98 ގުރާމުގެ މަސްތުވާތަކެއްޗާއެކު މާލެއިން ތިން މީހަކު ހައްޔަރުކޮށްފި

މާލޭގައި ހިންގި މަސްތުވާތަކެތީގެ އޮޕަރޭޝަނެއްގައި 98 ގްރާމްގެ މަސްތުވާތަކެއްޗާއެކު ތިން މީހަކު ހައްޔަރުކޮށްފިއެވެ.

ފުލުހުން ހާމަކޮށްފައިވާ ގޮތުގައި މި އޮޕަރޭޝަން ހިންގާފައިވަނީ މަސްތުވާތަކެތި ބޭނުންކޮށް، ގެންގުޅެ އަދި އެތަކެތީގެ ވިޔަފާރިކުރާ ކަމަށް ތުހުމަތުކުރެވޭ މައްސަލައާ ގުޅިގެންނެވެ. އަދި މި އޮޕަރޭޝަނުގައި ފުލުހުންގެ ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓުން ހަރަކާތްތެރިވެފައިވާކަމަށް ފުލުހުން ވަނީ ހިއްސާކޮށްފައެވެ.

ޖެނުއަރީ 13ވަނަ ދުވަހު ހިންގި މި އޮޕަރޭޝަންގައި ހައްޔަރުކޮށްފައިވަނީ، ގއ. މާމެންދޫ، މޫނިމާގެ، ނަޒީޙް ޝަރީފް (27 އަހަރު) އާއި ޏ. ފުވައްމުލައް، ދަނޑިމަގު/ވައިގެ، މުޙުސިން މުޙައްމަދު (31 އަހަރު) އަދި މާލެ، ދަފްތަރު ނަންބަރު ދރ.465، މުޙައްމަދު ޝާން ޢަބްދުލްޣަނީ (40 އަހަރު) އެވެ.

ފުލުހުން ހާމަކޮށްފައިވާ ގޮތުގައި މި ތިން މީހުން ހައްޔަރުކޮށް ބަލައިފާސްކުރިއިރު މަސްތުވާތަކެތިކަމަށް ބެލެވޭ ތަކެތި ފެނިފައިވެއެވެ. އަދި އެ ތަކެތީގެ ވަގުތީ ބަރުދަނުގައި 98.37 ގުރާމް ހުއްޓެވެ.

މި ތިން މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ. 

އަދި މި މައްސަލަ ތަހުޤީޤު ކުރަމުން އަންނަކަމަށް ވެސް ފުލުހުން ހާމަކުރެއެވެ.