ދުނިޔެ

ހަނގުރާމަ ހުއްޓާލުމަށް އެއްބަސްވިކަން އިއުލާންކުރި ފަހުން ވެސް އިޒްރޭލުން ހަމަލާދީ އެތައް ބަޔަކު ޝަހީދުކޮށްލައިފި

ހަނގުރާމަ ހުއްޓާލުމަށް އެއްބަސްވިކަން އިއުލާންކުރި ފަހުން ވެސް އިޒްރޭލުން ހަމަލާދީ އެތައް ބަޔަކު ޝަހީދުކޮށްލައިފި

އިޒްރޭލުން ރޭ ރެފިއުޖީ ޓެންޓުތަކެއްގެ ކައިރިތަށް ހަމަލާދީފައި، ފޮޓޯ: އަނަޑޮލޫ

މިފްތާޙް މުޙައްމަދު

މިފްތާޙް މުޙައްމަދު

16 ޖެނުއަރީ 2025، 02:10

16 ޖެނުއަރީ 2025، 02:10

ހުލާސާ

މި ހަމަލާތަކަކާ ގުޅިގެން ފަލަސްތީނުގެ 46 މީހަކު ޝަހީދުވެފައިވާކަމަށް ރިޕޯޓުތައް ބުނޭ.

ޣައްޒާގައި ކުރަމުންދާ ހަނގުރާމައާ ގުޅިގެން، ހަމާސް އާއި އިޒްރޭލުން ހަނގުރާމަ ހުއްޓާލުމުގެ އެއްބަސްވުމަކާ ހިސާބަށް އާދެވުނުކަން އިއުލާންކުރިފަހުން ވެސް، އިޒްރޭލުން ޣައްޒާއަށް ހަމަލާދީފިއެވެ.

އެގޮތުން މިއަދުގެ ހެނދުނު އިޒްރޭލުން ވައިގެ މަގުން ދިން ހަމަލާތަކަކާ ގުޅިގެން ފަލަސްތީނުގެ 46 މީހަކު ޝަހީދުވެފައިވާކަމަށް ރިޕޯޓުތައް ބުނެއެވެ. އަދި އިޒްރޭލުގެ މި އަމަލާ ގުޅިގެން، ހަނގުރާމަ ހުއްޓާލުމަށް އެއްބަސްވެފައި އޮތް ވަގުތާ ހަމައަށް، އިޒްރޭލުން ކެނޑިނޭޅި ހަމަލާތައް ދެމުން ގެންދާނެކަމަށް ބެލެވޭތީ، ފަލަސްތީނުގެ ރައްޔިތުން ތިބީ ބޮޑު ހާސްކަމެއްގެ ތެރޭގާއިކަމަށް ވެސް ރިޕޯޓުތައް ބުނެއެވެ. 

އަދި ހަނގުރާމަ ހުއްޓާލުމުގެ އެއްބަސްވުމާ ގުޅޭ ވާހަކަތައް އިއުލާންކުރުމަށްފަހު ހަމާސް އިން ވެސް އިޒްރޭލަށް ރޮކެޓު ހަމަލާދީފައިވާކަމަށް އިޒްރޭލުގެ މިލިޓަރީއިން ވަނީ ހާމަކޮށްފައެވެ. ނަމަވެސް މި ހަމަލާގައި އެއްވެސް މީހަކު މަރުވެފައެއް ނުވެއެވެ.

މި އެއްބަސްވުމުގެ އެއް މެދުވެރިއަކަށްވި، ޤަތަރުގެ ޕްރައިމް މިނިސްޓަރ، ޝެއިޙް މުޙައްމަދު ބިން އަބްދުލްރަޙްމާން ބިން ޖައްސިމް އަލް ތާނީ ވިދާޅުވެފައިވާ ގޮތުގައި، މި އަންނަ އާދީއްތަ ދުވަހުން ފެށިގެން ހަނގުރާމަ ހުއްޓާލުމުގެ މަސައްކަތް ފަށާނެއެވެ.

މި ހަމަނުޖެހުން ނިމުމަކަށް ގެނައުމަށް އެއްބަސްވެފައި މިވަނީ، ޤަތަރާއި، މިސްރާއި އަދި އެމެރިކާއިން ސުލްހައިގެ ވާހަކަތައް ދައްކާތާ ގިނަ ދުވަސްތަކެއްވެފައި ވަނިކޮށެވެ. މި ހަނގުރާމަ ކުރިޔަށްދާތާ މިހާރު 15 މަސްވެފައިވާއިރު، ފަލަސްތީނުގެ ބޮޑުބައެއް ވަނީ ސުންނާފަތިކޮށްފައެވެ. 

އިޒްރޭލާއި ހަމާސްއާ ދެމެދުވެވޭ މި އެއްބަސްވުމުގެ ދަށުން، އިޒްރޭލުން ޣައްޒާއަށް ދެމުންގެންދާ ހަމަލާތައް ހުއްޓާލުމުގެ އިތުރުން، އަސީރުންގެ ގޮތުގައި ހަމާސްއިން ރަހީނުކޮށްފައިވާ އިޒްރޭލުގެ މީހުންނާއި، އިޒްރޭލުގެ ޖަލުތަކުގައި ތިބި ފަލަސްތީނުގެ މީހުން މިނިވަންކުރުން ވެސް ހިމެނެއެވެ. މީގެ އިތުރުން، ގެދޮރު ގެއްލިފައިވާ ފަލަސްތީނުގެ ރައްޔިތުން އަނބުރާ އެމީހުންގެ ގެތަކަށް ދިއުމުގެ ޙުއްދަ ވެސް ލިބޭނެއެވެ.

މި ލިޔުން ކިޔާލުމުން

Ads by MSS