރު އުފެއްދުމަށްޓަކައި ހިއްސާކުރާނެ ކަމަށްވެސް އެންއޭއެފްއިން ބުނެފައިވެއެވެ.

ނައިޖީރިއާގެ އުތުރު-ހުޅަނގު އަދި މެދު ސްޓޭޓުތަކުގައި ފަހަކަށް އައިސް ވަރުގަދަ ކުށްވެރި ގޭންގުތަކުން ރަށްތަކަށް ހަމަލާދީ، ގެތައް އަންދައި، މީހުން މަރައި އަދި ފިދުޔައަށް މީހުން ވަގަށްނަގަމުންދާތީ، ސަލާމަތީ ބާރުތަކުން ވަނީ އެފަދަ ގޭންގުތަކާ ދެކޮޅަށް ހަނގުރާމަ ފަށާފައެވެ.