އިޒްރޭލުން ޣައްޒާގެ ނަސްލު ނައްތާލުމަށް ކުރަމުންދާ މަސައްކަތް މަރުހަލާތަކަކަށް ބަހާލައިގެން ހުއްޓާލުމަށް އެއްބަސްވެއްޖެ

2023 އޮކްޓޫބަރު 7ވަނަ ދުވަހު ހަމާސްއިން އިޒްރޭލަށް ދިން ހަމަލާތަކަކަށްފަހު، އިޒްރޭލުން ހިންގަންފެށި ލާއިންސާނީ ޢަމަލުތައް ހުއްޓައި، ޣައްޒާގެ ނަސްލު ނައްތާލުމަށް ކުރަމުންދާ މަސައްކަތް މަރުހަލާތަކަކަށް ބަހާލައިގެން ހުއްޓާލުމަށް އެއްބަސްވެއްޖެއެވެ. މި އެއްބަސްވުމަށް އާދެވުނުއިރު، މި ހަނގުރާމައިގައި މިހާރު އިޒްރޭލުން ވަނީ މުޅި ޣައްޒާ ސުންނާފަތިކޮށްފައެވެ.

މި އެއްބަސްވުމުގެ އެއް މެދުވެރިއަކަށްވި، ޤަތަރުގެ ޕްރައިމް މިނިސްޓަރ، ޝެއިޙް މުޙައްމަދު ބިން އަބްދުލްރަޙްމާން ބިން ޖައްސިމް އަލް ތާނީ ވިދާޅުވެފައިވާ ގޮތުގައި، މި އަންނަ އާދީއްތަ ދުވަހުން ފެށިގެން ހަނގުރާމަ ހުއްޓާލުމުގެ މަސައްކަތް ފަށާނެއެވެ. 

އަދި އިޒްރޭލުން ހާމަކޮށްފައިވާ ގޮތުގައި މި އެއްބަސްވުމާ ގުޅިގެން މިހާރު ހުރީ ގޮތް ނުނިންމޭ މަދު ކަމެކެވެ. އެ ކަންކަމަށް ގޮތެއް ނިންމުމަށް އިޒްރޭލުގެ ސަރުކާރުގެ ވޯޓެއް މިއަދު ނަގާނެކަމަށް ވެސް އަލްޖަޒީރާއިން ވަނީ ރިޕޯޓުކޮށްފައެވެ.

މި ހަނގުރާމައަށް 460އަށް ވުރެން ގިނަ ދުވަސް ހޭދަވެފައިވާއިރު، އިޒްރޭލުން ވަނީ އަންހެނުންނާއި ކުޑަކުދިންނާއި މުސްކުޅިން ހިމެނޭހެން، ފަލަސްތީނުގެ 46،000 އަށް ވުރެން ގިނަ މީހުން ޝަހީދުކޮށްލާފައެވެ. 

އިޒްރޭލާއި ހަމާސްއާ ދެމެދުވެވޭ މި އެއްބަސްވުމުގެ ދަށުން، އިޒްރޭލުން ޣައްޒާއަށް ދެމުންގެންދާ ހަމަލާތައް ހުއްޓާލުމުގެ އިތުރުން، އަސީރުންގެ ގޮތުގައި ހަމާސްއިން ރަހީނުކޮށްފައިވާ އިޒްރޭލުގެ މީހުންނާއި، އިޒްރޭލުގެ ޖަލުތަކުގައި ތިބި ފަލަސްތީނުގެ މީހުން މިނިވަންކުރުން ވެސް ހިމެނެއެވެ. މީގެ އިތުރުން، ގެދޮރު ގެއްލިފައިވާ ފަލަސްތީނުގެ ރައްޔިތުން އަނބުރާ އެމީހުންގެ ގެތަކަށް ދިއުމުގެ ޙުއްދަ ވެސް ލިބޭނެއެވެ.

އެއްބަސްވުމުގެ ފުރަތަމަ މަރުހަލާ

މި އެއްބަސްވުމުގެ ފުރަތަމަ މަރުހަލާ ހަ ހަފްތާއަށް ދެމިގެންދާއިރު، މި މުއްދަތުގައި ދެ ފަރާތުން ބަންދުކޮށްފައި ތިބި މީހުން ކޮންމެވެސް މިންވަރަކަށް ބަދަލުކުރަން ވަނީ ނިންމާފައެވެ. އަދި މި މުއްދަތުގައި ޣައްޒާގައި ތިބި އިޒްރޭލުގެ ބައެއް ހަނގުރާމަވެރިން ފަލަސްތީނުން ފައިބާނެކަމަށް ވެސް ވެއެވެ. އަދި މީގެ އިތުރުން، ކާބޯތަކެއްޗާއި އަސާސީ ކަންތައްތަކަށް އިންތިހާއަށް ބޭނުންވެފައިވާ ޣައްޒާގެ ރައްޔިތުންނަށް އެކަންކަން ފޯރުކޮށްދިނުމުގެ ޙުއްދަ ވެސް، މި މަރުހަލާގައި ދިނުމަށްވަނީ ހަމަޖެހިފައެވެ.

