ޚަބަރު
ދޮށީ އުމުރުގެ މީހެއްގެ ގައިގައި ސައިކަލުން ޖެހި އެމީހާ ވެއްޓުމުން އަޅާނުލާދިޔަ ޒުވާނަކު ހައްޔަރުކޮށްފި
އެކްސިޑެންޓު ވުމުން ފިލި ލޫޠު މިހާރު ވަނީ ފުލުހުން ހައްޔަރުކޮށްފައި، ފޮޓޯ: ޕޮލިސް
ހުލާސާ
މި އެކްސިޑެންޓާ ގުޅިގެން އަނިޔާވެފައިވަނީ އުމުރުން 63 އަހަރުގެ ދިވެހި ފިރިހެނަކަށް.
ދޮށީ އުމުރުގެ މީހެއްގެ ގައިގައި ސައިކަލުން ޖެހި އެމީހާ ވެއްޓުމުން އަޅާނުލާދިޔަ ޒުވާނަކު ފުލުހުން ހައްޔަރުކޮށްފިއެވެ.
އަންގާރަ ދުވަހުގެ ވަގުތެއްގައި މި އެކްސިޑެންޓު ހިނގާފައިވަނީ ހުޅުމާލޭ ނިރޮޅު މަގުގައި ހުންނަ ކެއަރ ޕްލަސް ފިހާރަ ކައިރީގައެވެ.
މި އެކްސިޑެންޓާ ގުޅިގެން އަނިޔާވެފައިވަނީ އުމުރުން 63 އަހަރުގެ ދިވެހި ފިރިހެނަކަށެވެ. އަދި އެމީހާއަށް އަނިޔާވުމުން ހޮސްޕިޓަލުގައި ފަރުވާ ދިނުމަށްފަހު މިހާރު ދޫކޮށްލާފައިވާކަމަށް ފުލުހުން ވަނީ ހިއްސާކޮށްފައެވެ.
މި ހާދިސާއާ ގުޅިގެން ހައްޔަރުކޮށްފައިވަނީ ގދ. ވާދޫ، ފުރުސަތު، ލޫޠު އިބްރާޙިމް (27 އަހަރު)އެވެ.
އޭނާވަނީ އެކްސިޑެންޓު ވުމުން، ސައިކަލު ދޫކޮށްލުމަށްފަހު ފިލާފައެވެ.
ނަމަވެސް އޭނާ ހޯދުމަށްފަހު، ފުލުހުން އިއްޔެ އޭނާ ހައްޔަރުކޮށްފައިވާކަމަށް ހިއްސާކޮށްފައިވެއެވެ.
