ފެނިގެންދަނީ ވައިގެ ދަތުރުފަތުރުގެ މަރުކަޒެއްގެ ގޮތުގައި މާފަރު އެއަރޕޯޓު ވަރުގަދަވަމުންދާ މަންޒަރު: މުމްތާޒް

މާފަރު އިންޓަނޭޝަނަލް އެއަރޕޯޓުގެ އާ ޚިދުމަތްތަކާއެކު ފެނިގެން ދަނީ ވައިގެ ދަތުރުފަތުރުގެ މަރުކަޒެއްގެ ގޮތުގައި އެ އެއަރޕޯޓުގެ މަޤާމު އިތުރަށް ވަރުގަދަވަމުންދާ މަންޒަރުކަމަށް، އައިލޭންޑް އޭވިއޭޝަން (އައިއޭއެސް)ގެ ޖެނެރަލް މެނޭޖަރު މުމްތާޒު ޢަލީ ވިދާޅުވެއްޖެއެވެ.

މުމްތާޒް މިހެން ވިދާޅުވީ، މިދިޔަ އަހަރު ނިމުނުއިރު މާފަރު އެއަޕޯޓަށް ލިބުނު ކުރިއެރުންތަކަށް  އަލިއަޅުވާލައްވަމުންނެވެ. 

މާފަރު އެއަރޕޯޓުގެ ރަންވޭ ފުޅާކުރުމުގެ މަސައްކަތްކުރުމަށް މިދިޔަ އަހަރުގެ ޖޫން މަހުން ފެށިގެން ސެޕްޓެންބަރު މަހާ ހަމައަށް އެ އެއަރޕޯޓު ބަންދުކުރިއެވެ. އަދި އެއަށްފަހު ބައިނަލްއަޤްވާމީ އުދުހުންތަކަށް ހުޅުވާލީ މިދިޔަ އޮކްޓޯބަރު މަހެވެ.

އެއަރޕޯޓު އިތުރަށް ތަރައްޤީކުރުމުގެ މަސައްކަތުގެ ދަށުން ރަންވޭއަށް 650 މީޓަރު އިތުރުކޮށް، ރަންވޭގެ ދިގުމިން 2800 މީޓަރަށް ވަނީ ބޮޑުކޮށްފައެވެ. މި ބަދަލާ ގުޅިގެން ބައިނަލްއަޤްވާމީ އުދުހުންތަކުގައި ބޭނުންކުރާ ބޮއިންގ 777 މަރުކާގެ މަތިންދާބޯޓުތަކަށްވެސް ރަންވޭއަށް ޖެއްސޭނެއެވެ.

ރަންވޭގެ މަސައްކަތްކުރުމަށް އެއަރޕޯޓު ބަންދުކޮށްފައި ހުޅުވިއިރު، އާ ޚިދުމަތްތަކެއް ވެސް ވަނީ އެ އެއަރޕޯޓުގެ އޮޕަރޭޝަނަށް އިތުރުކުރެވިފައެވެ. އޭގެ ތެރޭގައި އެއްގަމުގެ ދަތުރުފަތުރުތައް ހިމެނެއެވެ.

އަޅުގަނޑުމެން ވާނީ އިތުރު ޚިދުމަތްތަކެއް ތަޢާރަފުކޮށްފައި. އޭގެ ތެރޭގައި އެއްގަމުގެ ދަތުރުފަތުރުގެ ޚިދުމަތްތައް ހިމެނޭ. އަދި މިހާރު އެޕްރަންގެ މަސައްކަތްތައް ކުރިއަށްދަނީ. އަޅުގަނޑުމެންގެ ފަސިންޖަރުންގެ ބޭނުންތައް އިތުރަށް ފުރިހަމަ ކުރުމަށްޓަކައި އަޅުގަނޑުމެންގެ އެއަރޕޯޓު ވަނީ ފުޅާދާއިރާއެއްގައި ބަދަލުތަކެއް ގެނައުމަށް ތައްޔާރުވެފައި.

އައިއޭއެސްގެ ޖެނެރަލް މެނޭޖަރު މުމްތާޒު ޢަލީ ވިދާޅުވިއެވެ.

އެއަރޕޯޓް އަލަށް ހުޅުވާލިފަހުން މިދިޔަ ޑިސެންބަރު މަހު އެކަނިވެސް އެ އެއަރޕޯޓަށް 98 ޕްރައިވެޓް ޖެޓު ޖައްސާފައިވާކަމަށް އައިލެންޑު އޭވިއޭޝަނުން ވަނީ ހާމަކޮށްފައެވެ.

މާފަރު އެއަރޕޯޓަށް ލިބެމުންދާ ކުރިއެރުންތަކާ ގުޅިގެން މުމްތާޒް ވިދާޅުވީ، އެއީ އާ ގޮތްތަކާއި ފެންވަރު ރަނގަޅު ޚިދުމަތްތަކެއް ދިނުމަށް އެއަރޕޯޓުގެ މުވައްޒަފުން ކުރާ މަސައްކަތުގެ ނަތީޖާކަމަށެވެ.

މަތީ ފަންތީގެ ރިޒޯޓުތައް ނ، ރ އަދި ބ ގައި ގިނަވުމުން، އެ ތަންތަނަށް އަންނަ މަހުޖަނުންގެ ޖެޓުތައް އާންމުގޮތެއްގައި ޖައްސަނީ މާފަރު އެއަރޕޯޓަށެވެ.