ކުށްވެރިން ބަދަލުކުރުމަށް ވެފައިވާ އެއްބަސްވުމުގެ ދަށުން، ހަމާސްއިން އަސީރުންގެ ގޮތުގައި ރަހީނުކޮށްފައިވާ 33 މީހަކު އިޒްރޭލާ ހަވާލުކުރާނެއެވެ. ބަދަލުގައި އިޒްރޭލުން ޖަލަށްލާފައިވާ ފަލަސްތީނުގެ ގިނަ ބަޔަކު މިނިވަންކުރާނެއެވެ. މީގެ ތެރޭގައި އުމުރަށް ޖަލަށްލުމަށް އިޒްރޭލުގެ ކޯޓުތަކުން ހުކުމްކޮށްފައިވާ މީހުން ވެސް ހިމެނޭނެއެވެ. 

އަދި ފަލަސްތީނުން އިޒްރޭލު ސިފައިން ފޭބުމުގެ ފުރަތަމަ މަރުހަލާގައި، ޣައްޒާއާއި އިޒްރޭލު ބޯޑަރުން ފެށިގެން 700 މީޓަރަށް ވުރެން އެތެރެއަށް އިޒްރޭލުގެ ސިފައިން ނުވަދުމަށް ނިންމާފައިވެއެވެ. ނަމަވެސް ނެޓްޒަރިމް ކޮރިޑޯއިން އިޒްރޭލު ސިފައިން އަދި ނުފައިބާނެއެވެ. މިއީ އިޒްރޭލު ސިފައިން ފަލަސްތީނުގައި ހިންގަމުންދާ އޮޕަރޭޝަންގެ މައި މަރުކަޒެއްގެ ގޮތުގައި ބޭނުންކުރަމުން އަންނަ ތަނެކެވެ.

އަދި ޣައްޒާގެ ރައްޔިތުންނަށް ކާބޯތަކެއްޗާއި އިންސާނީ އެހީ ފޯރުކޮށްދިނުމަށް، ދުވާލަކު 600 ޓްރަކް ޣައްޒާއަށް ވަނުމުގެ ޙުއްދަ ދިނުމަށްވެސް ވަނީ ނިންމާފައެވެ. 

މީގެ އިތުރުން، އަނިޔާވެފައިވާ ފަލަސްތީނުގެ ރައްޔިތުން ފަރުވާ ހޯދުމަށް ޣައްޒާއިން ފޭބުމުގެ ޙުއްދަ ދިނުމަށް ހަމަޖެހިފައިވާއިރު، ފުރަތަމަ މަރުހަލާގެ 7 ވަނަ ދުވަހުން ފެށިގެން ރަފާޙް ބޯޑަރު ހުޅުވާލުމަށް ނިންމާފައިވެއެވެ. 

އަދި މިސްރާއި ޣައްޒާ ބޯޑަރުގެ މެދުގައި އިޒްރޭލުން ޤާއިމްކޮށްފައިވާ ފިލަޑެލްފީ ކޮރިޑޯގައި ތިބި އިޒްރޭލު ސިފައިންގެ އަދަދު މަދުކޮށް، ފުރަތަމަ 50 ދުވަހަށްފަހު މި ތަނުން އިޒްރޭލު ސިފައިން އެއްކޮށް ފޭބުމަށް ވަނީ ހަމަޖެހިފައެވެ. 

ފުރަތަމަ މަރުހަލާއަށްފަހު ދެން ވާނީ ކިހިނެއް؟

މި އެއްބަސްވުމުގެ ދެވަނަ އަދި ތިންވަނަ މަރުހަލާއާ ގުޅިގެން އެއްބަސްވާ ކަންކަމުގެ ތަފްސީލަށް ދެ ފަރާތުން ދާނީ ފުރަތަމަ މަރުހަލާގެ ތެރެއިންނެވެ. 

