އެމެރިކާގައި ޓިކްޓޮކް މަނާކުރަން  ނިންމި ނިންމުން ސުޕްރީމް ކޯޓުން ދަމަހައްޓައިފި

އެމެރިކާގެ ސުޕްރީމް ކޯޓުން ވަނީ ޓިކްޓޮކްގެ މައި ކުންފުނި ކަމުގައިވާ ޗައިނާގެ ބައިޓްޑާންސްއިން އާދިއްތަ ދުވަހުގެ ކުރިން ޓިކްޓޮކް ވިއްކާލުމަށް ނުވަތަ އެމެރިކާގައި އެޕްލިކޭޝަން ބޭނުންކުރުން މަނާކުރުމަށް ނެރެފައިވާ ޤާނޫނު ދަމަހައްޓާފައެވެ. މި ނިންމުމާ ގުޅިގެން، މި ހަފްތާ ނިމުމުގެ ކުރިން ގިނަ އެމެރިކާ ރައްޔިތުންނަށް ޓިކްޓޮކް ބޭނުންކުރުމުގެ ފުރުސަތު ގެއްލޭނެއެވެ.

ބައިޑަން އިދާރާއިން ހުށަހަޅާފައިވާ "ޕްރޮޓެކްޓިންގ އެމެރިކަންސް ފްރޮމް ފޮރިން އެޑްވަރސަރީ ކޮންޓްރޯލްޑް އެޕްލިކޭޝަންސް އެކްޓް" އާ އެއްގޮތަށް، އެޕަލް އަދި ގޫގުލް ފަދަ އިންޓަނެޓް އާ ގުޅުންހުރި ހިދުމަތްދޭފަރާތްތަކުން ޖެނުއަރީ 19 ވަނަ ދުވަހުގެ ފަހުން ބައިޓްޑާންސްގެ މިލްކިއްޔާތުގައިވާ ޓިކްޓޮކްއަށް ސަޕޯޓްކުރުމުން އަދަބު ލިބޭނެއެވެ.

މި ނިންމުމާ ގުޅިގެން، އެމެރިކާގައި ޓިކްޓޮކް ބޭނުންކުރާ  170 މިލިއަން މީހުންގެ  ހައްގުތަކަށް އުނިކަން އަންނަ ކަމަށް ބުނެ ޓިކްޓޮކްގެ ވަކީލުން ވަނީ ސުޕްރީމް ކޯޓުގައި ވާހަކަދައްކާފައެވެ. ނަމަވެސް، އެމެރިކާގެ ސޮލިސިޓަރ ޖެނެރަލް އެލިޒަބެތް ޕްރެލޯގަރ ވިދާޅުވެފައިވަނީ ބައިޓްޑާންސްގެ ޗައިނާގެ ސަރުކާރާ އޮތް ގުޅުމަކީ ގައުމީ ސަލާމަތަށް ނުރައްކަލެއް ކަމަށެވެ.

މި މައްސަލައިގެ ނިންމުން އައުމާ ގުޅިގެން، ގިނަ ޓިކްޓޮކް ކޮންޓެންޓް ކްރިއޭޓަރުން ވަނީ އެހެން ސޯޝަލް މީޑިއާ ޕްލެޓްފޯމްތަކަށް ބަދަލުވުމަށް އެ ފަރާތްތަކުގެ ފޮލޯވަރުންނަށް އިލްތިމާސްކޮށްފައެވެ. އަދި އިންސްޓަގްރާމްގެ ވެރިންވެސް ވަނީ ޓިކްޓޮކް ބޭނުންކުރާ ފަރާތްތައް އިންސްޓަގްރާމަށް ބަދަލުވުމަށް ތައްޔާރުވުމަށް މުވައްޒަފުންނަށް އަންގާފައެވެ.

ޓިކްޓޮކްގެ ކުރިމަގު މިހާރު އޮތީ ހޮނިހިރު ދުވަހު ރައީސްކަމާ ހަވާލުވާ ޑޮނަލްޑް ޓްރަމްޕްގެ އަތްމަތީގައެވެ. އޭނާގެ އިދާރާއިން ވަނީ މި މައްސަލައިގެ ސިޔާސީ ހައްލެއް ހޯދުމަށް ފުރުސަތު ދިނުމަށް އެދި ސުޕްރީމް ކޯޓުގައި ދަޢުވާކޮށްފައެވެ. ޓްރަމްޕްގެ ރައީސްކަމުގެ ދައުރު ފެށޭނީ ޓިކްޓޮކް ވިއްކާލުމުގެ ސުންގަޑި ހަމަވާތާ އެންމެ ދުވަހެއްގެ ފަހުންނެވެ.