ކުޅިވަރު

ކޮޕަ ޑެލް ރޭގެ ކުއާޓާފައިނަލުން ބާސެލޯނާ ޖާގަ ހޯދައިފި

ކޮޕަ ޑެލް ރޭގެ ކުއާޓާފައިނަލުން ބާސެލޯނާ ޖާގަ ހޯދައިފި

ގޯލެއް ޖެހުމަށްފަހު ބާސެލޯނާ އިން އުފާފާޅުކުރަނީ، ފޮޓޯ: ގެޓީ އިމޭޖަސް

މިފްތާޙް މުޙައްމަދު

މިފްތާޙް މުޙައްމަދު

16 ޖެނުއަރީ 2025، 03:05

16 ޖެނުއަރީ 2025، 03:05

ހުލާސާ

ލަ ލީގާގެ އެއްވަނައިގައި އޮތް އެތުލެޓިކޯ މެޑްރިޑުން ވެސް ވަނީ ކުއާޓާފައިނަލުން ޖާގަ ހޯދާފައި.

ބޮޑު ތަފާތަކުން ވާދަވެރި ރެއާލް މެޑްރިޑް ބަލިކޮށް ސްޕެނިޝް ސުޕަރ ކަޕް ކާމިޔާބުކުރުމަށްފަހު، އެ އުފާވެރިކަމުގެ ތެރޭގައި އެ ޓީމުން ކޮޕަ ޑެލް ރޭގެ ކުއާޓާ ފައިނަލުން ވެސް ޖާގަ ހޯދައިފިއެވެ.

ރެއާލް ބެޓިސްއާ ދެކޮޅަށް ކޮޕަ ޑެލް ރޭގެ ރައުންޑް-އޮފް-16 ގައި ބާސެލޯނާއިން ކުޅުނު މި މެޗު އެ ޓީމުން ކާމިޔާބުކުރީ 5-1 އިންނެވެ. މި މެޗުގައި އެ ޓީމުގެ ޒުވާން ލެމީން ޔަމާލް ވަނީ ގޯލެއް ޖެހުމުގެ އިތުރުން، ގޯލަކަށް އެސިސްޓް ވެސް ކޮށްދީފައެވެ.

މިއީ ސައުދީ އަރަބިއްޔާގައި ކުޅުނު ސުޕަރ ކަޕްގެ ފައިނަލުގައި 5 ގޯލު ކާމިޔާބުކުރުމަށްފަހު، ޖެހިގެން އައި މެޗުން ބެޓިސް ކޮޅަށް ވެސް 5 ގޯލުޖަހާ، ބާސެލޯނާއިން މިވަނީ ދެ މެޗުން 10 ގޯލު ހަމަކޮށްފައެވެ. 

ގަވީގެ ގޯލަކުން ބާސެލޯނާއިން މި މެޗުގެ ލީޑު 3 ވަނަ މިނެޓުގައި ނަގާފައިވާއިރު، އެ ޓީމުން ވަނީ 27 ވަނަ މިނެޓުގައި އިތުރު ގޯލެއް ކާމިޔާބުކުރުމަށްފަހު، ލީޑު ފުޅާކޮށްފައެވެ.

ދެވަނަ ހާފުގައި އެ ޓީމަށް ގޯލުތައް ކާމިޔާބުކޮށްދިނީ ރަފީނިއާ އާއި ފެރަން ޓޮރޭސް އަދި ލެމީން ޔަމާލްއެވެ. 

ބެޓިސްގެ ހަމައެކަނި ގޯލު ކާމިޔާބުކޮށްފައި ވަނީ މެޗު ނިމެން 6 މިނެޓަށްވެފައި ވަނިކޮށް ލިބުނު ޕެނަލްޓީއަކުން، އެ ޓީމުގެ ވިޓަރ ރޯގުއެވެ. 

ބާސެލޯނާގެ އިތުރުން، ލަ ލީގާގެ އެއްވަނައިގައި އޮތް އެތުލެޓިކޯ މެޑްރިޑުން ވެސް ވަނީ ކުއާޓާފައިނަލުން ޖާގަ ހޯދާފައެވެ. އެ ޓީމުން ކުއާޓާ ފައިނަލުގެ ޖާގަ ހޯދީ ދެވަނަ ޑިވިޝަނުގެ އެލްޗޭ 4-0 އިން ބަލިކުރުމަށްފަހުއެވެ. 

މި ލިޔުން ކިޔާލުމުން

Ads by MSS