އިޒްރޭލުން ބުނެފައިވަނީ، ފުރަތަމަ މަރުހަލާގެ ކަންކަން ނުނިމެނީސް ދެންހުރި މަރުހަލާތަކުގެ ކަންކަމަށް ޔަޤީންކަން ނުދެވޭނެކަމަށެވެ. 

ނަމަވެސް އެސޯސިއޭޓެޑް ޕްރެސްއިން ރިޕޯޓުކޮށްފައިވާ ގޮތުގައި، މި އެއްބަސްވުންތަކުގެ މެދުވެރިއެއްގެ ރޯލު އަދާކުރަމުންދާ މިސްރާއި، ޤަޠަރާއި އަދި އެމެރިކާއިން ވަނީ، މި އެއްބަސްވުމާ އެއްގޮތަށް ހުރިހާކަމެއް ކުރިޔަށް ގެންދާނެކަމުގެ ޔަޤީންކަމާއި، އެ ކަމަށް އެ ތިން ޤައުމުން މަސައްކަތްކުރާނެ ކަމުގައި ހަމާސްއަށް ޔަޤީންކަންދީފައެވެ. 

ދެވަނަ މަރުހަލާގައި ރާވާފައިވާ ކަންކަން

ދެވަނަ މަރުހަލާގައި ހަމާސްއިން އިޒްރޭލުގެ ގިނަ އަސީރުން ދޫކުރުމަށް ވަނީ އެއްބަސްވެފައެވެ. މީގެ ތެރޭގައި ބޮޑަށް ހިމެނޭނީ ފިރިހެން ސިފައިންނެވެ. އަދި ބަދަލުގައި އިޒްރޭލުގެ ޖަލުތަކުގައި ތިބި ފަލަސްތީނުގެ އިތުރު މީހުން މިނިވަންކުރާނެއެވެ. 

އަދި މިހާރު އެއްބަސްވެފައިވާ ގޮތުންނަމަ، މި މަރުހަލާގައި އިޒްރޭލުގެ ހުރިހާ ސިފައިންނެއް ޣައްޒާއިން ފައިބާނެއެވެ. 

ނަމަވެސް، މި މަރުހަލާގެ ގިނަކަންކަމަކީ އަދި އިޒްރޭލުގެ ކެބިނެޓުން ރުހުން ހޯދަންޖެހޭ ކަންކަން ކަމުގައި އަލްޖަޒީރާއިން ރިޕޯޓުކޮށްފައިވެއެވެ. 

ތިންވަނަ މަރުހަލާ

ތިންވަނަ މަރުހަލާގެ އެއްބަސްވުމުންތަކުގެ ކަންކަމުގެ ފުރިހަމަ މަޢުލޫމާތު އަދި މީޑިއާތަކަށް އެހާރަގަޅަށް ލިބިފައި ނުވިނަމަވެސް، މި މަރުހަލާގައި ހަމާސްގެ ބެލުމުގެ ދަށުގައި ތިބި ހުރިހާ އަސީރުން ދޫކޮށްލުމާއި، އިޒްރޭލުގެ ޖަލުތަކުގައިތިބި ފަލަސްތީނުގެ އެންމެން މިނިވަންކުރުން ހިމެނޭކަމަށް މަޢުލޫމާތު ލިބެއެވެ. 

މީގެ އިތުރުން 3-5 އަހަރާ ދެމެދުގެ ޕްލޭނެއްގެ ދަށުން، ފަލަސްތީނު އާރާސްތުކުރުމުގެ މަސައްކަތް، ބައިނަލްއަޤްވާމީ ފަރާތްތަކުގެ ބެލުމުގެ ދަށުން ކުރިޔަށް ގެންދާނެކަމަށް ވެސް ވެއެވެ. 

އަދި މި މަރުހަލާއަށްފަހު، ފަލަސްތީނުގެ ސަރުކާރާ ހަވާލުގެ އެ ޤައުމު އިދާރީ ގޮތުން ހިންގާނީ ކިހިނެއްކަމެއް އަދި ނޭންގެއެވެ. 

އެމެރިކާގެ ސްޓޭޓް ސެކްރެޓަރީ ހާމަކޮށްފައިވާ ގޮތުގައި، އެ ޤައުމު އާރާސްތުކުރުމުގެ މަސައްކަތަށް އެންމެ ރަގަޅުވާނީ ބައިނަލްއަޤްވާމީ ބައިވެރިންގެ އެހީތެރިކަމާއެކު ވަގުތީ ސަރުކާރެއް އެކުލަވާލައި، އެ ޤައުމުގެ ކަންކަން ބެލެހެއްޓުމެވެ.