އަޒަރުބައިޖާންގެ ފޮރިން މިނިސްޓަރުގެ ނައިބު ރައީސުލްޖުމްހޫރިއްޔާގެ ނައިބާ ބައްދަލުކުރައްވައިފި

އަޒަރުބައިޖާން ސަރުކާރު ތަމްސީލްކުރައްވާ މަތީ ފަންތީގެ ވަފުދަކުން މިހާރު ރާއްޖެއަށް ކުރައްވަމުންގެންދަވާ ދަތުރުފުޅުގައި އިސްކޮށް ހަރަކާތްތެރިވާ، އެ ޤައުމުގެ މިނިސްޓަރ އޮފް ފޮރިން އެފެއާޒުގެ ނައިބު، އެލްނޫރު މަމަދޮވް، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފްގެ އަރިހަށް އިޙްތިރާމްގެ ޒިޔާރަތެއް ކުރައްވައިފިއެވެ. 

މިއަދު ހެނދުނު އޮތް މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ، ދިވެހިރާއްޖެއަާއި އަޒަރުބައިޖާނާ ދެމެދު ވައިގެ މަގުން ސީދާ ދަތުރުތައް ފެށުމުގެ މުހިންމުކަމަށް އަލިއަޅުވާލައްވައި ވާހަކަފުޅުދައްކަވާފައެވެ. 

އެގޮތުން އެކަން ހާސިލްކުރެވުން ވެގެންދާނީ ފަތުރުވެރިކަން ކުރިއެރުވުމަށާއި، ދެ ޤައުމުގެ ދެމެދުގައި އޮތް ގުޅުން ބަދަހިކުރުމަށް ލިބިގެންދާނެ ފުރުސަތެއްކަން ވަނީ ފާހަގަކުރައްވާފައެވެ.

މީގެ އިތުރުން، މޫސުމީ ބަދަލުތަކުގައި އެހީތެރިވުމާއި، ސަގާފަތާއި، ވިޔަފާރީގެ ދާއިރާއިން ގުޅުން ބަދަހިކުރުމަށް ދެ ބޭފުޅުން މަޝްވަރާ ކުރެއްވިއެވެ.